Asmi i d-​yexleq Yahwa tawacult, iwekkel imawlan ɣef dderya-​nsen. (Ikulusiyen 3:20) Kenwi yellan d imawlan, yelzem fell-​awen a d-​tṛebbim mmi-​twen (neɣ yelli-​twen) akken ara iḥemmel Yahwa yerna a t-​tɛiwnem ad yuɣal d argaz i gzemren i yiman-​is. (2 Timutawus 1:5; 3:15) Ilaq-​awen daɣen aţ-​ţɛelmem d acu yellan deg wul n mmi-​twen neɣ n yelli-​twen. Acu kan, lemtel ara d-​tbeggnem kenwi yesɛa azal ameqran. Ma tebɣam aţ-​ţesseḥfḍem akken ilaq i dderya-​nwen lumuṛ n Yahwa, ilaq-​awen a ten-​tessekcmem uqbel deg wulawen-​nwen kenwi.—Ahellil 40:9.

AYEN I D-​IQQAR WEDLIS IQEDSEN: “Mkul yiwen ad yili xfif i uḥesses, ẓẓay i lhedṛa.” (Yeɛqub 1:19) Bla ccekk, tebɣam ad iḥuss mmi-​twen belli yezmer a wen-​d-​ihdeṛ melmi i s-​ihwa. Acu kan, ilaq ad yeɛlem belli tweǧdem a s-​tḥessem mkul tikkelt ideg ara yebɣu a wen-​d-​yini lḥaǧa. Ihi, srusuyet-​ed lehna gar-​awen d mmi-​twen akken a wen-​d-​iheddeṛ s sshala. (Yeɛqub 3:18) Ma yella tzeyyṛem-​ţ mliḥ fell-​as neɣ teţbanem-​as-​d tweɛṛem, ur a wen-​d-​ileddi ara ul-​is. Sɛut ṣṣber, yerna qqaret-​as dima belli tḥemmlem-​t.—Matta 3:17; 1 Ikurintiyen 8:1.

AYEN I TZEMREḌ AŢ-​ŢXEDMEḌ:

• Ţjab-​ed lweqt kečč ţ-​ţmeṭṭut-​ik m’ara yeḥwiǧ mmi-​twen a wen-​d-​ihdeṛ

• Heddṛet daymen yid-​es, mačči kan di teswiɛin ideg i ţţilin wuguren

AYEN I D-​IQQAR WEDLIS IQEDSEN: ‘Win iwezznen lehduṛ iţţili di liser.’ (Lemtul 16:20) Tikwal, ur ţţarra ara kan ddehn-​ik ɣer imeslayen n mmi-​k, ţnadi aţ-​ţeẓreḍ d acu i geţḥussu s ṣṣeḥ. Imeẓyanen ḥemmlen ad ssemɣren timsal neɣ a d-​inin leḥwayeǧ iɣef ur meyyzen ara. Lameɛna, “win yeţḥirin a d-​iǧaweb uqbel ad iḥesses, d lehbala.” (Lemtul 18:13) Ihi, ur zeɛɛfet ara bihfih.—Lemtul 19:11.

AYEN I TZEMREḌ AŢ-​ŢXEDMEḌ:

• Ur gezzem ara awal i mmi-​k (neɣ i yelli-​k) yerna ur k-​iţeffeɣ ara leɛqel, ayen yebɣu yini-​t-​id

• Mmekti-​d acu i teţḥussuḍ asmi i telliḍ annect-​is d wayen iwumi teţţakeḍ azal imiren-​nni

AYEN I D-​IQQAR WEDLIS IQEDSEN: “A mmi, ţḥessis i lewṣayat n baba-​k! Ur ḥeqqer ara lehduṛ n yemma-​k.” (Lemtul 1:8) Yahwa iwekkel ama d ababat ama ţ-​ţayemmaţ ɣef dderya-​nsen. Ilaq-​awen aţ-​ţesselmdem mmi-​twen akken a ken-​iţqadar yerna a wen-​iţţaɣ awal. (Ifasusiyen 6:1-3) Ma yella imawlan ur sɛin ara “yiwen n uxemmem”, mmi-​tsen yeţfaq i wannect-​a. (1 Ikurintiyen 1:10) Ihi, m’ur temtafaqem ara, ur d-​sbegginet ara ayagi zdat n mmi-​twen, neɣ m’ulac ad yuɣal ur ken-​iţqadar ara.

AYEN I TZEMREḌ AŢ-​ŢXEDMEḌ:

• Mtafaq kečč ţ-​ţmeṭṭut-​ik ɣef wamek ara tṛebbim mmi-​twen

• Ma yella temxallafem di ṛṛay ɣef wamek ara t-​tṛebbim, nadit amek ara temsefhamem

AYEN I D-​IQQAR WEDLIS IQEDSEN: “Mel i weqcic abrid ara yetbeɛ.” (Lemtul 22:6) Ţṛebga irebḥen ur d-​teţţas ara kan akka weḥd-​es. Ilaq aţ-​ţmeyyzem uqbel ɣef wamek ara ţ-​tefkem i dderya-​nwen. (Ahellil 127:4; Lemtul 29:17) Ţṛebga n ṣṣeḥ mačči d aɛaqeb kan, meɛna d asefhem ara tessefhmem i dderya-​nwen ayɣer i glaq lqanun-​agi neɣ wayeḍ. (Lemtul 28:7) Sselmdet-​as i mmi-​twen ad iḥemmel Awal n Yahwa w’ad yefhem imenzayen yellan deg-​s. (Ahellil 1:2) Ayagi a t-​iɛiwen ad ikseb lxaṭer iṣewben.—Iɛebṛaniyen 5:14.

AYEN I TZEMREḌ AŢ-​ŢXEDMEḌ:

• Ɛiwen mmi-​k ad iţwali belli Ṛebbi d Win yellan s ṣṣeḥ, yerna d Win iɣef yezmer ad yeţkel

• Sselmed-​as amek ara yeɛqel lemḍerra i d-​itekken si yir tikli (am wayen yeţţilin di Internet) d wamek ara s-​ittixxeṛ. Sselmed-​as daɣen ad iḥader iman-​is seg wid yeţnadin ad xedmen lɛaṛ i imecṭaḥ