LANBEYYA n zik sɛan liman di Ṛebbi. Umnen s lemɛahdat-​is yerna tamɛict-​nsen tcudd ɣer lemɛahdat-​agi. A nwali kra seg-​sent.

Akken kan i tɛedda lmeɛṣegga-​nni n Adam d Ḥewwa di Ɛidin, Ṛebbi yeggull ad yextiṛ win ara imeḥqen aqerru n “wezrem-​nni”, yeɛni ara t-​issengren i dima. (Laṣel n ddunit 3:14, 15) Azrem-​agi d “llafɛa-​nni tameqqrant [...], tin akken yellan d azrem-​nni n zik yeţţusemman Iblis, Cciṭan.” (Aweḥḥi 12:9, 12) Lanbeyya ţṛaǧun ihi win ara d-​yasen akken a ten-​iɛiwen. Anwa-​t wagi?

Mi ɛeddan wazal n 2 000 iseggasen mbeɛd licaṛa-​yagi tamezwarut, Yahwa yewɛed i nnbi Abṛaham belli Win akken ara d-​yasen a d-​yekk si tarwa-​s. Yenna-​yas: “Bla ccekk, s zzerriɛa-​inek [tarwa-​k], leǧnas meṛṛa n ddunit ad barken iman-​nsen, axaṭer tuɣeḍ-​iyi awal.”​—Laṣel n ddunit 22:18.

Deg useggas 1473 uqbel Ɛisa, Ṛebbi issefhem akteṛ n leḥwayeǧ ɣef “zzerriɛa-​nni” i nnbi Musa. Musa yenna i tarwa n Isṛayil: “Yahwa Ṛebbi-​inek a d-​issufeɣ yiwen n nnbi seg-​k, si ger watmaten-​ik, am nekk; d neţţa iwumi ara tḥessem.” (Asmekti 18:15) Am Musa, nnbi-​yagi ara d-​yasen a d-​yekk si tarwa n Abṛaham.

Nnbi-​yagi a d-​yekk diɣen si tarwa n ugellid Dawed yerna neţţa s yiman-​is ad yuɣal d agellid ameqran. Ṛebbi yewɛed i Dawed: “Bla ccekk, a d-​ssekreɣ deffir-​ek yiwen si tarwa-​k [yerna] ad reṣṣiɣ akersi n lḥekma n tgelda-​s i lewqat iḍulen.” (2 Camwil 7:12, 13) Ṛebbi ibeggen-​ed diɣen belli wagi ara d-​yekken si tarwa n Dawed ad yeţţusemmi “Ageldun n lehna”. Yenna-​d fell-​as: “Lketṛa n lḥekma n ugeldun akk-​d lehna ur  fennun ara, ɣef ukersi n lḥekma n Dawed akk-​d tgelda-​s, akken a t-​yesbedd s lǧehd yerna a t-​ireṣṣi s lḥeqq akk-​d lqanun, si tura i lewqat iḍulen.” (Icɛaya 9:6, 7) Ih, aneḥkam-​agi aḥeqqi a d-​yerr lehna d lḥeqq ɣef ddunit meṛṛa. Meɛna, melmi ara d-​yas?

Ɣer zdat, lmelk Jebrayil yessefhem i nnbi Danyil: “Ilaq aţ-​ţeẓreḍ w’aţ-​ţesɛuḍ lefhama: seg wasmi i d-​iffeɣ wawal n tuɣalin akk-​d uɛiwed n lebni n Yarucalim alamma d Lmasiḥ yellan d Amwellah, ad ilint sebɛa n ledwaṛ akk-​d tnin useţţin n ledwaṛ.” (Danyil 9:25) Ledwaṛ-​agi (smanat-​agi) iɣef i d-​yehdeṛ lmelk Jebrayil d 69 n ledwaṛ n iseggasen. Yiwet n smana n iseggasen d 7 iseggasen. Ihi, 69 n smanat-​agi n iseggasen d 483 n sna. Smanat-​agi n iseggasen bdant deg useggas 455 uqbel Ɛisa, fukkent deg useggas 29 mbeɛd Ɛisa. a

Lmasiḥ, yellan d nnbi-​nni am Musa yerna yellan d “zzerriɛa-​nni” i ṛǧan acḥal, yusa-​d dɣa d ṣṣeḥ deg useggas 29 mbeɛd Ɛisa? D ayen ara n wali.