YAHWA yeẓra belli win ɛzizen akk fell-​as ilaq ad yetmeḥḥen w’ad immet yiwen wass, akken yura di licaṛa n Laṣel n ddunit 3:15. S wacu ara yessefhem Ṛebbi i yemdanen acḥal ara t-​isseḥzen wayagi? S wayen yeḍran yiwen wass di tudert n Abṛaham. Adlis Iqedsen yenna-​d belli Ṛebbi iḍleb-​as ad yefk d asfel Isḥaq, mmi-​s ɛzizen fell-​as.

Abṛaham yesɛa liman d ameqran. Yumen belli ma ilaq, Ṛebbi a d-​yesseḥyu Isḥaq si lmut. Ayɣer i gumen annect-​a? Axaṭer Ṛebbi iḍmen-​it belli Amsellek-​nni, yeɛni Zzerriɛa-​nni, a d-​yeffeɣ seg uẓar n Isḥaq. Abṛaham yuɣ ihi awal. Iṛuḥ ad yefk mmi-​s d asfel, lameɛna akken kan yekker a t-​ineɣ, lmelk n Ṛebbi iḥbes afus-​is. Ṛebbi icekkeṛ Abṛaham yellan d unṣiḥ imi iɛebbel ad yefk ayen akk ɛzizen fell-​as. Ṛebbi yesmekta-​yas-​d lemɛahdat i s-​yefka uqbel yerna iḍmen-​it belli a tent-​yesseḍru.

Umbeɛd Isḥaq yesɛa-​d sin warrac, Ɛisu (Icaɛu) akk-​d Yeɛqub. Yeɛqub ixulef gma-​s Ɛisu. Yella d win iţqadaren leḥwayeǧ yeɛnan Ṛebbi. Daɛneţţa iǧuza-​t Yahwa. Ibeddel isem-​is s win n Isṛayil (Isṛail) yerna si 12 n warraw-​is i d-​kkan 12 leɛṛac n wegdud n Isṛayil. Lameɛna, amek i tuɣal twacult-​agi d lǧens ameqran?

Atan wamek akk i d-​tebda temsalt. Azgen ameqran n warraw n Yeɛqub usmen di Yusef, gma-​tsen amecṭuḥ. Zzenzen-​t ihi d akli, dɣa wwin-​t wid i t-​yuɣen ɣer Maṣer anda yemmuger aṭas n cceddat. Acu kan, Ṛebbi iburek ilemẓi-​yagi axaṭer d unṣiḥ yerna yesɛa tirrugza. Ɣer taggara, Ferɛun yextaṛ-​it akken ad yuɣal d amḍebber ameqran. Annect-​a yeɣli-​d di lweqt ilaqen axaṭer laẓ yewwi Yeɛqub ad iceggeɛ arraw-​is a d-​aǧwen lqut si Maṣer. Yuɣ lḥal, Yusef yella d lewkil ɣef wefraq n nneɛma di tmurt-​nni. Mi gemlal neţţa d watmaten-​is, tergagi tasa-​nsen. Yusef isemmeḥ-​asen axaṭer nedmen deg wayen i xedmen. Issemsawi tagniţ akken ad ṛuḥen ad zedɣen iɛeggalen meṛṛa n twacult-​is di Maṣer, gar-​asen baba-​s yellan d amɣar. Ferɛun ifka-​yasen akal itɛeddan anda ara kemmlen ad ftin w’ad stummnen s liser. Yusef yefhem belli d Ṛebbi i gwellhen lumuṛ meṛṛa akken ad issiweḍ lemɛahdat-​is.

Yeɛqub isɛedda taggara n tudert-​is di Maṣer neţţa d wid i s-​iţţilin. M’akken yeţmeţţat, icar-​ed belli Amsellek-​nni ad yili d aneḥkam iǧehden ara d-​yeffɣen si lǧedra n mmi-​s Yahuda. Mi ɛeddan kra n iseggasen, Yusef icar-​ed, uqbel ad immet, belli Ṛebbi a d-​issufeɣ yiwen wass tawacult n Yeɛqub si Maṣer.

—Ayagi yers ɣef Laṣel n ddunit ixef wis 20 alamma d wis 50; Iɛebṛaniyen 11:17-22.