ACU ara yeḍrun lukan yiwen lǧens s lekmal-​is akk-​d uneḥkam-​is ad qeblen Yahwa ad yili d agellid yerna ad ţţaɣen awal i leqwanen-​is? D 40 n sna n leḥkem n Sliman ara d-​yerren lǧawab i westeqsi-​yagi.

Dawed yextaṛ, uqbel ad yemmet, mmi-​s Sliman akken ad yuɣal d aneḥkam deg wemkan-​is. Di yiwet n targit, Ṛebbi yeḍleb i Sliman a s-​yessuter ayen yebɣa. Sliman yeḍleb lekyasa ţ-​ţmusni akken ad yeḥkem akken i glaq ɣef wegdud. Annect-​a yeɛǧeb aṭas i Yahwa, dɣa yefka-​yas lekyasa yerna-​yas leɛqel. Iɛuhed-​as daɣen a s-​yefk ttrika, tamanegt (lɛaḍima) ţ-​ţeɣzi n leɛmeṛ ma yeţţaɣ-​as dima awal.

Ccan n Sliman yewweḍ mkul amḍiq imi iferru timsal s lekyasa. Yiwen wass, usant-​ed snat tlawin ɣur-​es s yiwen n llufan. Yal yiwet seg-​sent teqqar belli d neţţat i d yemma-​s n weqcic-​nni. Sliman yefka ihi lameṛ akken ad yeţwagzem ɣef sin, w’ad fken azgen i yiwet azgen i tayeḍ. Yiwet teqbel, ma ţ-​ţayeḍ tḥellel din din akken ad fken llufan-​nni i tmeṭṭut-​nni nniḍen. Swakka, Sliman yefhem belli ţ-​ţameṭṭut-​nni i gɣaḍ weqcic-​nni i d yemma-​s n ṣṣeḥ, dɣa yefka-​yas-​t. S lemɣawla, At Isṛayil meṛṛa yewweḍ-​iten lexbaṛ n temsalt-​agi. Steɛṛfen irkulli belli lekyasa n Yahwa tella ger ifassen n Sliman.

Yiwet ger leḥwayeǧ akk yessewhamen i gexdem Sliman d lemqam n Yahwa di Yarucalim. Lemqam-​agi d lebni yetɛeddan ara yilin d amkan n leɛbada i wat Isṛayil. Di tmeɣra i xedmen i wexxam-​agi ajdid, Sliman yenna i Ṛebbi: “Atnan igenwan s yiman-​nsen, ih igenni n igenwan, ur k-​wwin ara, xelliɛad ay axxam-​agi i k-​bniɣ!”—1 Igelliden 8:27.

Aṭas n tmura i yeslan s ccan n Sliman. Cciɛa-​s tewweḍ armi d yiwet n tgelda ibeɛden, iţţusemman tagelda n Caba, i d-​iṣebḥen di tmurt n Ɛarab. Tagelliṭ n Caba tṛuḥ akken aţ-​ţwali lɛaḍima d ttrika n Sliman yerna aţ-​ţjeṛṛeb acḥal meqqret lekyasa-​ines.Tameṭṭut-​a tedhec seg wayen i twala, dɣa teḥmed Yahwa imi yerra ɣef ukersi n lḥekma agellid ukyis am neţţa. S lbaṛaka n Yahwa, leḥkem n Sliman yethedden yerna iɛum di lxiṛ akteṛ akk n wiyaḍ seg wasmi i d-​yeflali lǧens n Isṛayil!

Acu kan, Sliman yeǧǧa leţkal-​nni yesɛa di lekyasa n Ṛebbi. Ur yeḥriz ara lqanun n Yahwa, dɣa yezweǧ neţţa d xilla n tlawin. Gar-​asent, llant waṭas i geţɛebbiden iṛebbiten ibeṛṛaniyen. Ciṭ ciṭ, tilawin-​agi ssebɛdent ul-​is ɣef Yahwa akken a t-​awint ad yeɛbed lmeṣnuɛat. Yahwa yenna-​yas ihi belli amur ameqran n tgelda-​s a s-​yeţwakkes. Kra kan si tgelda-​ya ara yeqqimen ger ifassen n twacult-​is i wudem n baba-​s. Ɣas Sliman yeǧǧa Yahwa, Yahwa yeṭṭef di lemɛahda yexdem neţţa d Dawed ɣef yiwet n tgelda.

—Ayagi yers ɣef 1 Igelliden ixef amezwaru alamma d wis 11; 2 Amezruy ixef amezwaru alamma d wis 9; Asmekti 17:17.