“DI TAZWARA, Ṛebbi ixleq-​ed igenwan d lqaɛa.” (Laṣel n ddunit 1:1) Wigi d imeslayen i ḥesben kra am lehduṛ n tazwara mechuṛen akk ɣef wiyaḍ seg wasmi i tella ddunit. S imeslayen-​agi isehlen i lefhama meɛna isɛan lhiba, Adlis Iqedsen ibeggen-​ed belli d Yahwa Ṛebbi, Bab n Tezmert, i geṭṭfen amkan yugaren akk wiyaḍ di Tira Iqedsen. Afir-​agi amezwaru issefhem-​ed belli Ṛebbi d Axellaq n leḥwayeǧ meṛṛa yellan, gar-​asent lqaɛa iɣef i neţɛici. Ifyar i t-​id-​iḍefren weṣṣfen-​d lmuddat timeqranin neɣ “ussan” yemsetbaɛen wa deffir wa. Di lmuddat-​agi, Ṛebbi yessemsawi lqaɛa akken a d-​isseḍher leɛǧayeb meṛṛa n txelqit.

Ger wayen akk i d-​ixleq Ṛebbi ɣef lqaɛa, d amdan i gellan d lemxeyyeṛ. Imi i t-​id-​ixleq Ṛebbi ɣer ccbiha-​s, izmer a d-​isbeggen ṣṣifat n Ṛebbi am leḥmala akk-​d lekyasa. Ṛebbi yemsel argaz s uɣebbar n wakal. Isemma-​yas Adam (Adem), mbeɛd issers-​it di leǧnan n Ɛidin. Ṛebbi yeẓẓa s yiman-​is lǧennet-​agi yeččuṛen d ttjuṛ yelhan i d-​iţţaken lfakyat.

Ṛebbi yeẓra belli argaz ad yeḥwiǧ tamwanest. Ihi, ixdem tameṭṭut i Adam seg yiwen yiɣes n ubeṛdi-​s. Tameṭṭut-​agi aţ-​ţeţţusemmi umbeɛd Ḥewwa. Adam yecceɛceɛ wul-​is si lfeṛḥ, dɣa iserreḥ yimi-​s d asefru: “Ţ-​ţagi i d iɣes n yeɣsan-​iw, i ţ-​ţacriḥt n tecriḥt-​iw.” Ṛebbi issefhem-​ed: “Daymi argaz ad yeǧǧ baba-​s d yemma-​s, ad ilseq ɣer tmeṭṭut-​is, dɣa ad uɣalen d yiwet n lǧeţţa.”—Laṣel n ddunit 2:22-24; 3:20.

Ṛebbi yefka i Adam d Ḥewwa sin lumuṛ. Di tazwara, inna-​yasen ad xedmen lqaɛa, a d-​lhun deg-​s w’a ţ-​ččaṛen d dderya. Umbeɛd, inna-​yasen ur teţţen ara seg yiwet ger ttjuṛ meṛṛa n leǧnan-​nni, yeɛni “ttejṛa n tmusni n lxiṛ akk-​d cceṛ.” (Laṣel n ddunit 2:17) Ma ɛuṣan lumuṛ-​agi, ad mmten. Acuɣer i gefka Ṛebbi lumuṛ-​agi i Adam d Ḥewwa? Akken a d-​beggnen belli qeblen awelleh-​ines. S tiɣin n wawal-​nsen a d-​sseknen daɣen leḥmala-​nsen d westeɛṛef-​nsen. Sɛan aṭas n ssebbat ara ten-​idemmren ad qeblen leḥkem-​ines yeččuṛen d leḥmala! Adam d Ḥewwa kemlen, ur sɛin ula d yiwen n lexṣaṣ. Adlis Iqedsen yenna-​d daɣneţţa: “Ṛebbi iwala belli ayen akk yexdem, yerna muqlet, d ayen yelhan nezzeh.”—Laṣel n ddunit 1:31.

—Ayagi yers ɣef Laṣel n ddunit ixef amezwaru d wis sin.