Ay atmaten ţ-ţyessetmatin ɛzizen,

D leḥmala-nneɣ i Ṛebbi akk-d leḥmala-nneɣ i lɣaci i ɣ-yeţţawin ‘a nṛuḥ a nerr leǧnas d inelmaden w’a ten-nesseɣḍeṣ’ (Matta 28:19, 20; Mar. 12:28-31). Leḥmala tesɛa tazmert tameqrant. Teţḥaz ulawen n “wid yesɛan lɛeqliya iwulmen bac a ten-id-tṣaḥ tudert n dayem” (Lec. 13:48, Ṭrejma n ddunit tajdiṭ, s tṛumit).

Zik, nella nḥeffeḍ d acu ara d-nini swaswa deg uberreḥ yerna nxeddem lmeǧhud bac a neţţaǧǧa tizmamin. Ass-a, neţnadi akteṛ a nehdeṛ d lɣaci. M’ara sen-nheddeṛ ɣef wayen i sen-iɛeǧben d wayen i ten-iceɣben, neţbeggin-asen-d belli nḥemmel-iten. Ɣef wayagi i glaq a neţţarra ddehn-nneɣ ɣer wayen yeḥwaǧ yal yiwen. Daɣneţţa, deg wayagi swaswa ara ɣ-tɛiwen tezmamt-agi.

Di tezmamt-agi, a nwali 12 n ṣṣifat ara ɣ-iɛiwnen a d-neţbeggin i lɣaci belli nḥemmel-iten yerna nebɣa ad uɣalen ula d nutni d inelmaden n Ɛisa. Di yal timeɣri, a nwali amek i d-ibeggen Ɛisa neɣ Bulus neɣ Filibus, yiwet si ṣṣifat-agi. Tazmamt-agi ur teţwaxdem ara bac a neḥfeḍ swaswa d acu ara d-nini m’ara neţberriḥ. Teţwaxdem bac a nẓer amek ara a d-nesbeggin leḥmala i wiyaḍ. Xas akken neḥwaǧ yal yiwet si ṣṣifat-agi di leqdic-nneɣ n uberreḥ, a nwali belli kra seg-sent a ɣ-ɛiwnent bac a nebdu lhedṛa d walbeɛḍ, kra nniḍen bac a nerzu ɣef walbeɛḍ, tiyaḍ bac a nesselmad Adlis Iqedsen.

Mkul m’ara tessenqdem timeɣri, meyyzet mliḥ ɣef wamek i tzemrem a d-tbeggnem ṣṣifa yellan deg-s i wid umi i teţberriḥem. Ţnadit qbel kulci amek ara tḥemmlem akteṛ Yahwa akk-d lɣaci. Leḥmala-yagi, yugaren kra yellan ţ-ţamusni d lefhama, a ken-tɛiwen aţ-ţerrem lɣaci d inelmaden.

D lemzeyya tameqrant i ɣ-yeţţunefken imi i nqeddec ɣef Yahwa ɣer tama-nwen (Ṣafan. 3:9). Nessaram a ken-ibarek Yahwa. Neṭṭalab-as a ken-iɛiwen iwakken a d-teţbegginem leḥmala i wiyaḍ w’aţ-ţerrem lɣaci d inelmaden!