1, 2. Ayɣer i ɣ-​ilaq a neḥseb taẓallit d lemzeyya tameqrant? Acimi i neḥwaǧ a nefhem ayen yesselmad Wedlis Iqedsen fell-​as?

 GER leḥwayeǧ timeqranin i d-​yexleq Ṛebbi, lqaɛa teţban-​ed ţ-​ţamecṭuḥt. Ɣer Yahwa, yeɛni “Win ixedmen igenwan akw-​d lqaɛa”, leǧnas atnan am tiqit (tquddirt) n waman di lḥila. (Ahellil 115:15; Icɛaya 40:15) Ɣas akken, Adlis Iqedsen yenna-​d: “[Yahwa] iţţili ɣer tama n wid i neddhen ɣur-​es, n wid yeţɛennin ɣur-​es seg wul. Iţeddu di lebɣi i wid i t-​iţţagwaden, isell-​ed i tiɣri-​nsen.” (Ahellil 145:18, 19) Terriḍ lbal-​ik ɣer lmeɛna n imeslayen-​a? Axellaq s timmad-​is, Bab n Tezmert, ad yili ɣer tama-​nneɣ yerna a ɣ-​d-​iḥess ma ‘neţɛenni ɣur-​es seg wul.’ D lemzeyya tameqrant imi nezmer a s-​neẓẓall!

² Acu kan, ma nebɣa a ɣ-​d-​iḥess Yahwa, yewwi-​d a s-​neẓẓall akken i s-​yeɛǧeb. Amek i nezmer a nexdem annect-​a m’ur nefhim ara ayen yesselmad Wedlis Iqedsen ɣef tẓallit? Ilzem a nefhem ayagi, axaṭer taẓallit teţɛawan-​aɣ a nqerreb ɣer Yahwa.

3. Bder-​ed yiwet n ssebba tameqrant iɣef i glaq a neẓẓall i Yahwa.

³ Aţţan ssebba tameqrant iɣef i glaq a neẓẓall i Yahwa: d neţţa s yiman-​is i ɣ-​t-​id-​yeṭṭalaben. Awal-​is iţweṣṣi-​yaɣ, yeqqar-​aɣ-​d: “Ur ţḥebbiṛet ɣef wacemma, meɛna di yal  lḥaǧa, ssutret ayen teḥwaǧem i Sidi Ṛebbi s tẓallit, s uḥellel akk-​d leḥmadi; imiren lehna n Sidi Ṛebbi i gugaren yal tamusni, aţ-​ţeḥrez ulawen-​nwen d ixemmimen-​nwen di Ɛisa Lmasiḥ.” (Ifilibiyen 4:6, 7, Awal n tudert, 2001) Ur ilaq ara ihi a nestehzay di ţţawil-​agi i ɣ-​d-​yefka s leḥmala Ssid ameqran n ddunit!

4. Amek ara ǧehdent lɛalaqat i nesɛa akk-​d Yahwa ma neţẓalla daymen?

⁴ M’ara neţẓalla daymen, nesseǧhad lɛalaqat-​nneɣ d Yahwa; tagi d ssebba nniḍen iɣef i glaq a neţẓalla. Iḥbiben n ṣṣeḥ ur heddṛen ara kan lwaḥid m’ara ḥwiǧen lḥaǧa; meɛna, wa yeţḥebbiṛ ɣef wa yerna, skud heddṛen wway gar-​asen ɛinani ɣef wayen i ţxemmimen, ɣef wayen i ten-​iceɣben d wayen i ţḥussun, skud teţţiǧhid tdukli-​nsen. Nezmer a d-​nini belli, di kra n leḥwayeǧ, lɛalaqat i nesɛa akk-​d Yahwa Ṛebbi ţţemcabint ɣer liḥala-​yagi. S tektabt-​a, yellan ger ifassen-​ik, tḥefḍeḍ xilla ɣef wayen yesselmad Wedlis Iqedsen ɣef Yahwa, ɣef ccexṣiyya-​ines d lmeqsud-​is. Tfehmeḍ-​d belli yella d Win ukud i tzemreḍ aţ-​ţesɛuḍ lɛalaqa. Taẓallit teţţak-​ak tagniţ a s-​teḥkuḍ i Baba-​k n  igenwan ayen i teţxemmimeḍ d wayen i teţḥussuḍ deg wul-​ik. Akka, aţ-​ţizmireḍ aţ-​ţqerrbeḍ ɣer Yahwa.—Yeɛqub 4:8.

5. Acu i d-​ibeyynen belli ur yeţḥessis ara Yahwa i tẓilla meṛṛa?

⁵ Iţḥessis Yahwa i yakk tiẓilla (tiẓalliwin)? Ẓer d acu i genna i wat Isṛayil imɛuṣa di zzman n nnbi Icɛaya: “Ɣas teţkettiṛem taẓallit, ur d-​ţḥessiseɣ ara: Ifassen-​nwen umsen d idammen.” (Icɛaya 1:15) Ihi, kra si lefɛayel-​nneɣ zemren ad demmren Ṛebbi akken ur iţḥessis ara i tẓilla-​nneɣ. Bac a tent-​yeqbel, ilaq a netbeɛ kra n ccuruṭ.

6. Bac a d-​iḥess Ṛebbi i tẓilla-​nneɣ, anwa i d ccerṭ amezwaru i ɣ-​ilaq a netbeɛ, yerna amek i nezmer a nessiweḍ ɣer waya?

⁶ Atan ccerṭ amezwaru: ilaq a nesɛu liman. (Ɣer-​ed Marqus 11:24.) Yekteb Wemceggeɛ Bulus: “Mebla liman, d lmuḥal ad iɛǧeb yiwen i Yillu, axaṭer win ara iqerrben ɣer Yillu ilaq ad yamen belli yella yerna yeţǧazi wid yeţnadin fell-​as.” (Iɛebṛaniyen 11:6) Ma nesɛa liman aḥeqqani ur neţţamen ara kan belli yella Ṛebbi, belli yeţḥessis i tẓilla yerna yeţţarra-​d fell-​asent lǧawab. Liman iţban-​ed s lefɛayel. Ilaq-​aɣ ihi a d-​nessken di temɛict-​nneɣ n yal ass belli nesɛa liman.—Yeɛqub 2:26.

7. a) Iwacu i ɣ-​ilaq a nheddeṛ i Yahwa s leqder? b) Amek i nezmer a d-​nbeyyen belli neţẓalla s wannuz yerna seg wul yeṣfan?

⁷ Yahwa iṭṭalab-​aɣ-​d daɣen a s-​neţẓalla s wannuz akk-​d ṣṣfawa n wul. Llant xilla n ssebbat ɣef waydeg i glaq a nesɛu annuz m’ara s-​nheddeṛ di tẓallit, neɣ ala? Lukan ad yessiweḍ ad yehdeṛ walbeɛḍ i yiwen ugellid neɣ i yiwen uselway, bla ccekk ad yexdem ayagi s leqder imi sɛan amḍiq ɛlayen. Abeɛda Yahwa! Yestahel akteṛ a s-​nehdeṛ s leqder. (Ahellil 138:6) D ṣṣeḥ, Yahwa d Ṛebbi “Anezmar.” (Laṣel n ddunit 17:1) M’ara s-​neţẓalla, ilaq a d-​neţbeggin deg imeslayen-​nneɣ belli nesteɛṛef s wannuz s wemkan-​is  ɛlayen. Annuz a ɣ-​idemmer daɣen a s-​neẓẓall seg wul yeṣfan, bla ma neţɛawad-​ed dima i imeslayen, amzun d lɛadda kan. Ɛisa yenna-​d: “M’ara teţẓallam, ur d-​ţɛawadet ara dima i lehduṛ.”—Matta 6:7, 8, Ṭrejma n ddunit tajdiṭ (s tṛumit).

8. Amek i nezmer a neddu ɛlaḥsab n tẓilla-​nneɣ?

⁸ Ṛebbi icreḍ-​ed daɣen seg-​neɣ a nteddu ɛlaḥsab n tẓilla-​nneɣ bac a ɣ-​d-​iḥess. Yahwa yebɣa a nexdem ayen akk umi nezmer bac a neddu ɛlaḥsab n wayen i s-​neṭṭalab di tẓallit. Ɣef lemtel, ma nenna-​yas: “Efk-​aɣ-​d ass agi talqimt-​nneɣ n weɣrum i wass agi”, yelzem fell-​aneɣ a nexdem akken ilaq mkul d ṣṣenf n lxedma ara d-​naf, awi-​d kan a s-​nizmir. (Matta 6:11; 2 Itisalunikiyen 3:10) Ma yella neḍleb-​as a ɣ-​iɛiwen a nexḍu i yir ccehwa, yewwi-​d a nessebɛed iman-​nneɣ ɣef liḥalat ara ɣ-​yesseɣlin deg ujeṛṛeb. (Ikulusiyen 3:5) Tura mi d-​nwala ccuruṭ-​agi i ɣ-​ilaq a netbeɛ, iwulem a nẓer kra n leǧwab ɣef yesteqsiyen icudden ɣer tẓallit.

9. I menhu i glaq a neţẓalla, yerna s yisem n wanwa?

⁹ I menhu i glaq a neţẓalla? Ɛisa yesseḥfeḍ i inelmaden-​is ad ţẓallan i “Baba-[tsen] yellan deg igenwan.” (Matta 6:9) Ilaq-​aɣ ihi a neţẓalla ḥaca i Yahwa Ṛebbi. Acu kan, yeṭṭalab-​aɣ-​d a nesteɛṛef s wemkan n Mmi-​s awḥid, Ɛisa Lmasiḥ. Akken i t-​neɣra deg yixef wis 5, Ɛisa iţţuceggeɛ-​ed ɣer lqaɛa akken ad yeţţunefk d lefdiya bac a ɣ-​d-​icafeɛ si ddnub d lmut. (Yuḥenna 3:16; Iṛumaniyen 5:12) Ɛisa d Lmuqeddem Ameqran yerna d Lqaḍi i gesbedd Ṛebbi. (Yuḥenna 5:22; Iɛebṛaniyen 6:20) Ɣef wannect-​a i ɣ-​d-​ṭṭalabent Tira Iqedsen a neţẓalla s yisem n Ɛisa. Neţţa s yiman-​is yenna-​d: “Nekk, d abrid, ţ-​ţideţ, ţ-​ţudert. Yiwen ur iţɛeddi ɣer Ubabat, siwa yis-​i.” (Yuḥenna 14:6) Bac ad  ţwaqeblent ihi tẓilla-​nneɣ, ilaq a neţẓalla siwa i Yahwa, s yisem n Mmi-​s.

10. Ayɣer i nezmer a neẓẓall ama s ibeddi neɣ s iɣimi, ama akken nniḍen?

¹⁰ Yella wamek i glaq a neqqim bac akken a neẓẓall? Ala. Yahwa ur d-​yecriḍ ara amek ara nexdem i ifassen-​nneɣ neɣ i lǧeţţa-​nneɣ s lekmal-​is. Adlis Iqedsen isselmad belli nezmer a neẓẓall s iɣimi, nezmer a neknu, a neɣli ɣef tgecrar, a neẓẓall s ibeddi, neɣ akken nniḍen. (1 Amezruy 17:16; Naḥamya 8:6; Danyil 6:11; Marqus 11:25) Ayen yesɛan lqima, mačči d ayen ara d-​ẓren medden, meɛna d liḥala n wulawen-​nneɣ. Di lecɣal i nxeddem yal ass neɣ di teswiɛin iweɛṛen, nezmer a neẓẓall deg wulawen-​nneɣ kan, yerna anda nebɣu nili. Yahwa iţḥessis-​ed i tẓilla am tigi, ɣas akken ur ɣ-​d-​sellen ara maḍi wid i ɣ-​d-​yezzin.—Naḥamya 2:1-6.

11. Anti leḥwayeǧ i ɣ-​yeɛnan iɣef i nezmer a neẓẓall?

¹¹ Anti leḥwayeǧ iɣef i nezmer a neẓẓall? Atan wayen i d-​issefham Wedlis Iqedsen: “Ma nessuter-​as [i Yahwa] kra yellan d lebɣi-​s, iţḥessis-​aɣ-​d.” (1 Yuḥenna 5:14) Nezmer ihi a neẓẓall ɣef yal lḥaǧa, awi-​d kan aţ-​ţili teɛdel akk-​d lebɣi n Ṛebbi. Yella-​yas di lebɣi a s-​nheddeṛ ɣef iɣeblan-​nneɣ? Ih! Nezmer a s-​neldi ulawen-​nneɣ bla ma nsetḥa, am wakken i weḥbib iwumi i nheddeṛ. (Ahellil 62:9) Ilha a s-​neṭṭalab a ɣ-​d-​yefk ṛṛuḥ-​is iqedsen ara ɣ-​iɛiwnen a nexdem ayen yellan d lewqam. (Luqa 11:13) Nezmer daɣen a nessuter i Ṛebbi a ɣ-​iwelleh bac a neţţaṭṭaf leqrarat s lekyasa, neɣ a s-​nessuter a ɣ-​d-​yefk tazmert iwakken a nqabel cceddat. (Yeɛqub 1:5) M’ara nedneb, iwulem a s-​neḍleb a ɣ-​isemmeḥ s wesfel n Ɛisa. (Ifasusiyen 1:3, 7) Lameɛna, di tẓilla-​nneɣ, ur d-​yewwi ara lḥal a nheddeṛ kan ɣef wayen i ɣ-​yeɛnan nekni. Yelha a d-​nebder iɛeggalen n twacult-​nneɣ d yerfiqen-​nneɣ imasiḥiyen akk-​d lɛibad nniḍen.—Lecɣal 12:5; Ikulusiyen 4:12.

12. Di tẓilla-​nneɣ, amek ara nefk amkan amezwaru i wayen yeɛnan Baba-​tneɣ n igenwan?

 ¹² Ayen yeɛnan Yahwa, ilaq ad yili d amezwaru di tẓilla-​nneɣ. Nesɛa ssebbat ɣef waydeg ara t-​neḥmed seg wul w’a t-​ncekkeṛ ɣef leḥmala-​ines. (1 Amezruy 29:10-13) Di Matta 6:9-13, Ɛisa yeǧǧa-​d lemtel n tẓallit. Yenna-​d a neṭṭalab ad iţwaqeddes yisem n Ṛebbi, yeɛni ad iţwaḥseb yeṣfa. (Ɣer-​it-​id.) Ibder-​ed umbeɛd tisin n Tgelda akk-​d lebɣi n Ṛebbi ara yeḍrun ɣef lqaɛa akken yeḍra deg igenwan. Almi i d-​immeslay Ɛisa ɣef temsal-​agi timeqranin yeɛnan Yahwa, i d-​ihdeṛ ɣef lmeḥwiǧat n win ara yeẓẓallen. Am neţţa, ma neţţarra Ṛebbi d amezwaru di tẓilla-​nneɣ, a d-​nessken belli ur neţxemmim ara kan ɣef nnfeɛ-​nneɣ.

13. Ɛlaḥsab n Wedlis Iqedsen, acḥal n lweqt i glaq ad ṭṭfent tẓilla-​nneɣ bac a tent-​yeqbel Ṛebbi?

¹³ Acḥal n lweqt i glaq ad kkent tẓilla-​nneɣ? Adlis Iqedsen ur d-​yenni ara acḥal n lweqt ara kkent tẓilla ara nexdem weḥḥed-​neɣ neɣ akk-​d lɣaci. Zemrent ad ilint wezzilit (ţ-​ţimecṭaḥ) uqbel lmakla, ɣezzifit m’ara nleddi ulawen-​nneɣ i Yahwa. (1 Camwil 1:12, 15) Acu kan, Ɛisa ibeggen-​ed belli ur yeqbil ara wid iḥesben iman-​nsen d iḥeqqiyen yerna yesseɣzafen tiẓilla-​nsen zdat n wiyaḍ. (Luqa 20:46, 47) Tiẓilla am tigi ur ɛeǧǧbent ara i Yahwa. Ayen yesɛan lqima, ţ-​ţaẓallit ara d-​yekken seg wul. Ihi, taẓallit ara yeqbel Ṛebbi tezmer aţ-​ţili ţ-​ţamecṭuḥt neɣ ţ-​ţameqrant ɛlaḥsab n lmeḥwiǧat-​nneɣ akk-​d liḥala ideg ara nili.

14. Acu i d lmeɛna-​s a ‘neţẓalla mebla aḥbas’, yerna acimi i ssefṛaḥen imeslayen-​agi?

¹⁴ Acḥal n iberdan i glaq a neţẓalla? Adlis Iqedsen yeţweṣṣi-​yaɣ a ‘neţẓalla dayem’, a ‘ndum di tẓallit’ yerna a ‘neţẓalla mebla aḥbas.’ (Luqa 18:1; Iṛumaniyen 12:12; 1 Itisalunikiyen 5:17) S imeslayen-​agi, ur yebɣi ara a d-​yini  Wedlis Iqedsen belli ilaq a neţẓalla ass kamel, ur nḥebbes ara maḍi. Yeţweṣṣi-​yaɣ kan a neţẓalla daymen, a neţcekkiṛ Yahwa imi ɣ-​iḥemmel, yerna a neţqellib ɣef lewṣayat-​ines, ɣef uṣebber-​ines d lqewwa-​ines. Nefṛeḥ mliḥ imi ur d-​yenni ara Yahwa acḥal n lweqt ara kkent tẓilla-​nneɣ wala acḥal iberdan i nezmer a s-​neẓẓall! Ma neţţak s ṣṣeḥ lqima i tẓallit, a d-​naf aṭas n teswiɛin ideg ara nehdeṛ i Baba-​tneɣ n igenwan.

15. Ayɣer i glaq a d-​neqqar “amin” ɣer taggara n tẓallit ara d-​nini weḥḥed-​neɣ neɣ ara d-​iţţunefken zdat n wiyaḍ?

¹⁵ Acuɣer i gelzem a d-​neqqar “amin” m’ara tfakk tẓallit? Awal-​agi “amin” lmeɛna-​s “bla ccekk” neɣ “a d-​yeḍru waya.” Lemtul yellan deg Wedlis Iqedsen ţwerrin-​d belli iwulem a d-​neqqar “amin” ɣer taggara n tẓallit ara d-​nini weḥḥed-​neɣ neɣ akk-​d wiyaḍ. (1 Amezruy 16:36; Ahellil 41:14) M’ara d-​nini “amin” ɣer taggara n tẓallit-​nneɣ, a d-​nbeyyen belli nehdeṛ-​ed seg wul yeṣfan. M’ara d-​nini “amin” deg wul-​nneɣ kan neɣ s taɣect ɛlayen, ɣer taggara n tẓallit ara d-​iţţunefken zdat n wiyaḍ, a d-​nessken belli neqbel ixemmimen i d-​iţţuqeddmen deg-​s.—1 Ikurintiyen 14:16.

16. Acu n ţţeḥqiq i nesɛa deg wayen yeɛnan taẓallit?

¹⁶ Dɣa d ṣṣeḥ Yahwa yeţţarra-​d leǧwab ɣef tẓilla-​nneɣ? Ih, mebla yakk ccekk! Nesɛa lebyan iṣeḥḥan belli “Win i d-​isellen i tẓilla” yeţţarra-​d leǧwab i imelyan n lɛibad i geţẓallan seg wul yeṣfan. (Ahellil 65:3) Acu kan, mkul tikkelt amek ara yili leǧwab-​agi.

17. Ayɣer i nezmer a d-​nini belli Ṛebbi yessexdam lmuluk-​is akk-​d iqeddacen-​is ɣef lqaɛa bac a d-​iǧaweb i tẓilla?

¹⁷ Yahwa yessexdam lmuluk-​is akk-​d iqeddacen-​is ɣef lqaɛa bac a d-​iǧaweb i tẓilla. (Iɛebṛaniyen 1:13, 14) Mačči d yiwen i geẓẓullen yakan bac ad yefhem Adlis Iqedsen, i  d-​yemmugren yiwen seg iqeddacen n Yahwa kra n lweqt kan umbeɛd. Ayagi ibeyyen-​ed belli lmuluk ţwellihen abecceṛ n Tgelda. (Aweḥḥi 14:6) Di teswiɛt ideg i neḥwaǧ mliḥ lemɛawna, m’ara neẓẓall i Yahwa, yessexdam tikwal yiwen umasiḥi ara ɣ d-​yefken lemɛawna-​yagi.—Lemtul 12:25; Yeɛqub 2:16.

18. Amek i gessexdam Yahwa ṛṛuḥ-​is iqedsen akk-​d Wawal-​is akken a d-​iǧaweb ɣef tẓilla n iqeddacen-​is?

¹⁸ Yahwa Ṛebbi iţǧawab-​ed daɣen ɣef tẓilla n  iqeddacen-​is s ṛṛuḥ-​is iqedsen akk-​d Wawal-​is. Iwakken a d-​yerr lǧawab i tẓilla i s-​nxeddem m’ara nili deg ujeṛṛeb, yezmer ad issexdem ṛṛuḥ-​is iqedsen bac a ɣ-​iwelleh w’a ɣ-​d-​yefk lǧehd. (2 Ikurintiyen 4:7) Neţţaf daɣen acḥal d abrid lǧawab i tẓilla-​nneɣ deg Wedlis Iqedsen. Ɣef lemtel, m’ara neṭṭalab i Yahwa a ɣ-​iwelleh di temɛict-​nneɣ, issexdam adlis-​agi bac a ɣ-​iɛiwen a neţţaṭṭaf leqrarat n lɛali. Nezmer a d-​naf ayen i ɣ-​iwulmen m’ara nessenqad Adlis Iqedsen neɣ m’ara neqqar tiktabin ireṣṣan fell-​as, am tagi yellan ger ifassen-​ik. Ixemmimen i neḥwaǧ, i d-​ikkan seg Wedlis Iqedsen, zemren a ɣ-​d-​ţţunefken s wayen ara d-​iţwahedṛen deg yiwen unejmuɛ amasiḥi; zemren daɣen a d-​asen sɣur walbeɛḍ n lecyux n tejmaɛt ara ɣ-​d-​ifken kra n ṛṛay, imi i geţḥebbiṛ fell-​aneɣ.—Igalatiyen 6:1.

19. D acu ur nlaq ara a neţţu ma yella iban-​ed amzun ulac leǧwab ɣef tẓilla-​nneɣ?

¹⁹ Ma iban-​ed am wakken Yahwa iɛeṭṭel bac a d-​iǧaweb ɣef tẓilla-​nneɣ, mačči ţ-​ţazmert ur yezmir ara ad yexdem ayagi. Ur nteţţu ara belli yeţǧawab-​ed ɛlaḥsab n lebɣi-​ines yerna di lweqt ilaqen. Yeẓra xiṛ-​nneɣ lmeḥwiǧat-​nneɣ d wamek ara ɣ-​tent-​id-​yefk. Yezga yeţţaǧǧa-​yaɣ lweqt ‘a nessuter, a nnadi w’a nesṭebṭeb.’ (Luqa 11:5-10) Ma yella  neţkemmil neţẓalla, a s-​d-​nbeyyen belli nebɣa, yerna numen s ṣṣeḥ a d-​iḍru wayen i s-​neṭṭalab. Tikwal daɣen ur nfehhem ara din din amek i d-​iţǧawab Yahwa ɣef tẓilla-​nneɣ. Di lemtel, ma neḍleb-​as a ɣ-​iɛiwen di kra n ccedda, amek i gezmer a ɣ-​d-​iǧaweb? Ahat ur iţekkes ara ccedda-​yagi, meɛna a ɣ-​d-​yefk kan lqewwa akken a ţ-​neɣleb.—Ɣer-​ed Ifilibiyen 4:13.

20. Ma neţẓalla daymen, acu ara ɣ-​d-​yawi wayagi?

²⁰ Ur nefṛiḥ ara imi yella Uxellaq n igenwan d lqaɛa ɣer tama n wid akk i s-​yeţẓallan akken ilaq? (Ɣer-​ed Ahellil 145:18.) Yewwi-​d a neţẓalla daymen, imi d lemzeyya ifazen i ɣ-​d-​yefka Yahwa! Akka, a nizmir a nessirem a nili dima neqreb akteṛ ɣer Yahwa, Win i d-​isellen i tẓilla.