Tiḥila n wat Gibɛun
TAQSIṬ TIS 48
Tiḥila n wat Gibɛun
AṬAS n temdinin n Kanɛan i gessewjden iman-nsent ad nnaɣent tura d Isṛayil. Imezdaɣ n temdinin-agi ɣilen zemren ad rebḥen. Lameɛna wid n temdint n Gibɛun, ur nebɛid ara ɣef Isṛayil, ur ţxemmimen ara akka. Steɛṛfen belli d Ṛebbi i geţnaɣen ɣer tama n wat Isṛayil. Imi ur bɣin ara ad xaṣmen Ṛebbi, xedmen yiwet n lḥaǧa. Teẓriḍ d acu-ţ?
At Gibɛun steɛmlen belli zedɣen deg yiwet n tmurt ibeɛden aṭas. Ihi kra n yergazen lsan llebsa yesɛan tifawtin d yerkasen iqdimen. Ɛebban i yeɣyal-nsen icwariyen iqdimen yerna wwin yid-sen aɣrum yeqquren. Imiren ṛuḥen ɣer Yacuɛa, nnan-as: ‘Nusa-d si tmurt ibeɛden axaṭer nesla s Ṛebbi-nwen ɛlayen Yahwa. Nesla s leḥwayeǧ meṛṛa i wen-yexdem di Maṣer. Ihi, fkan-aɣ-d lameṛ ineḥkamen-nneɣ a neddem aɛwin i webrid w’a d-nṛuḥ a wen-nini: “Aql-aɣ d iqeddacen-nwen. Ɛahdet-aɣ tura ur teţnaɣem ara yid-nneɣ.” Walit, llebsa-nneɣ teḥfa si tikli i d-nelḥa aṭas, aɣrum-nneɣ atan d aquran yerna yerɣel (yeɣmel).’
Yacuɛa d imeqranen n wegdud umnen At Gibɛun. Dɣa ɛuhden-ten belli ur ţnaɣen ara yid-sen. Lameɛna, mi ɛeddan tlata wussan, iwweḍ-iten-id lexbaṛ belli ur yebɛid ara wanda i zedɣen wat Gibɛun.
Yacuɛa yesteqsa-ten: ‘Ayɣer i yi-d-tennam belli tusam-d si tmurt ibeɛden?’
At Gibɛun rran-as: ‘Nkellex-ikkun axaṭer nesla belli iɛuhed Ṛebbi-nwen Yahwa a wen-yefk tamurt-agi n Kanɛan. Nexdem annect-a axaṭer nugad a ɣ-tenɣem.’ At Isṛayil ṭṭfen deg wawal-nsen, ur nɣin ara At Gibɛun. Lameɛna rran-ten d iqeddacen-nsen.
Mi gesla ugellid n Yarucalim belli At Gibɛun xedmen lehna nutni d wat Isṛayil, yezɛef aṭas. Ihi yenna i ṛebɛa igelliden nniḍen: ‘Eyyaw a yi-tɛiwnem a neẓdem ɣef wat Gibɛun.’ D ayen i xedmen igelliden-a di xemsa yid-sen. Ihi, At Gibɛun d ukyisen i llan m’akka xedmen lehna nutni d wat Isṛayil, lehna i sen-d-yewwin tura ccwal? D ayen ara nwali.
