TAQSIṬ TIS 34

Rreẓq n igenni

TZEMREḌ a d-​tiniḍ acu akka jemmɛen lɣaci-​yagi si lqaɛa? D lḥaǧa yecban agris. D amellal, d arqaq am umeččim. Lameɛna mačči d agris; d lḥaǧa yeţmeččan.

Qrib aggur ayagi seg wasmi i d-​ffɣen wat Isṛayil si Maṣer. Atnan tura deg uneẓruf. Imi drus n lqut i d-​iţţemɣin dinna, agdud yebda iţcetki, yeqqar: ‘Ah lukan i ɣ-​yenɣi Yahwa di Maṣer axiṛ. Dinna xerṣum nesɛa lqut s tawant.’

Yahwa yenna-​yasen ihi: ‘A wen-​d-​fkeɣ lqut seg igenni, a d-​iwet am ugeffur.’ D ayen i gexdem Yahwa. Azekka-​nni ṣṣbeḥ, mi walan wat Isṛayil lḥaǧa-​yagi tamellalt i d-​yeɣlin seg igenni, bdan ţmesteqsayen wway gar-​asen, qqaren: ‘D acu-​t wagi?’

Musa yerra-​yasen: ‘D lqut i wen-​d-​yefka Yahwa a t-​teččem.’ Agdud isemma-​yas TAMANA. Lbenna-​s am teḥbulin yesɛan tament.

Musa yenna-​yasen: ‘Yal yiwen seg-​wen a d-​ijmeɛ kan ayen ara yečč.’ D ayen i xedmen wat Isṛayil mkul ṣṣbeḥ. Umbeɛd m’ara yeḥmu yiṭij, ayen i d-​iţɣimin ɣef lqaɛa ifeţţi meṛṛa.

Musa yenna-​yasen daɣen: ‘Ɣur-​wat win ara yeffren seg-​s i ṣṣbeḥ.’ Lameɛna llan kra n yemdanen ur ḥessen ara. Tebɣiḍ aţ-​ţeẓreḍ acu yeḍran? Azekka-​nni, tamana meṛṛa i ǧǧan i ṣṣbeḥ yekker deg-​s uwekkiw, tebda teţfuḥu.

Lameɛna, yiwen wass di dduṛt, ilaq-​as i wegdud ad yejmeɛ sin imuren n tmana. D ass wis seţţa. Yenna-​yasen Yahwa ad rren deg idis amur i wass i d-​iteddun, axaṭer ulac ayen ara d-​yeɣlin ass wis sebɛa. M’ara ǧǧen amur i wass wis sebɛa, ur itekker deg-​s uwekkiw ur yeţfuḥu! Ayagi d lbeṛhan nniḍen!

Iseggasen meṛṛa i qqimen wat Isṛayil deg uneẓruf, Yahwa issečč-​iten s tmana.

Tuffɣa 16:1-36; Aneẓruf 11:7-9; Yacuɛa 5:10-12.