Di tesraft n yizmawen
TAQSIṬ TIS 79
Di tesraft n yizmawen
ATAN waqila Danyil di yir liḥala! Lameɛna akken i teţwaliḍ, izmawen-agi ur s-xdimen acemma! Teẓriḍ acuɣer? Anwa i gḍeggren nnbi Danyil ɣer tesraft-agi? D ayen ara nwali tura.
D Daryabic i gellan tura d agellid n Babil. Agellid-agi iḥemmel aṭas Danyil axaṭer yelha yerna d ukyis. Ɣef waya i t-yerra d aneḥkam ameqran di tgelda-s. Lameɛna aṭas i gusmen di Danyil axaṭer ɛziz ɣer Daryabic. Ihi, sani i ten-wwint tismin-nsen?
Mi msefhamen yemcumen-agi wway gar-asen, ṛuḥen ɣer Daryabic, nnan-as: ‘Ay agellid, yelha ma tessufɣeḍ-d yiwen n lqanun ara d-yinin belli deg wazal n 30 wussan, kra n win ara yedɛun ɣer uṛebbit neɣ ɣer wemdan nniḍen, siwa ɣer ɣur-ek, ad iţţuḍegger ɣer tesraft n yizmawen.’ Daryabic ur yeẓri ara acuɣer i bɣan lqanun-agi. Lameɛna yura-t axaṭer iɛǧeb-as uxemmem-nsen. Tura ur yezmir ḥedd a t-ibeddel.
Mi gesla Danyil belli yeffeɣ-ed lqanun-agi ajdid, iṛuḥ s axxam-is ad iẓẓall Yahwa akken yuɣ tannumi. Iɛdawen n Danyil ẓran belli ur yeţţaǧǧa ara taẓallit. Tura feṛḥen axaṭer nwan yeɣli di tceṛkeţ-nsen.
Agellid Daryabic iɣaḍ-it lḥal mi gefhem anwa i gḥuza lqanun-agi. Lameɛna ur yezmir ara a t-ibeddel. Yumeṛ ihi ad ḍeggren Danyil ɣer tesraft n yizmawen. Meɛna, agellid yenna i Danyil: ‘Ţmenniɣ a k-isellek Ṛebbi i teţɛebbideḍ.’
Daryabic yetqelleq aṭas deg yiḍ-nni armi i s-iṛuḥ yiḍeṣ. Azekka-nni ṣṣbeḥ yuzzel ɣer tesraft-nni n yizmawen. Twalaḍ-t di ţţeswiṛa-ya? Sennig n tesraft-nni iɛeggeḍ: ‘A Danyil, ay aqeddac n Ṛebbi yeddren! Isellek-ik seg yizmawen Ṛebbi i teţɛebbideḍ?’
Danyil yerra-yas: ‘Ṛebbi iceggeɛ-ed lmelk-is akken ad yeɣleq imawen n yizmawen, daymi ur iyi-ččin ara.’
Mi gesla ugellid i imeslayen-agi, yefṛeḥ aṭas. Yeḍleb a d-ssufɣen Danyil si tesraft-nni, yerna yumeṛ ad ḍeggren ɣur-es imcumen-nni i gebɣan lmut-is. Werɛad wwiḍen ɣer lqaɛ n tesraft-nni mi ten-ḥewṣen yizmawen yerna rẓan akk iɣsan-nsen.
Yuɣal Daryabic yura i wid akk yellan ddaw leḥkem-is: ‘Qadret Ṛebbi n Danyil i gxedmen leɛǧayeb imeqranen. Isellek-it-id seg yizmawen.’
