Agellid aneggaru yelhan
TAQSIṬ TIS 73
Agellid aneggaru yelhan
YUCYAHU yesɛa kan tmanya iseggasen di leɛmeṛ-is asmi i guɣal d agellid n sin leɛṛac n usammer. Imi meẓẓi maḍi, ɛawnen-t di tazwara yergazen iccurfen akken ad iḥkem ɣef wegdud.
Deg useggas wis tmanya n leḥkem-is, Yucyahu yebda yeţnadi ɣef Yahwa. Itbeɛ lemtel n igelliden yelhan, am Dawed, Yahucafat akk-d Ḥizqiyahu. Mazal-it d ilemẓi mi gexdem yiwet n lḥaǧa s ẓẓwara.
Yuɣ lḥal aṭas n lweqt seg wasmi i xeddmen wat Isṛayil cceṛ di zzman-nni. Ţɛebbiden iṛebbiten n lekdeb yerna kennun zdat n lmeṣnuɛat. Yucyahu yewwi ihi kra n yergazen yid-es akken ad kksen yir leɛbada si tmurt meṛṛa. D ccɣel ameqran i ten-iţṛaǧun axaṭer aṭas n yemdanen i geţɛebbiden iṛebbiten n lekdeb. Wali di ţţeswiṛa-ya amek Yucyahu d yergazen yeddan yid-es i ţruẓun lmeṣnuɛat.
Umbeɛd Yucyahu iwekkel tlata yergazen ad reqqɛen (ṣeggmen) lemqam n Yahwa. Agdud imudd-ed iṣurdiyen yeţţunefken umbeɛd i tlata-yagi ixeddamen ara ixellṣen lebni iɣef i ţţuwekklen. M’akken i xeddmen di lemqam, lmuqeddem ameqran Ḥilqiyahu yufa dinna adlis n ccariɛa i gumeṛ Yahwa i Musa ad yaru aṭas n lweqt uqbel. Yuɣ lḥal aṭas n iseggasen seg wasmi i gɣab wedlis-nni.
Asmi i s-wwin adlis-nni, Yucyahu yessuter a t-id-ɣren zdat-es. M’akken yessemḥass i leqraya, Yucyahu yefhem belli ur iḥriz ara wegdud lqanun n Yahwa. Annect-agi isseḥzen-it ayendin, dɣa icerreg llebsa-s akken i teţwaliḍ dagi. Mbeɛd yenna: ‘Yahwa yerfa fell-aɣ axaṭer lejdud-nneɣ ur ḥrizen ara lumuṛ yuran deg wedlis-agi.’
Yucyahu yenna i lmuqeddem ameqran Ḥilqiyahu ad iṛuḥ ad yesteqsi acu ara sen-yexdem Yahwa. Ḥilqiyahu iṛuḥ ad iwali yiwet n tmeṭṭut iwumi qqaren Ḥulda, yellan d yiwet ger lanbeyya. Ḥulda tenna i Yucyahu ayen i s-d-iǧuweb Yahwa: ‘Aql-i a d-sseɣliɣ lɛiqab ɣef Yarucalim d imezdaɣ-is axaṭer ɛebden iṛebbiten n lekdeb yerna teččuṛ tmurt d lexsaṛa. Ma d kečč, a Yucyahu, imi txedmeḍ ayen yelhan, allen-ik ur ţwalint ara tawaɣit ara d-sseɣliɣ.’
