TAQSIṬ TIS 13

Abṛaham, aḥbib n Ṛebbi

MBEƐD aḥemmal-​nni n waman, yiwen wemḍiq iɣer ṛuḥen yemdanen ad zedɣen isem-​is Ur. Tamdint-​agi n Ur tuɣal ţ-​ţamdint tameqrant yesɛan ixxamen icebḥen. Lameɛna wid izedɣen deg-​s ţɛebbiden iṛebbiten n lekdeb akken xeddmen di temdint n Babil. Imezdaɣ n temdinin n Ur d Babil ur cuban ara Nuḥ d mmi-​s Cim, yellan d iqeddacen n Yahwa.

Nuḥ yellan d unṣiḥ, yemmut 350 iseggasen mbeɛd aḥemmal-​nni n waman. Yemmut sin iseggasen uqbel a d-​ilal wergaz i teţwaliḍ di ţţeswiṛa-​ya. Argaz-​agi iɛǧeb aṭas i Yahwa Ṛebbi. Isem-​is Abṛaham. Yezdeɣ neţţa ţ-​ţwacult-​is di temdint n Ur.

Yiwen wass, Yahwa yenna i Abṛaham: ‘Eǧǧ tamdint n Ur d wid i k-​iţţilin, tṛuḥeḍ ɣer tmurt ara k-​d-​ssekneɣ.’ Acu yexdem Abṛaham? Yuɣ awal i Ṛebbi? Ih, yuɣ-​as awal, dɣa yeǧǧa liser meṛṛa n temdint n Ur. Abṛaham iţţaɣ dima awal i Ṛebbi, ɣef waya i guɣal d aḥbib n Ṛebbi.

Asmi i geǧǧa Abṛaham tamdint n Ur, ddan yid-​es kra si twacult-​is. Tedda tmeṭṭut-​is Ṣara, baba-​s Tiraḥ akk-​d mmi-​s n gma-​s Luṭ. Iɛedda kra n lweqt, wwḍen ɣer yiwet n temdint iwumi qqaren Ḥaṛan. Dinna i gemmut Tiraḥ. Tura tamdint n Ur tebɛed aṭas aṭas fell-​asen.

Mi gɛedda kra n lweqt, Abṛaham ţ-​ţwacult-​is ǧǧan Ḥaṛan, ṛuḥen ɣer tmurt n Kanɛan. Dinna i s-​yenna Yahwa: ‘Ţ-​ţagi i ţ-​ţamurt ara fkeɣ i tarwa-​k.’ Abṛaham yeqqim di tmurt n Kanɛan, dinna iɛac ddaw iqiḍunen.

Ṛebbi iburek Abṛaham armi yekseb aṭas n tqeḍɛiyin n lmal amecṭuḥ d umeqran. Yesɛa daɣen imeyyaten n iqeddacen. Lameɛna neţţa d Ṣara ur zmiren ara ad sɛun dderya.

Asmi i gewweḍ Abṛaham 99 iseggasen di leɛmeṛ-​is, iwɛed-​as Yahwa: ‘Aţ-​ţuɣaleḍ d bab n waṭas n leǧnas.’ Lameɛna, amek ara yeḍru waya imi Abṛaham d Ṣara uɣalen d imɣaren yerna futen i dderya?

Laṣel n ddunit 11:27-32; 12:1-7; 17:1-8, 15-17; 18:9-19.