Aḥric amezwaru n Ṭrejma n ddunit tajdiṭ yeffeɣ-ed (s teglizit) di 1950. Seg yimiren d asawen, kra n imusnawen n Wedlis Iqedsen qejjmen di Ṭrejma-yagi, amzun ur tṣeḥḥa ara a, axaṭer temxallaf di kra n yefyar ɣef ṭrejmat nniḍen n Wedlis Iqedsen. Ssebbat iɣef i temxallaf ɣef ṭrejmat nniḍen ɛnant yiwet si temsal-agi:

•   Yella fell-as leţkal? Ṭrejma n ddunit tajdiṭ treṣṣa ɣef leḥwayeǧ tijdidin maḍi i d-ufan imusnawen, treṣṣa daɣen ɣef iţafţaren iqdimen yeţwaketben s ufus iɣef yella leţkal s ṣṣeḥ. Kra n ṭrejmat nniḍen n Wedlis Iqedsen reṣṣant ɣef iţafţaren ur nṣeḥḥa ara yerna ur nelli ara d iqdimen annect n wid iseg i d-teţwaṭerjem Ṭrejma n ddunit tajdiṭ.

•   Tṣeḥḥa? Di Ṭrejma n ddunit tajdiṭ, yeţwaxdem akk lmeǧhud iwulmen bac a d-tefk akken ilaq lexbaṛ i d-iweḥḥa Ṛebbi di laṣel. (2 Timutawus 3:16) Di kra n ṭrejmat nniḍen, ṭrejmanat xtaṛen ad ṭṭfen di leɛwayed n yemdanen wala a d-sṭerjmen lexbaṛ n Ṛebbi akken ilaq. Ɣef lemtel, di kra n ṭrejmat yeţţubeddel yisem n Ṛebbi, Yahwa, s kra n imeslayen am Ssid neɣ Ṛebbi.

•   Teţwaṭerjem-ed awal s wawal? Ṭrejmat n Wedlis Iqedsen i d-yessefhamen aḍris yellan di laṣel zemrent a d-ssekcment ixemmimen n lɛibad neɣ ad kksent kra n leḥwayeǧ yesɛan azal. Ṭrejma n ddunit tajdiṭ txulef-itent, imi yeţwaxdem lmeǧhud bac aţ-ţeţwaṭerjem awal s wawal; awi-d kan ur d-ţeffɣen ara imeslayen-agi ur ṣeḥḥan ara neɣ ur ţbeddilen ara lmeɛna i wayen yeţwaketben di laṣel.

Deg wacu i temxallaf Ṭrejma n ddunit tajdiṭ ɣef ṭrejmat nniḍen?

 Tiktabin i gxuṣṣen. Tamezdayt takatulikit ţ-ţmezdayt turtuduksit n Ccerq rennunt ɣer wedlis-nsent iqedsen kra n tektabin yeţwassnen belli ur yelli ara fell-asent leţkal. Meɛna, tiktabin-agi ur ţwaqeblent ara di lqanun n Iyahudiyen yeɛnan tiktabin n Wedlis Iqedsen. Neţţa, ɛlaḥsab n Wedlis Iqedsen, d Iyahudiyen s yiman-nsen “iwumi i d-ţţunefken d imezwura lehduṛ n Yillu, d lamana.” (Iṛumaniyen 3:1, 2) Ɣef wannect-a i ţwakksent tektabin-agi iɣef ur yelli ara leţkal si Ṭrejma n ddunit tajdiṭ d waṭas n ṭrejmat nniḍen tijdidin n Wedlis Iqedsen.

 Ifyar i gxuṣṣen. Kra n ṭrejmat rnan-d deg-sent ṭrejmanat kra n yefyar neɣ iḥricen n yefyar d zzyada, ɣas ur llin ara deg iţafţaren iqdimen mliḥ i gellan. Ma d Ṭrejma n ddunit tajdiṭ ur d-rnin ara deg-s ṭrejmanat leḥwayeǧ-agi yellan d zzyada. Xilla n ṭrejmat nniḍen n wass-a ideg ur telli ara zzyada-yagi, neɣ i d-yeqqaren belli ifyar-agi n zzyada ur d-yeţţunefk ara fell-asen ţţeḥqiq iṣeḥḥan. b

 Lxilaf di lxetyaṛ n imeslayen. Ṭrejma awal s wawal teţţas-ed tikwal tewɛeṛ i lefhama neɣ tesseɣlaḍ. Ɣef lemtel, imeslayen n Ɛisa i geţwaketben di Matta 5:3 qrib dima sṭerjimen-ten-id akka: “D iseɛdiyen imeɣban di ṛṛuḥ.” (Bible annotée, Nouvelle Bible Segond, Bible d’Ostervald, Bible à la Colombe) Xilla i d-yeqqaren belli imeslayen i d-yeţwaṭerjmen awal s wawal “imeɣban di ṛṛuḥ” ur banen ara d acu-ten; wiyaḍ ɣilen belli Ɛisa iqsed-ed s imeslayen-agi azal i gesɛa wannuz neɣ timmuɣbent. Di tin n ṣṣeḥ, Ɛisa yella yebɣa a d-yini belli, ma nebɣa a nili s ṣṣeḥ d iseɛdiyen, ilaq-aɣ a nesteɛṛef belli neḥwaǧ a ɣ-iwelleh Ṛebbi. Ṭrejma n ddunit tajdiṭ tefka-d swaswa ayen yeţxemmim Ɛisa mi d-tehdeṛ ɣef “wid iẓran iman-nsen d imeɣban i llan di leḥwayeǧ n ṛṛuḥ.”—Matta 5:3, Ṭrejma n ddunit tajdiṭ (s tṛumit).

Kra n imusnawen n Wedlis Iqedsen ur nelli ara d Inagan cekkṛen-d Ṭrejma n ddunit tajdiṭ

•   Edgar Goodspeed, d amusnaw n Wedlis Iqedsen yerna d ṭrejman yeţwassnen mliḥ, yenna-d deg yiwet n tebṛaţ n 8 bujambeṛ 1950 ɣef Tira tiyunaniyin timasiḥiyin, Ṭrejma n ddunit tajdiṭ ayagi: “Ţţarraɣ ddehn-iw ɣer leqdic n yemceggɛen-nwen d wamek i d-yekka ddunit meṛṛa, teɛǧeb-iyi daɣen aṭas ṭrejma-yagi iṣeḥḥan yerna iǧehden. Zemreɣ a d-cehhdeɣ belli teţban-ed mliḥ deg-s tmusni lqayen.”

  

•   Allen Wikgren, aselmad n tesdawit n Cikagu, yeḥseb Ṭrejma n ddunit tajdiṭ d lemtel n lɛali n ṭrejma s lluɣa tatrart (n wass-a); ur d-tekki ara si ṭrejmat nniḍen, meɛna teţţuɣal dima ɣer wayen yeţwaketben di laṣel.—(The Interpreter’s Bible, aḥric 1, asebter 99.

•   Di ṛṛay i d-yefka Alexander Thomson, yiwen uneqqad aglizi n Wedlis Iqedsen, ɣef Tira tiyunaniyin timasiḥiyin, Ṭrejma n ddunit tajdiṭ, yenna-d: “Ṭrejma-yagi mebla ccekk d lxedma n imusnawen imeqranen n lluɣa tagrikit, i gessexdmen ayen akk i tesɛa lluɣa taglizit bac ad nadin a d-ssufɣen akken ilaq lmeɛna n weḍris n tegrikit.”—The Differentiator, yebrir 1952, asebter 52.

•   Ɣas iḥuss belli Ṭrejma n ddunit tajdiṭ teţban-ed ur tcuba ara ɣer ṭrejmat nniḍen di kra n leḥwayeǧ yerna tessewham, Robert McCoy yenna-d ɣer taggara n lehduṛ-is: “Ṭrejma n Lɛahd Ajdid teţţak-ed ţţbut belli tarbaɛt-agi [Inagan n Yahwa] llan deg-s imusnawen n lluɣa tagrikit i gzemren ad frun akken ilaq uguren i d-teţţawi ṭrejma n Wedlis Iqedsen.”—Andover Newton Quarterly, yennayer 1963, asebter 31.

•   Ɣas akken ur s-yeɛǧib ara wamek i d-ţwaṭerjmen kra n ixemmimen di Ṭrejma n ddunit tajdiṭ, aselmad n tesdawit MacLean Gilmour yesteɛṛef belli wid i ţ-yesṭerjmen “ssnen akken ilaq tagrikit.”—Andover Newton Quarterly, ctambeṛ 1966, asebter 26.

•   Deg wayen i d-yura uselmad n tesdawit Thomas Winter ɣef Ṭrejma n ddunit tajdiṭ i gellan d aḥric n Wedlis Iqedsen yeţţusemman Kingdom Interlinear Translation of the Greek Scriptures, yenna-d: “Ṭrejma i texdem terbaɛt-agi n ṭrejmanat ur d-nefki ara ismawen-nsen teţwaxdem ɛlaḥsab n leḥwayeǧ tijdidin akk yellan di tmusni; teţban-ed tṣeḥḥa si ṭṭerf ar ṭṭerf.”—The Classical Journal, yebrir-maggu 1974, asebter 376.

•   Aselmad n tesdawit Benjamin Kedar-Kopfstein, d amusnaw di lluɣa taɛibṛanit, yenna-d di 1989: “Di lxedma-inu n unadi deg wayen yeɛnan Adlis Iqedsen s tɛibṛanit akk-d ṭrejmat, muqleɣ aṭas n tikkal di ṭrejma s teglizit yeţţusemman Ṭrejma n ddunit tajdiṭ. Mi xeddmeɣ ayagi, acḥal d abrid i ḥusseɣ s ṣṣeḥ belli ṭrejma-yagi tbeggen-ed lmeǧhud yeţwaxedmen seg wul bac a d-teffeɣ ṭrejma n weḍris tṣeḥḥa akteṛ.”

•   Jason BeDuhn, aselmad n tesdawit deg wayen yeɛnan ddin, yessenqden tesɛa si ṭrejmat n Wedlis Iqedsen i ssexdamen akteṛ yemdanen iheddṛen taglizit, yura: “NW [Ṭrejma n ddunit tajdiṭ] teffeɣ-ed d neţţat i gṣeḥḥan akteṛ ɣef ṭrejmat nniḍen ukud i ţ-nwala.” Ɣas akken lɛibad s lǧemla akk-d waṭas n imusnawen n Wedlis Iqedsen ḥesben belli lxilaf i ufan di Ṭrejma n ddunit tajdiṭ yekka-d seg wamek i geṭṭef di ddin-is yal yiwen si ṭrejmanat, aselmad BeDuhn yenna-d: “Amur ameqran si leḥwayeǧ-agi yemxallafen llant-ed imi NW tṣeḥḥa akteṛ; imeslayen n zik i ssexdmen yemyura n Lɛahd Ajdid ţwaṭerjmen-d awal s wawal yerna s leḥder.”—Truth in Translation, isebtar 163, 165.