ᲡᲐᲡᲬᲐᲕᲚᲝ ᲡᲢᲐᲢᲘᲐ 27
ᲡᲘᲛᲦᲔᲠᲐ 79 ასწავლეთ, რომ მტკიცედ იდგნენ
დაეხმარეთ ბიბლიის შემსწავლელებს, ღვთის მსახურება აირჩიონ
„მტკიცედ იდექით რწმენაში, . . გაძლიერდით!“ (1 ᲙᲝᲠ. 16:13).
ᲛᲘᲖᲐᲜᲘ
ამ სტატიიდან გავიგებთ, როგორ დავეხმაროთ ბიბლიის შემსწავლელს, გაიძლიეროს რწმენა და მოიკრიბოს შინაგანი ძალა, რომ ღვთის მსახური გახდეს.
1, 2. ა) რა უშლის ზოგ ბიბლიის შემსწავლელს ხელს იმაში, რომ ღვთის მსახური გახდეს? ბ) რას განვიხილავთ ამ სტატიაში?
ᲗᲐᲕᲘᲡ დროზე ხომ არ გაფერხებდათ რამე, რომ იეჰოვას მოწმე გამხდარიყავით? შეიძლება თანამშრომლების, მეგობრების ან ოჯახის წევრების შიშით იკავებდით თავს. ან იმაში გეპარებოდათ ეჭვი, შეძლებდით თუ არა იეჰოვას ნორმებით ცხოვრებას. თუ მსგავსი დაბრკოლებები გადალახეთ, ადვილად გაუგებთ იმ ბიბლიის შემსწავლელებს, რომლებიც ნაბიჯს ვერ დგამენ.
2 იესომ კარგად იცოდა, რომ მსგავსი ფაქტორები შეიძლება ვინმესთვის ხელის შემშლელი გამხდარიყო (მათ. 13:20–22). ის ყველანაირად ცდილობდა მათ დახმარებას, ვინც თამამად ვერ დგამდა ნაბიჯს. მან საკუთარი მაგალითით დაანახა თავის მოწაფეებს, როგორ დახმარებოდნენ ასეთებს: 1) ამოეცნოთ ხელის შემშლელი ფაქტორები, 2) გაეღრმავებინათ ღვთისადმი სიყვარული, 3) სწორად განესაზღვრათ პრიორიტეტები და 4) გადაელახათ წინააღმდეგობა. ამ სტატიიდან დავინახავთ, როგორ მივბაძოთ იესოს და როგორ დავეხმაროთ შემსწავლელს ჩვენი ძირითადი სახელმძღვანელოს („იხარეთ ცხოვრებით მარადიულად!“) მეშვეობით, აირჩიოს ღვთის მსახურება.
ᲮᲔᲚᲘᲡ ᲨᲔᲛᲨᲚᲔᲚᲘ ᲤᲐᲥᲢᲝᲠᲔᲑᲘᲡ ᲐᲛᲝᲪᲜᲝᲑᲐ
3. სავარაუდოდ, რა უშლიდა ხელს ნიკოდემეს, იესოს მიმდევარი გამხდარიყო?
3 იესოს, სულ რაღაც, ექვსი თვის დაწყებული ჰქონდა მსახურება, როცა ერთ-ერთმა მმართველმა ნიკოდემემ ირწმუნა, რომ ის ღვთისგან იყო გამოგზავნილი. თუმცა იუდეველთა შიშით ამის სახალხოდ აღიარებას ვერ ბედავდა. ამიტომაც არჩია იესოსთან ღამით მისვლა (იოან. 3:1, 2; 7:13; 12:42). ის კარგად ხვდებოდა, რომ თუ იესოს მოწაფეობას მოინდომებდა, ბევრ რამეზე მოუწევდა უარის თქმა. როგორც ჩანს, ეს იყო მისთვის ერთ-ერთი ხელის შემშლელი ფაქტორი. a
4. რა გააკეთა იესომ ნიკოდემეს დასახმარებლად?
4 ნიკოდემემ კარგად იცოდა მოსეს კანონი, მაგრამ ის უნდა დაენახა, ახლა რის გაკეთებას მოელოდა ღმერთი მისგან. როგორ დაეხმარა მას იესო? მან დრო დაუთმო ნიკოდემეს, მიუხედავად იმისა, რომ ღამით მივიდა. იესომ პირდაპირ უთხრა მას, რა უნდა გაეკეთებინა: უნდა მოენანიებინა ცოდვები, წყალში მონათლულიყო და ერწმუნა ღვთის ძე (იოან. 3:5, 14–21).
5. როგორ დავეხმაროთ ბიბლიის შემსწავლელს ხელის შემშლელი ფაქტორების დანახვაში?
5 შეიძლება შემსწავლელს კარგად ესმის ბიბლიური საკითხები, მაგრამ მაინც დასჭირდეს დახმარება, რომ დაინახოს, რა უშლის ხელს წინსვლაში. ეს შეიძლება იყოს სამსახური ან ოჯახის მხრიდან წინააღმდეგობა. ამიტომ დრო გამოუყავით მას. თავისუფალ გარემოში შეხვდით, მაგალითად, ერთად მიირთვით ყავა ან სადმე გაისეირნეთ. არაფორმალურ სიტუაციაში ის უფრო ადვილად გადაგიშლით გულს. აუხსენით, რა ცვლილებები უნდა მოახდინოს და დაანახეთ, რომ ეს თქვენი ხათრით კი არა, იეჰოვას სიყვარულით უნდა გააკეთოს.
6. როგორ დავეხმაროთ შემსწავლელს შინაგანი ძალის მოკრებაში? (1 კორინთელები 16:13).
6 თუ შემსწავლელი დარწმუნდება, რომ იეჰოვას დახმარებით მისი პრინციპებით ცხოვრებას შეძლებს, შინაგან ძალასაც მოიკრებს ნასწავლის გამოსაყენებლად (წაიკითხეთ 1 კორინთელების 16:13). ჩვენ როგორ დავეხმაროთ ამაში? მაგალითად, კარგი მასწავლებელი არა მარტო ცოდნას გადასცემს მოსწავლეებს, არამედ მოტივაციას და თვითრწმენას უმაღლებს. მსგავსად, ჩვენი მიზანი მხოლოდ ის კი არ უნდა იყოს, რომ შემსწავლელს ცოდნა გავუზიაროთ, არამედ იმაშიც დავარწმუნოთ, რომ იეჰოვას დახმარებით საჭირო ცვლილებების მოხდენას შეძლებს. როგორ მივაღწიოთ ამ მიზანს?
ᲦᲕᲗᲘᲡ ᲡᲘᲧᲕᲐᲠᲣᲚᲘᲡ ᲒᲐᲦᲠᲛᲐᲕᲔᲑᲐ
7. როგორ აყვარებდა იესო ღმერთს თავის მსმენელებს?
7 იესომ იცოდა, რომ ღვთის სიყვარული საუკეთესო მოტივატორი იქნებოდა მისი მოწაფეებისთვის. ამიტომ ისე ესაუბრებოდა მათ ზეციერ მამაზე, რომ უფრო მეტად შეეყვარებინა. ზოგ მათგანს შეიძლება მოსიყვარულე მამა არც კი ჰყოლია. ამიტომ, რა სასიამოვნო იქნებოდა მათთვის იმის მოსმენა, რომ იეჰოვა ისეთი მამაა, რომელიც კარგს არაფერს იშურებს თავისი შვილებისთვის (მათ. 7:9–11). გარდა ამისა, რა კარგად დაინახავდნენ იეჰოვას გულმოწყალებას იესოს მაგალითით მამაზე, რომელმაც გულთბილად მიიღო გზასაცდენილი შვილი. ეს მათ იეჰოვას დიდ სიყვარულში დაარწმუნებდა (ლუკ. 15:20–24).
8. როგორ შეგიძლიათ შეაყვაროთ შემსწავლელს იეჰოვა?
8 შემსწავლელს უფრო შეაყვარებთ იეჰოვას, თუ მის თვისებებზე გაუმახვილებთ ყურადღებას. ყოველ ჯერზე, როცა რამეს განიხილავთ, ნასწავლი დააკავშირეთ იეჰოვასთან და დააფიქრეთ, როგორ მეტყველებს ეს მის სიყვარულზე. მაგალითად, როცა გამოსასყიდზე იმსჯელებთ, დაანახეთ, რომ ამ მსხვერპლით ღმერთი პირადად მას უმტკიცებს სიყვარულს (რომ. 5:8; 1 იოან. 4:10). თუ შემსწავლელი დარწმუნდება, რომ იეჰოვას პირადად ის უყვარს, თავადაც შეიყვარებს მას (გალ. 2:20).
9. რა დაეხმარა ერთ ინდონეზიელ კაცს, ღვთის მსახური გამხდარიყო?
9 განვიხილოთ ერთი ინდონეზიელი მამაკაცის, მაიკლის შემთხვევა. მან ჭეშმარიტება ბავშვობიდან იცოდა, მაგრამ არ მონათლულა. 18 წლის ასაკში სხვა ქვეყანაში გადავიდა და მძღოლად დაიწყო მუშაობა. მოგვიანებით სამშობლოში დაბრუნდა და ოჯახი შექმნა, თუმცა შემდეგ ცოლ-შვილის გარეშე ისევ საზღვარგარეთ წავიდა სამუშაოდ. ამასობაში მისმა ცოლმა და ქალიშვილმა ბიბლიის შესწავლა დაიწყეს და სულიერად წინ წაიწიეს. დედის სიკვდილის შემდეგ მაიკლმა სახლში დაბრუნება გადაწყვიტა, რომ მამაზე ეზრუნა. ამჯერად მანაც დაიწყო ბიბლიის შესწავლა. წიგნის, „იხარეთ ცხოვრებით მარადიულად!“, 27-ე გაკვეთილის მეორე ნაწილში მოცემულმა მასალამ ისე იმოქმედა მაიკლზე, რომ აცრემლდა. მასზე დიდი შთაბეჭდილება მოახდინა იმის გააზრებამ, რამხელა ტკივილი განიცადა იეჰოვამ, როცა მისი შვილი იტანჯებოდა. მაიკლს ღვთის მიმართ მადლიერების გრძნობა გაუჩნდა. ეს დაეხმარა, რომ საჭირო ცვლილებები მოეხდინა და მონათლულიყო.
ᲞᲠᲘᲝᲠᲘᲢᲔᲢᲔᲑᲘᲡ ᲡᲬᲝᲠᲐᲓ ᲒᲐᲜᲡᲐᲖᲦᲕᲠᲐ
10. როგორ დაეხმარა იესო თავის პირველ მოწაფეებს, სწორად განესაზღვრათ პრიორიტეტები? (ლუკა 5:5–11; იხილეთ აგრეთვე სურათი).
10 პირველმა მოწაფეებმა იესო თავიდანვე აღიარეს მესიად, მაგრამ მათ დახმარება დასჭირდათ, რომ მის გვერდით მსახურება პრიორიტეტად ექციათ. ეს ასე მოხდა პეტრესა და ანდრიას შემთხვევაში, რომლებიც მეთევზეობას მისდევდნენ. როგორც ჩანს, მათ საქმიანი ურთიერთობა აკავშირებდათ იაკობთან და იოანესთან და კარგადაც მისდიოდათ საქმე (მარ. 1:16–20). მათ თავიდანვე ირწმუნეს იესო, მაგრამ თვეები გავიდა, ვიდრე იესოს მოწოდებას გამოეხმაურებოდნენ და მას გაჰყვებოდნენ (მათ. 4:18, 19). საბოლოოდ, მათ მიატოვეს თავიანთი საქმე, თუმცა ალბათ იმაზეც იზრუნეს, რომ ოჯახები შემოსავლის გარეშე არ დაეტოვებინათ. როგორ დაეხმარა იესო მათ, რომ პირველ ადგილზე მისი მიმდევრობა დაეყენებინათ? მან მათთვის სასწაული მოახდინა და იმაში დაარწმუნა, რომ იეჰოვა მათზე აუცილებლად იზრუნებდა (წაიკითხეთ ლუკას 5:5–11).
როგორ დაეხმარა იესო მოწაფეებს პრიორიტეტების სწორად განსაზღვრაში და ჩვენ რას ვსწავლობთ? (იხილეთ აბზაცი 10) b
11. როგორ დავეხმაროთ შემსწავლელს რწმენის განმტკიცებაში?
11 მართალია, იესოსავით სასწაულებს ვერ მოვახდენთ, მაგრამ შეგვიძლია შემსწავლელს საკუთარი გამოცდილება გავუზიაროთ და მოვუყვეთ, როგორ დავინახეთ იეჰოვას ხელი ჩვენს ცხოვრებაში. მაგალითად, როგორ ვიგრძენით მისი მხარდაჭერა, როცა კრებებზე დასწრება დავიწყეთ. შესაძლოა დამსაქმებელთან მოგვიწია საუბარი და იმის ახსნა, რომ შეხვედრების დროს ვერ ვიმუშავებდით. შემსწავლელს შეგვიძლია იმაზეც გავუმახვილოთ ყურადღება, როგორ განგვიმტკიცა რწმენა მსგავსმა შემთხვევებმა და დაგვარწმუნა, რომ იეჰოვა ყოველთვის მხარს უჭერს მას, ვინც მის მსახურებას პირველ ადგილზე აყენებს.
12. ა) რატომ უნდა დავასწროთ შესწავლას სხვადასხვა მაუწყებელი? ბ) როგორ შეგიძლიათ შესწავლის დროს ვიდეოების გამოყენება? მოიყვანეთ მაგალითი.
12 შემსწავლელს არა მარტო თქვენი, არამედ სხვა ქრისტიანების გამოცდილებაც დაეხმარება პრიორიტეტების სწორად განსაზღვრაში. ამიტომ შესწავლას სხვადასხვა მაუწყებელი დაასწარით. მოაყოლეთ მათ, როგორ გაიგეს ჭეშმარიტება და რა დაეხმარათ, რომ ღვთის მსახურება პირველ ადგილზე დაეყენებინათ. გარდა ამისა, შემსწავლელთან ერთად უყურეთ და განიხილეთ ვიდეოები, რომლებიც მოცემულია გაკვეთილის მეორე ნაწილში „გაიღრმავეთ ცოდნა“. საჭიროების შემთხვევაში შეგიძლიათ განიხილოთ ვიდეოები ჩარჩოდან „გაიგეთ მეტი“. მაგალითად, როცა 37-ე გაკვეთილის განხილვისას უყურებთ ვიდეოს „იეჰოვა იზრუნებს ჩვენს საჭიროებებზე“, იმაზეც იმსჯელეთ, რა პრინციპების დანახვა შეიძლება ამ ვიდეოდან.
ᲬᲘᲜᲐᲐᲦᲛᲓᲔᲒᲝᲑᲘᲡ ᲒᲐᲓᲐᲚᲐᲮᲕᲐ
13. როგორ მოამზადა იესომ თავისი მოწაფეები წინააღმდეგობისთვის?
13 იესომ არაერთხელ გააფრთხილა თავისი მოწაფეები, რომ წინააღმდეგობას შეხვდებოდნენ, მათ შორის ოჯახის წევრების მხრიდან (მათ. 5:11; 10:22, 36). თავისი მსახურების დასასრულს ისიც უთხრა, რომ ზოგიერთი მათგანი შეიძლება მოეკლათ კიდეც (მათ. 24:9; იოან. 15:20; 16:2). სამქადაგებლო საქმეში ხელი რომ არ შეშლოდათ, მან სიფრთხილისა და წინდახედულობის გამოჩენისკენ მოუწოდა მათ და ურჩია, არ დაპირისპირებოდნენ მოწინააღმდეგეებს.
14. როგორ მოვამზადოთ შემსწავლელი წინააღმდეგობისთვის? (2 ტიმოთე 3:12).
14 წინააღმდეგობისთვის რომ მოვამზადოთ შემსწავლელი, უნდა ავუხსნათ, რა რეაქცია შეიძლება ჰქონდეთ თანამშრომლებს, მეგობრებსა თუ ნათესავებს (წაიკითხეთ 2 ტიმოთეს 3:12). მაგალითად, შეიძლება დასცინონ ან გააკრიტიკონ იმის გამო, რომ შეხედულებებს იცვლის და ბიბლიური პრინციპების გათვალისწინებას ცდილობს. რაც უფრო მალე შევამზადებთ შემსწავლელს მოსალოდნელი წინააღმდეგობისთვის, უფრო მარტივად გაუმკლავდება მას.
15. როგორ დავეხმაროთ შემსწავლელს, სწორი რეაქცია ჰქონდეს წინააღმდეგობაზე?
15 დააფიქრეთ შემსწავლელი იმაზე, რა აღიზიანებთ მისი ოჯახის წევრებს. შეიძლება მათ ჰგონიათ, რომ მას თავგზას ურევენ ან იეჰოვას მოწმეებზე აქვთ არასწორი წარმოდგენა. იესოც კი შეხვდა უარყოფით დამოკიდებულებას ნათესავებისგან (მარ. 3:21; იოან. 7:5). დაანახეთ შემსწავლელს, რომ ასეთ სიტუაციებში მომთმენი და ტაქტიანი უნდა იყოს.
16. როგორ დავეხმაროთ შემსწავლელს, ტაქტიანად ისაუბროს თავის მრწამსზე?
16 აუხსენით შემსწავლელს, რომ მაშინაც კი, თუ ოჯახის წევრი ან ნათესავი ინტერესს იჩენს, ერთ ჯერზე ყველაფერი არ უთხრას. წინააღმდეგ შემთხვევაში მათ შეიძლება ისეთი შეგრძნება გაუჩნდეთ, რომ თავს ახვევენ საკუთარ შეხედულებებს და სხვა დროს აღარ მოუნდეთ ამ თემაზე საუბარი. ამიტომ აჯობებს, თუ თავს არ მოაბეზრებს მათ საუბრით და მოკლედ ეტყვის სათქმელს (კოლ. 4:6). ურჩიეთ შემსწავლელს, რომ მათ აჩვენოს ვებსაიტი jw.org. თუ რამე დააინტერესებთ, ისინი თავად ნახავენ სასურველ ინფორმაციას.
17. როგორ დავეხმაროთ შემსწავლელს, უპასუხოს მას, ვისაც უარყოფითი შეხედულება აქვს მოწმეებზე? (იხილეთ აგრეთვე სურათი).
17 დაეხმარეთ შემსწავლელს, რომ ვინმესთან სამსჯელოდ გამოიყენოს ვებსაიტზე jw.org მოცემული რუბრიკა „ხშირად დასმული კითხვები“ (2 ტიმ. 2:24, 25). შესწავლის დროს განიხილეთ გაკვეთილის ბოლოს მოცემული ჩარჩო „ზოგი ამბობს“. ერთად გაივარჯიშეთ, რომ შემსწავლელმა საკუთარი სიტყვებით შეძლოს პასუხის გაცემა. არ მოგერიდოთ რჩევის მიცემა, თუ ფიქრობთ, რომ სხვანაირად აჯობებდა ამის გაკეთება. ასეთი მომზადება დაეხმარება მას, თამამად ისაუბროს თავის რწმენაზე.
შემსწავლელს რომ გაუადვილოთ სხვებთან თავის მრწამსზე საუბარი, ერთად გაივარჯიშეთ (იხილეთ აბზაცი 17). c
18. როგორ დავეხმაროთ შემსწავლელს, გახდეს მაუწყებელი? (მათე 10:27).
18 იესომ თავის მოწაფეებს სასიხარულო ცნობის საჯაროდ გაცხადება დაავალა (წაიკითხეთ მათეს 10:27). რაც უფრო მალე მიეჩვევა შემსწავლელი საკუთარ რწმენაზე საუბარს, მით უფრო მალე ისწავლის იეჰოვაზე მინდობას. როგორ შეგიძლიათ აღძრათ ის, რომ მაუწყებელი გახდეს? როცა კრებაში იგებთ სამქადაგებლო კამპანიის შესახებ, ისარგებლეთ შემთხვევით და წაახალისეთ ის, რომ იფიქროს მაუწყებლობაზე. აუხსენით, რატომ შეიძლება გაუადვილდეს კამპანიის დროს მსახურების დაწყება. ისიც ურჩიეთ, რომ შუა კვირის შეხვედრის დავალებებშიც მიიღოს მონაწილეობა. ეს საჯაროდ საუბარს გაუადვილებს და უფრო თამამად შეძლებს საკუთარი შეხედულებების ახსნას.
ᲘᲧᲐᲕᲘᲗ ᲝᲞᲢᲘᲛᲘᲡᲢᲣᲠᲐᲓ ᲒᲐᲜᲬᲧᲝᲑᲘᲚᲘ
19. საიდან გამოჩნდა, რომ იესო ოპტიმისტურად იყო განწყობილი მოწაფეების მიმართ და როგორ მივბაძოთ მას?
19 სიკვდილამდე იესო დაჰპირდა მოწაფეებს, რომ ერთ დღესაც კვლავ ერთად იქნებოდნენ. ისინი ვერ მიხვდნენ, რომ იესო ზეცაში ერთად ყოფნაზე საუბრობდა (იოან. 14:1–5, 8). მას კარგად ესმოდა, რომ მოწაფეებს დრო სჭირდებოდათ, ვიდრე ყველაფერს ჩასწვდებოდნენ, მათ შორის ზეციურ იმედს. ამიტომაც ოპტიმისტური განწყობა არ დაუკარგავს (იოან. 16:12). ჩვენც უნდა შევინარჩუნოთ ოპტიმისტური განწყობა შემსწავლელის მიმართ და ეს მასაც ვაგრძნობინოთ.
რაც უფრო მალე მიეჩვევა შემსწავლელი საკუთარ რწმენაზე საუბარს, მით უფრო მალე ისწავლის იეჰოვაზე მინდობას.
20. რაში გამოჩნდა, რომ ერთ დას შემსწავლელის მიმართ ოპტიმისტური განწყობა არ დაუკარგავს?
20 ჩვენ არ უნდა შევიტანოთ ეჭვი შემსწავლელის მოტივებში და არ უნდა დავკარგოთ იმის იმედი, რომ ის სწორ არჩევანს გააკეთებს. ამ მხრივ საინტერესოა ერთი მალაველი დის, ჩიფუნდოს, მაგალითი. მან ბიბლიის შესწავლა დაიწყო ერთ ახალგაზრდა კათოლიკე ქალთან, ალინაფესთან. წიგნის, „იხარეთ ცხოვრებით მარადიულად!“, მე-14 გაკვეთილის განხილვის შემდეგ ჩიფუნდომ ჰკითხა, რას ფიქრობდა თაყვანისცემის დროს ქანდაკებებისა და ხატების გამოყენებაზე. ალინაფე, ცოტა არ იყოს, გაღიზიანდა და უთხრა, რომ ეს ყველას პირადი გადასაწყვეტი იყო. იმ მომენტში ჩიფუნდომ იფიქრა, რომ ის შესწავლის გაგრძელებას აღარ მოინდომებდა. თუმცა შესწავლა მაინც გაგრძელდა და ჩიფუნდოც არ კარგავდა იმედს, რომ ადრე თუ გვიან ალინაფე სწორ დასკვნას გააკეთებდა. რამდენიმე თვის შემდეგ, 34-ე გაკვეთილის განხილვის დროს, მან სახელმძღვანელოში მოცემული კითხვა დაუსვა: „როგორ შეცვალა თქვენი ცხოვრება უკეთესობისკენ ბიბლიის შესწავლამ და ჭეშმარიტი ღმერთის, იეჰოვას, გაცნობამ?“. ალინაფემ არაერთი მხარე აღნიშნა და იმაზეც გაამახვილა ყურადღება, რომ იეჰოვას მოწმეები ერიდებიან იმის კეთებას, რასაც ბიბლია გმობს. ალინაფემ მალევე მოახდინა ცვლილებები და მოინათლა.
21. როგორ გავუძლიეროთ შემსწავლელს ღვთის მსახურების სურვილი?
21 მართალია, იეჰოვა ზრდის, მაგრამ ბიბლიის შემსწავლელების სულიერ ზრდაში ჩვენც შეგვაქვს დიდი წვლილი (1 კორ. 3:7). ჩვენ მხოლოდ ცოდნას კი არ ვუზიარებთ მათ, არამედ ვცდილობთ, შევაყვაროთ კიდეც იეჰოვა. ჩვენ იმაშიც ვეხმარებით, რომ სწორად განსაზღვრონ პრიორიტეტები და წინააღმდეგობის დროს მიენდონ იეჰოვას. ჩვენ მათ მიმართ ოპტიმისტურ განწყობას ვინარჩუნებთ, რაც მათაც შემატებს თვითრწმენას და იმის სურვილს გაუძლიერებს, რომ ღვთის ნორმებით იცხოვრონ და მისი მსახურები გახდნენ.
ᲡᲘᲛᲦᲔᲠᲐ 55 ნუ შეგეშინდებათ მათი!
a იესოსა და ნიკოდემეს შეხვედრიდან ორწელიწად-ნახევრის შემდეგ ნიკოდემე ისევ იუდეველთა უმაღლესი სასამართლოს წევრი იყო (იოან. 7:45–52). როგორც ერთ ნაშრომშია ნათქვამი, ერთი გადმოცემის თანახმად ნიკოდემე მხოლოდ იესოს სიკვდილის შემდეგ გახდა მისი მოწაფე (იოან. 19:38–40).
