ᲙᲐᲜᲝᲜᲘᲡ თანახმად, გვრიტიც და მტრედიც იეჰოვასთვის მისაღები შესაწირავები იყო. ეს ორი ფრინველი შესაწირავების შესახებ კანონებში ყოველთვის ერთად მოიხსენიებოდა და შეიძლებოდა ერთის მეორეთი შეცვლა (ლევ. 1:14; 12:8; 14:30). რატომ იყო ეს ხელსაყრელი ისრაელებისთვის? ერთ-ერთი მიზეზი ის არის, რომ გვრიტი ყოველთვის არ იშოვებოდა. რატომ?

გვრიტი გადამფრენი ფრინველია, რომელიც ისრაელში თბილ სეზონზე ბუდობს. ოქტომბერში ის სამხრეთით, თბილი ქვეყნებისკენ მიფრინავს და უკან მხოლოდ გაზაფხულზე ბრუნდება (ქებ. 2:11, 12; იერ. 8:7). ეს იმას ნიშნავს, რომ ზამთარში ისრაელებს გაუჭირდებოდათ მისი შეწირვა.

რაც შეეხება მტრედს, ჩვეულებრივ, ის არ მიგრირებს. ამიტომ ისრაელში წელიწადის ნებისმიერ დროს შეიძლებოდა მათი შოვნა. მეტიც, მტრედებს იშინაურებდნენ კიდეც (შეადარეთ იოანეს 2:14, 16). ერთ წიგნში ნათქვამია: „პალესტინაში ყველა სოფელსა თუ ქალაქში ჰყავდათ მოშინაურებული მტრედები. თითოეულ სახლს ჰქონდა სამტრედე ანუ კედელში გაკეთებული ღრმული, სადაც მტრედს შეეძლო დაებუდებინა“ (Bible Plants and Animals; შეადარეთ ესაიას 60:8).

აშკარაა, იეჰოვა სიყვარულითა და გაგებით ეკიდებოდა თავის ხალხს, რადგან ისეთ შესაწირავს არ სთხოვდა, რომელზეც მათ ხელი არ მიუწვდებოდათ.