მატიანე — წიგნი მეორე 14:1—15
14 განისვენა აბიამ თავისი მამა-პაპის გვერდით და დამარხეს ის დავითის ქალაქში.+ მის შემდეგ მისი ვაჟი ასა გამეფდა, რომლის დროსაც ათი წლის მანძილზე მშვიდობა იყო ქვეყანაში.
2 კარგად და სწორად იქცეოდა ასა იეჰოვას, თავისი ღვთის, თვალში.
3 მოსპო მან სხვა ღმერთების სამსხვერპლოები+ და სათაყვანო მაღლობები, დაამტვრია სათაყვანო სვეტები+ და აჩეხა სათაყვანო ბოძები.+
4 მან მოუწოდა იუდას, რომ ეძებნათ იეჰოვა, თავიანთი მამა-პაპის ღმერთი, და დაეცვათ მისი კანონები და მცნებები.
5 მეფემ მოსპო იუდას ქალაქებში სასაკმევლეები და სათაყვანო მაღლობები.+ მშვიდობა იყო სამეფოში მისი მეფობის დროს.
6 მან ააშენა გამაგრებული ქალაქები იუდაში,+ რადგან მშვიდობა იყო ქვეყანაში. ომი არ ჰქონია მას ამ წლების განმავლობაში, რადგან იეჰოვამ დაასვენა ის.+
7 მიმართა მან იუდას: „მოდი ავაშენოთ ეს ქალაქები, შემოვავლოთ გალავნები, გავამაგროთ კოშკებით+ და გავუკეთოთ კარიბჭეები და ურდულები. ჩვენია ეს მიწა, რადგან ვემსახურებით იეჰოვას, ჩვენს ღმერთს, და ისიც მშვიდობას გვაძლევს ყოველი მხრიდან“. ხელი მოემართათ მათ მშენებლობაში.+
8 ასას ჰყავდა დიდი ფარებითა და შუბებით შეიარაღებული 300 000 მეომარი იუდადან და 280 000 მამაცი მებრძოლი ბენიამინიდან, რომლებიც მშვილდებითა და პატარა ფარებით იყვნენ აღჭურვილნი.+
9 მათ წინააღმდეგ წამოვიდა ეთიოპი ზერახი მილიონიანი ჯარითა და 300 ეტლით+ და მარეშას+ მიადგა.
10 ასაც გამოვიდა მის დასახვედრად, და ისინი ცეფათის ველზე, მარეშასთან განლაგდნენ.
11 მოუხმო ასამ იეჰოვას, თავის ღმერთს:+ „იეჰოვა, შენ ძლიერის* დახმარებაც ძალგიძს და უძლურისაც.+ დაგვეხმარე, იეჰოვა, ჩვენო ღმერთო, რადგან შენზე ვართ მონდობილნი+ და შენი სახელით გამოვედით ამ მრავალრიცხოვანი ჯარის წინააღმდეგ!+ იეჰოვა, შენ ხარ ჩვენი ღმერთი, ნუ გაამარჯვებინებ მოკვდავ კაცს შენზე!“+
12 მაშინ დაამარცხა იეჰოვამ ეთიოპები ასას და იუდას წინაშე და ისინიც გაიქცნენ.+
13 ასამ და მასთან მყოფმა ხალხმა გერარამდე+ სდიეს მათ და ხოცეს ეთიოპები, სანამ ბოლომდე მუსრი არ გაავლეს; იეჰოვასა და მისი ლაშქრის მეშვეობით მოეღოთ მათ ბოლო. დიდი ნადავლი წამოიღო ხალხმა.
14 მათ გერარის გარშემო მდებარე ქალაქებიც დასცეს, ვინაიდან იეჰოვას შიშს შეეპყრო იქ ხალხი. გაძარცვეს ქალაქები, რადგან ბევრი რამ იყო დასატაცებელი.
15 მწყემსთა კარვებსაც დაესხნენ თავს, წამოასხეს უამრავი ცხვარი და აქლემი, და იერუსალიმში დაბრუნდნენ.
სქოლიოები
^ სიტყვასიტყვით — „ბევრის“.
