ეზეკიელი 12:1—28
12 კვლავ მეუწყა იეჰოვას სიტყვა:
2 „კაცის ძეო, ურჩ ხალხს შორის ცხოვრობ. თვალები აქვთ, რომ დაინახონ, მაგრამ ვერ ხედავენ, ყურები აქვთ, რომ მოისმინონ, მაგრამ არ ესმით,+ რადგან ურჩია ეს ხალხი.+
3 კაცის ძეო, ჩაალაგე ბარგი და მოემზადე გადასახლებისთვის. დღესვე წადი გადასახლებაში, ისე რომ დაგინახონ. მათ დასანახავად წადი გადასახლებაში, შენი სახლიდან სხვაგან. ეს ხალხი ურჩია, მაგრამ იქნებ დაფიქრდნენ.
4 გამოიტანე დღისით შენი ბარგი, გადასახლებისთვის გამზადებული ბარგი, ისე რომ დაგინახონ; მათ დასანახავად საღამოს წადი, ვითომ გადასახლებაში მიდიხარ.+
5 შემდეგ მათ დასანახავად გამოანგრიე კედელი და იქიდან გაიტანე შენი ბარგი.+
6 მათ თვალწინ აიკიდე და სიბნელეში წაიღე. სახე დაიფარე, რომ მიწა ვერ დაინახო; ნიშნად გაქცევ ისრაელისთვის“.+
7 მეც მიღებული ბრძანებისამებრ მოვიქეცი. დღისით გამოვიტანე ჩემი ბარგი, გადასახლებისთვის გამზადებული ბარგი; საღამოს საკუთარი ხელით გამოვანგრიე კედელი და, როცა დაბნელდა, ბარგი გამოვიტანე, მოვიკიდე მათ დასანახავად და წავედი.
8 დილით კვლავ მეუწყა იეჰოვას სიტყვა:
9 «კაცის ძეო, არ გკითხა ისრაელმა, ურჩმა ხალხმა, რას აკეთებო?
10 გადაეცი, აი, რას ამბობს-თქო უზენაესი უფალი იეჰოვა: „ეს არის განაჩენი იერუსალიმის თავკაცისა+ და იქ მცხოვრები ისრაელებისთვის“.
11 უთხარი მათ: „ნიშანი ვარ თქვენთვის.+ რაც მე გავაკეთე, მათაც იმავეს გაუკეთებენ. გადაასახლებენ მათ, ტყვედ წაასხამენ.+
12 მათი თავკაციც მოიკიდებს ბარგს და სიბნელეში წავა. კედელს გამოანგრევს და იქიდან გაიტანს ბარგს.+ სახეს დაიფარავს, რომ მიწა ვერ დაინახოს.
13 სანადირო ბადეს გავუშლი თავკაცს და შიგ გაებმება.+ წავიყვან მას ბაბილონში, ქალდეველთა მიწაზე, მაგრამ ვერ დაინახავს იმ მიწას; იქ მოკვდება ის.+
14 მის გარშემომყოფთ, მის დამხმარეთ და მის ჯარს ყველა მიმართულებით გავფანტავ+ და მახვილს დავადევნებ.+
15 როცა გავფანტავ ხალხებში და მიმოვფანტავ სხვადასხვა მიწაზე, მაშინ გაიგებენ, რომ მე ვარ იეჰოვა.
16 ცოტანი გადაურჩებიან მახვილს, შიმშილსა და ჭირს, რომ მთელ თავიანთ სისაძაგლეზე მოუყვნენ იმ ხალხებს, რომელთა შორისაც გაიფანტებიან; მაშინ მიხვდებიან, რომ მე ვარ იეჰოვა“».
17 კვლავ მეუწყა იეჰოვას სიტყვა:
18 «კაცის ძეო, კანკალით ჭამე პური და შფოთითა და წუხილით სვი წყალი.+
19 მაგ ხალხს გადაეცი, აი, რას ამბობს-თქო უზენაესი უფალი იეჰოვა ისრაელის მიწაზე მცხოვრებ იერუსალიმის მკვიდრებზე: „წუხილით შეჭამენ პურს და შიშით დალევენ წყალს; გავერანდება მიწა+ იქ მცხოვრებ მოძალადეთა გამო.+
20 განადგურდება დასახლებული ქალაქები და გაპარტახდება მიწა;+ გაიგებთ, რომ მე ვარ იეჰოვა“».+
21 კვლავ მეუწყა იეჰოვას სიტყვა:
22 «კაცის ძეო, ეს რა გამონათქვამი გაქვთ ისრაელში, დღე დღეს მისდევს, მაგრამ ხილვა არ სრულდებაო?!+
23 უთხარი მათ, აი, რას ამბობს-თქო უზენაესი უფალი იეჰოვა: „დავავიწყებ ხალხს ამ გამონათქვამს და მეტად აღარ იტყვიან მას ისრაელში“. გადაეცი მათ, ახლოვდება დრო,+ როცა ყველა ხილვა ახდება-თქო.
24 აღარ იქნება ისრაელში ცრუ ხილვა და ყურის მაამებელი მკითხაობა.+
25 „მე, იეჰოვა, ვიტყვი, და რასაც ვიტყვი, შესრულდება, არ დაყოვნდება;+ თქვენს დროს,+ ურჩო ხალხო, სიტყვას ვიტყვი და შევასრულებ“, — ამბობს უზენაესი უფალი იეჰოვა».
26 კვლავ მეუწყა იეჰოვას სიტყვა:
27 «კაცის ძეო, ისრაელები ამბობენ: ხილვა, რომელსაც ის ხედავს, შორეულ მომავალში შესრულდება, შორეულ მომავალზე წინასწარმეტყველებსო ის.+
28 ამიტომ გადაეცი მათ, აი, რას ამბობს-თქო უზენაესი უფალი იეჰოვა: „ჩემი ყველა სიტყვა დაუყოვნებლივ შესრულდება; რასაც ვიტყვი, ახდება“, — ამბობს უზენაესი უფალი იეჰოვა».
