SING UTAMA DIREMBUG
Piyé Tanggepané Gusti Allah bab Perang?
Apa jawabané pitakonan kuwi? Akèh wong nganggep nèk Gusti Allah seneng perang. Alesané merga ing Alkitab ana crita nèk Gusti Allah ngongkon umaté perang. Ning, ana sing mikir nèk Yésus mulang para muridé bèn nresnani mungsuh-mungsuhé. (Matéus 5:43, 44) Dadi, wong-wong kuwi mikir nèk tanggepané Gusti Allah bab perang jaman mbiyèn lan saiki béda. Saiki Gusti Allah ora seneng karo perang.
Piyé nurut panjenengan? Apa pancèn Gusti Allah seneng karo perang? Nèk iya, sapa sing dibélani Gusti Allah bèn menang perang ing jaman saiki? Nèk ngerti jawabané, kuwi isa nemtokké tanggepané awaké dhéwé bab perang. Contoné, nèk panjenengan mèlu perang lan ngerti nèk Gusti Allah bakal mbélani panjenengan, mesthiné panjenengan krasa seneng merga bakal menang. Ning, piyé perasaan panjenengan nèk Gusti Allah mbélani mungsuh panjenengan? Mesthiné panjenengan bakal mikir-mikir manèh jawabané, ta?
Jawaban kuwi penting banget. Nèk ngerti tanggepané Gusti Allah bab perang, kuwi bakal nemtokké tanggepan panjenengan bab Gusti Allah. Nèk panjenengan klebu wong-wong sing sengsara merga perang, panjenengan perlu ngerti jawaban saka pitakonan iki: Apa Gusti Allah sing ndhalangi perang sing marahi manungsa sengsara, lan malah ora perduli karo wong-wong sing sengsara?
Panjenengan mesthi ora nyangka nèk jawabané Alkitab béda banget karo pikirané wong-wong. Kèt mbiyèn nganti saiki, tanggepané Gusti Allah tetep padha. Ayo digatèkké kandhané Alkitab bab tanggepané Gusti Allah bab perang, ing jaman mbiyèn lan ing jaman wektu Yésus ing bumi. Kuwi mbantu awaké dhéwé ngerti tanggepané Gusti Allah bab perang ing jaman saiki, lan bab perang sing bakal ana mbésuk.
