1. Omongané Nabi Yésaya ing Yésaya 65:16 kuwi maksudé apa?

 NABI YÉSAYA nyebut Yéhuwah kuwi ”Gusti Allah sing bener”. Kata ”bener” ing basa asliné artiné ”amin”. (Yés. 65:​16, cathetan ngisor) Kata ”amin” artiné ”dadia kaya ngono” utawa ”mesthi kelakon”. Ing Alkitab, nèk kata ”amin” dienggo njelaské soal Yéhuwah utawa Yésus, kuwi artiné jaminan nèk sing diomongké Yéhuwah utawa Yésus kuwi mesthi bener. Dadi, omongané Yésaya kuwi maksudé: Kabèh ramalané Yéhuwah mesthi bakal kelakon. Yéhuwah terbukti selalu nepati janjiné.

2. Ngapa kok janjiné Yéhuwah soal masa depan isa dipercaya, lan pertanyaan-pertanyaan apa waé sing bakal dibahas?

² Apa janjiné Yéhuwah soal masa depan ya isa dipercaya? Apa jaminané? Kira-kira 800 taun sakwisé jamané Yésaya, Rasul Paulus ngomong, ”Gusti Allah ora isa ngapusi.” (Ibr. 6:18) Kaya sumur air tawar ora mungkin isa ngetokké air asin, Yéhuwah, Sumberé sing bener, ora mungkin ngomongké sing ora bener utawa ngapusi. Dadi, kabèh sing diomongké Yéhuwah termasuk janjiné soal masa depan, kuwi isa dipercaya. Saiki, ayo mbahas loro pertanyaan iki: Masa depan kaya apa sing  dijanjèkké Yéhuwah? Apa jaminané nèk janji kuwi mesthi dadi kenyataan?

3. (a) Janji apa sing dientèn-entèni umaté Yéhuwah? (Wahyu 21:​3, 4) (b) Piyé tanggepané wong-wong pas dicritani soal janji kuwi?

³ Sing arep dibahas iki janji sing dientèn-entèni umaté Yéhuwah. (Wacanen Wahyu 21:​3, 4.) Yéhuwah janji nèk sukmbèn ”ora bakal ana manèh kesusahan, tangisan, lan rasa lara. Malah, kematian ya ora bakal ana manèh”. Pas nginjil, awaké dhéwé kerep nganggo ayat iki kanggo njelaské soal Firdaus kuwi kaya apa. Terus, piyé tanggepané wong-wong? Akèh-akèhé ngomong nèk janji kuwi mémang apik, tapi kayané ora mungkin kelakon.

4. (a) Pas nyampèkké janjiné, Yéhuwah wis ngerti soal apa waé? (b) Sakliyané ngekèki janji, Yéhuwah ngekèki apa manèh?

⁴ Wektu ngongkon Rasul Yohanes nulis soal janji kuwi, Yéhuwah ngerti nèk janji kuwi bakal dicritak-critakké umaté Yéhuwah. Yéhuwah ya ngerti nèk ana akèh sing bakalé ora percaya janji kuwi isa kelakon. (Yés. 42:9; 60:2; 2 Kor. 4:​3, 4) Lha terus, piyé carané bèn awaké dhéwé lan wong liya isa yakin nèk janji ing Wahyu 21:​3, 4 kuwi isa kelakon? Yéhuwah ora mung ngekèki janji, tapi ya njamin nèk janji kuwi isa dipercaya.

5. Jaminané ana ing ayat endi, terus isiné apa?

⁵ Jaminané ana ing Wahyu 21:​5, 6a. Ing kono disebutké, ”Gusti Allah sing lungguh ing takhta kuwi kandha, ’Deloken. Aku nggawé kabèh dadi anyar.’ Dhèwèké ya kandha, ’Tulisen iki, merga omongan iki bener lan isa dipercaya.’ Dhèwèké ya ngomong karo aku, ’Kabèh kuwi wis kelakon. Aku iki Alfa lan Oméga, sing awal lan sing akhir.’”—Why. 21:​5, 6a.

6. Ngapa kok kata-kata ing Wahyu 21:​5, 6 isa dadi jaminan?

⁶ Ngapa kok ayat-ayat kuwi isa dadi jaminan? Ing ayat-ayat kuwi kaya-kayané Yéhuwah wis tandha tangan ing sèrtifikat sing njamin nèk janjiné mesthi bakal ditepati. Dadi, nèk Wahyu 21:​3, 4 kuwi isiné janjiné Gusti Allah, nèk ayat 5 karo 6 kuwi tandha tangané Yéhuwah sing njamin nèk janji kuwi mesthi bakal ditepati. Saiki, ayo mbahas kata-katané Yéhuwah sing dadi jaminan kuwi.

7. Kata-kata ing Wahyu 21:5 kuwi sing ngomong sapa, terus ngapa kok kuwi istiméwa?

⁷ Ing awal ayat 5 ana kata-kata, ”Gusti Allah sing lungguh ing takhta kuwi kandha.” (Why. 21:5a) Kata-kata iki istiméwa. Ing buku Wahyu, Yéhuwah ngomong langsung kuwi mung ping telu thok. Salah sijiné ana ing ayat iki. Dadi, jaminan iki sing ngomong dudu malaékat, dudu Yésus, tapi Yéhuwah dhéwé. Nah, Yéhuwah ”ora isa ngapusi”. (Tit. 1:2) Kuwi berarti kata-katané Yéhuwah, termasuk sing ing Wahyu 21:​5, 6 isa dipercaya.

8. Saka omongané Yéhuwah, apa buktiné nèk janjiné mesthi bakal kelakon? (Yésaya 46:10)

⁸ Terus Yéhuwah ngomong, ”Deloken.” (Why. 21:5) Ing basa asliné, kata ”deloken” kerep muncul ing buku Wahyu. Ana réferènsi sing nyebutké nèk kata ”deloken” kuwi digunakké ”bèn sing maca dadi nggatèkké tenanan kata-kata  selanjuté”. Mémangé, Gusti Allah bar kuwi ngomong apa? Gusti Allah ora ngomong, ”Aku arep nggawé kabèh dadi anyar.” Gusti Allah ngomongé, ”Aku nggawé kabèh dadi anyar.” Janjiné Yéhuwah mémang kelakoné isih sukmbèn, tapi saking pastiné, Yéhuwah ngomongé seolah-olah kuwi wis kelakon.—Wacanen Yésaya 46:10.

9. (a) Apa maksudé pas Yéhuwah ngomong ”Aku nggawé kabèh dadi anyar”? (b) ”Langit” lan ”bumi” sing ana saiki bakal diapakké?

⁹ Ing Wahyu 21:5 Yéhuwah ngomong, ”Aku nggawé kabèh dadi anyar.” Apa maksudé? Maksudé, sing lawas bakal disingkirké, terus diganti nganggo sing anyar. Sing lawas kuwi apa? Ing Wahyu 21:1 disebutké, ”Langit sing lawas lan bumi sing lawas wis ora ana.” ”Langit sing lawas” kuwi maksudé pamréntahané manungsa sing dipengaruhi Sétan lan hantu-hantuné. (Mat. 4:​8, 9; 1 Yoh. 5:19) Ing Alkitab, kata ”bumi” isa berarti wong-wong sing manggon ing bumi. (PD. 11:1; Mzm. 96:1) Dadi, ”bumi sing lawas” kuwi maksudé wong-wong sing jahat. Yéhuwah ora mung arep ndandani ”langit” lan ”bumi” sing ana saiki, tapi kuwi arep diganti total nganggo ”langit anyar lan bumi anyar”, yaiku pamréntahan sing anyar lan wong-wong sing bener.

10. Apa waé sing bakal digawé dadi anyar?

¹⁰ Ing Wahyu 21:5 Yéhuwah ora ngomong, ”Aku arep nggawé sing anyar.” Tapi Dhèwèké ngomong, ”Aku nggawé kabèh dadi anyar.” Kuwi berarti Yéhuwah bakal nggawé bumi dadi apik manèh. Kaya sing diramalké Yésaya, bumi bakal dadi kaya Taman Èden. Terus, kuwi ya berarti Yéhuwah bakal nggawé manungsa dadi sampurna manèh. Wong sing lumpuh, wuta, lan budheg, bakal bener-bener mari. Malah, sing mati ya bakal urip manèh.—Yés. 25:8; 35:​1-7.

11. Yéhuwah ngekèki Yohanes préntah apa, lan alesané apa?

¹¹ Yéhuwah ngekèki jaminan apa manèh? Yéhuwah ngongkon Yohanes, ”Tulisen iki, merga omongan iki bener lan isa dipercaya.” (Why. 21:5) Yéhuwah ora mung ngongkon Yohanes, ”Tulisen iki”, tapi ya ngandhani alesané ngapa kok kuwi kudu ditulis. Yéhuwah ngomong, ”Merga omongan iki bener lan isa dipercaya.” Maksudé, janjiné Yéhuwah mesthi bakal kelakon. Yohanes manut lan gelem nuliské janji kuwi. Hasilé, awaké dhéwé isa ngerti soal janjiné Yéhuwah lan berkah-berkahé.

12. Ngapa kok Yéhuwah ngomong, ”Kabèh kuwi wis kelakon”?

¹² Bar kuwi Yéhuwah ngomong, ”Kabèh kuwi wis kelakon.” (Why. 21:6) Ngapa kok Yéhuwah ngomong nèk janjiné wis kelakon? Soalé, ora ana sing isa ngalang-alangi Yéhuwah. Tujuané Yéhuwah mesthi dadi kenyataan. Terus, Yéhuwah ngekèki jaminan liyané manèh. Apa jaminané?

13. Apa maksudé Yéhuwah kuwi ”Alfa lan Oméga”?

¹³ Kaya sing disebutké mau, ing Wahyu sing ditampa Yohanes, Yéhuwah ngomong langsung kuwi mung ping telu.  (Why. 1:8; 21:​5, 6; 22:13) Saben ngomong, Yéhuwah mesthi nyebutké, ”Aku iki Alfa lan Oméga”. Alfa lan Oméga kuwi huruf pertama lan huruf terakhir ing abjad Yunani. Dadi, pas ngomong nèk Dhèwèké ”Alfa lan Oméga” kuwi maksudé nèk Yéhuwah wis memulai sesuatu, Dhèwèké mesthi bakal ngrampungké kuwi.

14. (a) Kapan Yéhuwah seolah-olah ngomong ”Alfa” lan ”Oméga”? (b) Ing Purwaning Dumadi 2:​1-3 ana jaminan apa?

¹⁴ Kapan Yéhuwah seolah-olah ngomong ”Alfa”? Kuwi pas Yéhuwah ngandhani Adam lan Hawa sing Dhèwèké karepké soal bumi lan manungsa. Ing Alkitab disebutké, ”Gusti Allah mberkahi manungsa lan kandha marang manungsa, ’Kowé kudu nduwé anak akèh. Kowé kudu ngebaki lan nguwasani bumi.’” (PD. 1:28) Terus, sukmbèn pas keturunané Adam lan Hawa sing manut wis dadi sampurna, ngebaki bumi, lan nggawé bumi dadi Firdaus, pas kuwi Yéhuwah seolah-olah ngomong ”Oméga”. Yéhuwah ya ngekèki jaminan nèk sing Dhèwèké karepké soal bumi lan manungsa kuwi mesthi bakal kelakon. Kuwi ditulis ing Purwaning Dumadi 2:​1-3. (Wacanen.) Bar rampung nyiptakké ”langit lan bumi sak isiné”, Yéhuwah ngomong nèk dina kepitu kuwi dina sing suci. Kuwi berarti, sing dikarepké Yéhuwah soal bumi lan manungsa bakal bener-bener kelakon pas akhir dina kepitu.

15. Apa sing isa waé marakké Sétan mikir nèk wis berhasil nggagalké tujuané Yéhuwah?

¹⁵ Karepé Yéhuwah kuwi bumi dikebaki karo keturunané Adam lan Hawa sing sampurna lan manut. Tapi bar  Adam lan Hawa mbrontak, meréka dadi dosa, terus keturunané ya dadi dosa lan mati. (Rm. 5:12) Isa waé Sétan mikir nèk dhèwèké wis berhasil nggagalké tujuané Gusti Allah lan Yéhuwah ora bakal isa ngomong ”Oméga”. Sétan ya isa waé mikir nèk palingan Yéhuwah mengko matèni Adam karo Hawa, terus nyiptakké pasangan manungsa liyané sing sampurna bèn sing Dhèwèké karepké kelakon. Nah nèk Yéhuwah kaya ngono, kuwi isa dienggo Sétan nudhuh nèk Yéhuwah wis ngapusi. Soalé ing Purwaning Dumadi 1:​28, Yéhuwah wis ngandhani nèk sing bakalé ngebaki bumi kuwi keturunané Adam lan Hawa.

16. Alesan apa manèh sing isa dienggo Sétan nudhuh nèk Yéhuwah wis gagal?

¹⁶ Sétan ya isa waé mikir mungkin Yéhuwah ngejarké Adam karo Hawa nduwé keturunan. Tapi, keturunané kuwi ora isa dadi sampurna. (Pkh. 7:20; Rm. 3:23) Nah nèk kuwi sing dipilih Yéhuwah, kuwi isa dienggo Sétan nudhuh nèk Yéhuwah wis gagal. Soalé, bumi ora bakal dikebaki karo keturunané Adam lan Hawa sing sampurna lan manut.

17. Bèn sing Dhèwèké karepké kelakon, Yéhuwah nduwé solusi apa, lan apa hasil akhiré? (Deloken gambar kanggo paragraf 17.)

¹⁷ Ternyata Yéhuwah nduwé solusi sing paling apik bèn sing Dhèwèké karepké kelakon. Sétan mungkin ora nyangka karo solusiné Yéhuwah kuwi. (Mzm. 92:5) Yéhuwah terbukti ora ngapusi merga akhiré Adam karo Hawa dijarké nduwé keturunan. Terus tujuané Yéhuwah ya terbukti ora gagal soalé Yéhuwah nggawé bèn ana ’keturunan’ sing isa nebus keturunané Adam lan Hawa sing manut bèn dadi sampurna manèh. (PD. 3:15; 22:18) Yéhuwah milih cara kuwi merga Dhèwèké sayang banget karo manungsa. (Mat. 20:28; Yoh. 3:16) Nah Sétan ora nduwé rasa sayang. Dhèwèké kuwi égois. Makané, Sétan mesthi ora nyangka nèk Yéhuwah bakal milih cara kuwi. Apa manfaaté merga ana tebusan? Pas akhir Pamréntahan Sèwu Tauné Yésus, keturunané Adam lan Hawa sing manut bakal dadi sampurna lan bumi dadi Firdaus kaya karepé  Yéhuwah sejak awal. Pas kuwi, Yéhuwah seolah-olah ngomong, ”Oméga”.

18. Yéhuwah ngekèki jaminan apa waé? (Deloken kothak ” Telung Jaminan saka Yéhuwah”.)

¹⁸ Ing artikel iki wis dibahas apa waé sing marakké awaké dhéwé yakin nèk bumi bakal dadi Firdaus. Terus bèn wong liya ya isa yakin, awaké dhéwé isa nyritakké telung jaminan apa? Sing pertama, Yéhuwah dhéwé sing janji. Ing buku Wahyu disebutké, ”Gusti Allah sing lungguh ing takhta kuwi kandha, ’Deloken. Aku nggawé kabèh dadi anyar.’” Yéhuwah isa lan péngin nggawé bèn janjiné kelakon. Keloro, saking pastiné janji kuwi, Yéhuwah ngomong, ”Omongan iki bener lan isa dipercaya. . . . Kabèh kuwi wis kelakon.” Ketelu, Yéhuwah ngomong, ”Aku iki Alfa lan Oméga.” Maksudé, nèk Yéhuwah wis memulai sesuatu, Dhèwèké mesthi ngrampungké kuwi. Yéhuwah bakal mbuktèkké nèk sing ngapusi kuwi Sétan lan Sétan ora isa nggagalké tujuané Yéhuwah.

19. Nèk ana sing ora percaya karo janjiné Yéhuwah soal Firdaus, njenengan isa njelaské apa?

¹⁹ Yéhuwah wis ngekèki jaminan nèk janjiné mesthi bakal kelakon. Semakin sering nyritakké kuwi, njenengan bakal tambah percaya karo Yéhuwah. Dadi, pas nginjil, nèk njenengan nyritakké soal janji ing Wahyu 21:4 terus wongé ora percaya, njenengan isa njelaské ayat 5 lan 6. Jelasna nèk Yéhuwah seolah-olah wis tandha tangan kanggo njamin nèk janjiné mesthi bakal kelakon.—Yés. 65:16.