Luwih saka 60 persèn tim penerjemah kerjané dudu ing kantor cabang, tapi ing kantor penerjemahan jarak jauh (RTO). Apa manfaaté RTO? Apa waé sing dibutuhké penerjemah sing kerja ing RTO? Merga kerjané ing dhaérah, saiki piyé terjemahané?

 Merga RTO kuwi ana ing dhaérah, para penerjemahé dadi kerep ketemu karo wong sing ngomong nganggo basa sing diterjemahké. Karin, penerjemah basa Jerman dialèk Utara, crita, ”Bar pindhah ing RTO Cuauhtémoc, Chihuahua, Meksiko, kami ngomongé mesthi nganggo basa Jerman dialèk Utara. Misalé pas ngomong karo penerjemah liyané, pas nginjil, utawa pas blanja. Merga kabèh wong ing kéné ngomong nganggo basa kuwi, kami dadi krungu manèh kata-kata sing mauné kami wis ora tau krungu. Kami dadi ngerti saiki wong-wong ngomongé piyé.”

 James sing nglayani ing RTO basa Frafra ing Ghana ngomong nèk sakjané kangen karo sedulur-sedulur ing kantor cabang. Tapi dhèwèké ya ngomong, ”Aku seneng kerja ing RTO. Ing kéné aku dadi isa nginjil nganggo basa dhaérah. Aku seneng ndelok tanggepané wong-wong wektu krungu kabar apik ing basané.”

 Panggonan sing cocog dienggo RTO kuwi sing kaya piyé? Joseph, anggota Departemèn Rancang/Bangun Sedunia ing Warwick, New York, Amerika Serikat, ngomong, ”Ing beberapa dhaérah, masalahé kuwi ora ana listrik, banyu, utawa Internèt. Dadi, ora isa download bahan-bahan sing arep diterjemahké. Makané pas arep nentokké panggonané, pilihané ana beberapa.”

 Sing paling gampang lan paling hémat kuwi nèk RTO-né nganggo Balai Pertemuan, Balai Ibadah, utawa omahé utusan injil. Tapi, para penerjemahé ora manggon ing kono. Tapi nèk ora ana bangunan sing kaya ngono, mungkin isa tuku apartemèn utawa kantor sing isa dadi tempat tinggal lan dienggo kerja. Nèk mengko ana perubahan, kuwi isa diedol manèh, terus dhuwité isa dienggo liyané.

 Selama taun dinas 2020, organisasi ngetokké kira-kira 186 milyar rupiah dienggo RTO. Para sedulur ing RTO butuh komputer, software, peralatan rekaman, Internèt, lan liyané. Misalé komputer siji waé regané 10,7 juta rupiah, lan kuwi wis termasuk software-é. Terus ing komputer kuwi ya ana program Watchtower Translation System sing dienggo para penerjemah bèn isa éntuk bahan-bahan kanggo diterjemahké.

 Para penerjemah ya éntuk alat-alat kanggo rekaman. Alat-alat kuwi bermanfaat banget khususé selama pandemi COVID-19, soalé kuwi isa digawa mulih karo para penerjemah. Dadi, para penerjemah tetep isa rekaman audio lan vidéo saka omahé.

 Para sedulur ya kerep dijaluki tulung dienggo ngekèki saran kanggo terjemahané lan ngopèni RTO. Cirstin, sing nglayani ing RTO basa Afrikaans ing Cape Town, Afrika Selatan, ngomong, ”Para sedulur, termasuk perintis biasa, ya isa mbantu ing kéné.”

 Akèh sedulur sing seneng banget mbantu ing RTO. Ana sedulur wédok sing ngomong nèk mbantu ing RTO kuwi marahi dhèwèké semangat. Terus beberapa sedulur ya isa dadi pengisi suara. Juana, penerjemah basa Totonac ing Veracruz, Meksiko, ngomong, ”Merga RTO-né cedhak karo para sedulur sing nganggo basa iki, kami dadi luwih gampang kanggo njaluk bantuané para sedulur kuwi dienggo rekaman audio lan vidéo.”

 Merga kerjané ing dhaérah, saiki piyé terjemahané? Akèh sing ngomong nèk terjemahané dadi luwih apik. Cédric, sing nglayani ing RTO basa Kongo ing Republik Demokratik Kongo, crita, ”Mbiyèn para sedulur ngomong nèk basa ing buku-bukuné awaké dhéwé kuwi ’basa organisasi’, merga wong-wong ora biasa ngomong kaya ngono. Tapi saiki, basané dadi luwih modèrn, kaya sing biasané diomongké wong-wong.”

 Andile, sing nglayani ing RTO basa Xhosa ing Afrika Selatan, ya ngomong, ”Akèh sing ngomong nèk terjemahané dadi luwih apik. Malah, bocah-bocah sing mauné maca Warta Penting ing basa Inggris, saiki macané nganggo basa Xhosa. Bocah-bocah kuwi seneng banget maca Terjemahan Donya Anyar édhisi révisi merga basané kaya sing biasa diomongké.”

 Biaya kanggo RTO, termasuk dienggo ngrawat bangunané lan dienggo nyukupi kebutuhané sing nglayani ing kono kuwi saka sumbangané njenengan, termasuk sing liwat donate.jw.org.