1.  Apa sing Dimaksud Babilon Gedhé?

2.  Kapan Mésias Ana ing Bumi?

3.  Prosedur Mèdis sing Nganggo Getih

4.  Pisah karo Bojoné

5.  Hari Raya lan Perayaan

6.  Penyakit Menular

7.  Urusan Bisnis lan Hukum

 1. Apa sing Dimaksud Babilon Gedhé?

Apa buktiné nèk wong wédok sing jenengé ”Babilon Gedhé” kuwi maksudé kabèh agama palsu? (Wahyu 17:5) Menurut Alkitab, Babilon Gedhé . . .

• nduwé kuwasa lan pengaruh sing gedhé sak donya. Babilon Gedhé digambarké lagi nglungguhi ’akèh bangsa lan rakyat’. Dhèwèké kuwi ”kutha gedhé sing nguwasani raja-raja ing bumi”.​—Wahyu 17:15, 18.

• dudu organisasi politik utawa perdagangan. Soalé ”raja-raja ing bumi” lan ”para pedagang” isih tetep ana wektu dhèwèké disingkirké.​—Wahyu 18:9, 15.

• nggawé èlèk jenengé Gusti Allah. Dhèwèké disebut ”pelacur” soalé kerja sama karo pemerintah bèn isa éntuk dhuwit lan keuntungan liyané. (Wahyu 17:1, 2) Dhèwèké wis nyesatké akèh wong. Dhèwèké ya nyebabké akèh wong mati.​—Wahyu 18:23, 24.

Bukak manèh pelajaran 13 nomer 6

 2. Kapan Mésias Ana ing Bumi?

Ing Alkitab ana ramalan nèk Mésias bakal teka sakwisé 69 minggu.​—Wacanen Danièl 9:25.

• Kapan 69 minggu kuwi dimulai? Taun 455 SM. Wektu kuwi, Gubernur Néhémia teka ing Yérusalèm ”kanggo mbangun manèh Yérusalèm bèn dadi kaya sakdurungé”.​—Danièl 9:25; Néhémia 2:1, 5-8.

• Terus, 69 minggu kuwi pirang taun? Ing beberapa ramalan Alkitab, sedina maksudé setaun. (Wilangan 14:34; Yèhèzkièl 4:6) Kuwi berarti seminggu suwéné pitung taun. Dadi, 69 minggu ing ramalan kuwi suwéné 483 taun (69 x 7).

• Kapan 69 minggu kuwi rampung? Nèk ngétung 483 taun saka taun 455 SM, ketemu taun 29 M. a Ya pas taun kuwi Yésus dibaptis lan dadi Mésias.​—Lukas 3:1, 2, 21, 22.

Bukak manèh pelajaran 15 nomer 5

 3. Prosedur Mèdis sing Nganggo Getih

Ana prosedur mèdis sing nganggo getihé dhéwé. Awaké dhéwé jelas ora bakal gelem donor darah utawa nyimpen getihé dhéwé bèn isa dienggo wektu arep operasi.​—Pangandharing Torèt 15:23.

Tapi, isa waé awaké dhéwé gelem nampa beberapa prosedur mèdis, misalé tès darah, cuci darah (hémodialisis), utawa pengèncèran darah (hémodilusi). Terus, ya ana sing gelem nganggo mesin penyelamatan sèl utawa mesin pengganti jantung lan paru-paru. Awaké dhéwé kudu mutuské piyé getihé awaké dhéwé bakal dienggo wektu operasi, tès keséhatan, utawa terapi. Carané saben dokter mungkin béda-béda. Mulané sakdurungé nggawé keputusan, awaké dhéwé kudu nggolèk keterangan soal piyé getihé awaké dhéwé bakal dienggo wektu operasi, tès keséhatan, utawa terapi. Awaké dhéwé isa mikirké sik pertanyaan-pertanyaan iki:

• Piyé nèk pas nglakoni prosedur mèdis kuwi, sebagian getihku dialirké metu saka awakku, terus alirané mandheg sedhéla? Apa aku bakal nganggep getih kuwi bagian saka awakku lan ora perlu ’diesokké ing lemah’?​—Pangandharing Torèt 12:23, 24.

• Piyé nèk pas nglakoni prosedur mèdis kuwi, sebagian getihku dialirké metu, diresiki, terus dilebokké manèh ing awakku? Saka sing tak pelajari ing Alkitab, piyé hati nuraniku pas nampa prosedur mèdis kuwi? Dadi ngrasa pénak utawa malah dadi ora pénak?

Bukak manèh pelajaran 39 nomer 3

 4. Pisah karo Bojoné

Menurut Alkitab, wong sing wis nikah sakjané ora éntuk pisah. Tapi nèk mémang kudu pisahan, loro-loroné ora éntuk nikah manèh karo wong liya. (1 Korintus 7:10, 11) Wong Kristen isa mutuské pisahan nèk bojoné:

• Sengaja ora ngopèni: Wong lanang ora gelem nyukupi kebutuhan keluargané nganti keluargané ora kopèn.​—1 Timotius 5:8.

• Seneng nganiaya: Bojoné seneng KDRT nganti dhèwèké luka-luka, babak belur, utawa nyawané terancam.​—Galatia 5:19-21.

• Meksa bèn nglanggar pathokané Yéhuwah: Nganti ora isa nglayani Yéhuwah.​—Kisah 5:29.

Bukak manèh pelajaran 42 nomer 3

  5. Hari Raya lan Perayaan

Nèk hari raya sing jelas-jelas dilarang Yéhuwah, awaké dhéwé ora ngrayakké. Tapi, ana keadaan-keadaan tertentu pas hari raya sing kudu diputuské dhéwé nganggo hati nurani sing sesuai karo pathokan ing Alkitab. Apa waé contoné?

• Nèk ana sing ngucapké selamat. Ngomong waé, ”Maturnuwun”. Tapi nèk wongé péngin ngerti luwih akèh ngapa kok awaké dhéwé ora ngrayakké, ya dijelaské.

• Nèk bojo sing ora seiman ngejak mangan bareng karo keluarga pas hari raya. Nèk hati nuraniné pénak, ya ora apa-apa. Tapi dijelaské sik, mengko nèk ing acara kuwi ana kebiasaan sing dhasaré ora saka Alkitab, awaké dhéwé ora mèlu.

• Nèk dikèki bonus karo majikan pas hari raya. Kuwi ora kudu ditolak. Awaké dhéwé kudu mikirké, ’Apa bonus kuwi ana hubungané karo hari raya utawa mung merga majikanku seneng karo kerja kerasku?’

• Nèk dikèki hadiah pas hari raya. Mungkin sing ngekèki kuwi ngomong, ”Aku ngerti kowé ora ngrayakké, tapi aku tetep péngin ngekèki kowé.” Mungkin wong kuwi mémang tulus péngin ngekèki. Tapi, isa waé dhèwèké sakjané péngin bèn awaké dhéwé ya mèlu ngrayakké. Kuwi sing kudu dipikirké sakdurungé nampa hadiahé. Wektu nggawé keputusan, sing paling penting hati nuraniné awaké dhéwé tetep ngrasa pénak, lan awaké dhéwé tetep setya karo Yéhuwah.​—Kisah 23:1.

Bukak manèh pelajaran 44 nomer 1

 6. Penyakit Menular

Mungkin awaké dhéwé nduwé penyakit menular utawa lagi ngrasakké gejalané. Merga sayang wong liya, awaké dhéwé mesthi ngati-ati bèn aja nganti nular-nulari. Kuwi cocog karo préntah ing Alkitab, ”Kowé kudu nresnani wong liya kaya nresnani awakmu dhéwé”.​—Roma 13:8-10.

Piyé praktèké? Nèk nduwé penyakit menular, aja salaman, lan aja ngrangkul utawa ngambung wong liya. Nèk wong liya ora péngin ketularan, terus awaké dhéwé ora diundang ing omahé, ya aja nesu. Terus nèk mèh dibaptis kudu ngandhani koordinator badan pinituwa soal penyakité. Bèn mengko pas dibaptis, pinituwa isa ngatur bèn wong liya ora ketularan. Nèk mungkin wis kena penyakit menular, ya kudu gelem tès darah sik sakdurungé mulai pacaran. Kuwi kabèh bukti nèk awaké dhéwé ’nggatèkké kepentingané wong liya, dudu mung kepentingané dhéwé’.​—Filipi 2:4.

Bukak manèh pelajaran 56 nomer 2

 7. Urusan Bisnis lan Hukum

Bèn ora ana masalah wektu urusan soal dhuwit utawa bisnis, apiké nggawé perjanjian tertulis sik. Termasuk nèk kuwi urusan karo sedulur seiman. (Yérémia 32:9-12) Tapi nèk tetep ana masalah, ya kudu ndang dirampungi apik-apik karo wongé.

Lha terus, piyé nèk misalé ditipu utawa difitnah sedulur seiman? (Wacanen Matius 18:15-17.) Menurut Yésus, awaké dhéwé kudu:

1. Ngrampungké masalahé sik karo wongé.​—Deloken ayat 15.

2. Nèk kuwi ora berhasil, isa ngejak siji utawa loro sedulur sing isa dipercaya kanggo nemoni wongé.​—Deloken ayat 16.

3. Nèk tetep ora berhasil, lagi njaluk bantuané para pinituwa.​—Deloken ayat 17.

Biasané nèk ana masalah bisnis karo sedulur seiman ora perlu nganti tekan pengadilan. Soalé kuwi isa nggawé wong liya mikir èlèk soal Yéhuwah lan organisasiné. (1 Korintus 6:1-8) Tapi, mungkin ana masalah sing kudu dirampungké ing pengadilan. Misalé, perceraian, hak asuh anak, pemberian nafkah cerai, masalah klaim asuransi, bangkrut, utawa soal surat wasiat. Nèk mémang masalah kuwi kudu dirampungké ing pengadilan, kuwi ora nglanggar pathokan ing Alkitab.

Terus, masalah pemerkosaan, pelècèhan anak, penganiayaan, perampokan, utawa pembunuhan, ya isa dilaporké polisi. Kuwi ora nglanggar pathokan ing Alkitab.

Bukak manèh pelajaran 56 nomer 3