Bèn séhat, manungsa butuh mineral, misalé kalsium. Tapi jumlahé mineral sing dibutuhké kuwi isa béda-béda, bergantung karo umur, jenis kelamin, lan liya-liyané. Nèk ngono, piyé carané tubuh isa ngatur bèn jumlahé mineral ing njero getih ora kakèhan utawa kesithikan?

 Tubuh ngatur jumlahé mineral liwat hormon. Hormon kuwi zat kimia sing fungsiné nggawé organ-organ tubuh berfungsi normal. Nah, wong sing séhat biasané isa ngasilké, nyimpen, utawa ngetokké cadangan hormon, terus kuwi dialirké liwat getih. Meskipun hormon sing ditokké jumlahé sithik, tapi pengaruhé gedhé kanggo tubuhé manungsa. Ing Encyclopedia Britannica disebutké nèk jumlahé hormon sing ditokké selalu sesuai kebutuhan lan prosèsé ya rumit.

 Salah siji contoné ngéné. Ing guluné manungsa ana kelenjar paratiroid sing biasané jumlahé ana papat. Kelenjar iki ukurané cilik banget, kira-kira mung sak butir beras. Kelenjar iki fungsiné ngatur bèn jumlahé kalsium ing njero getih ora kakèhan utawa kesithikan. Carané piyé?

 Pas tubuh kekurangan kalsium, kelenjar paratiroid bakal ngetokké hormon sing isa nggawé tulang ngetokké cadangan kalsium. Prosès iki cepet banget, isa mung beberapa detik thok. Terus, hormon iki ya nggawé ginjal ora mbuwang kalsium lan nggawé usus menyerap luwih akèh kalsium saka panganan.

 Tapi nèk jumlahé kalsium kakèhan, kelenjar liyané sing jenengé kelenjar tiroid bakal ngetokké hormon sing bakal nggawé tulang menyerap lan nyimpen kalsium luwih akèh. Terus, hormon iki ya nggawé ginjal mbuwang kalsium sing ora dibutuhké karo tubuh.

 Iki mung loro conto hormon sing nggawé organ tubuh isa berfungsi normal. Tapi sakjané, ana 100 luwih hormon sing dihasilké karo tubuhé manungsa.

 Piyé menurut njenengan? Apa kemampuané tubuh kanggo ngasilké hormon kuwi hasil évolusi? Utawa, apa iki dirancang?