Nof piipl did fiil se fi di laas 30 ier, di konchri dem aal uova di worl did a wok aad fi liv iina piis wid dem wan aneda. Bot piipl no so shuor bout dat agen kaaz a som tingz we a gwaan fram wa die ya. Ier dem nyuuz ya:

•   “Ezbola iina Lebanan an Izrel a faiya shat afta dem wan aneda an piipl a fret se muo konchri a-go get iina di Gaaza waar.”—Dis a fram Reuters, Janiweri 6, 2024.

•   “Iran, Rosha, an Chaina ton big fren an kaaz a dat di konchri dem iina di Wes a fret. Pan tap a dat, Iran gaan bak gaan mek tingz we dem kyan yuuz fi mek nyuuklier bum, an dem av som likl gruup gruup we dem a kanchuol we a fait iina difrant difrant plies.”—Dis a fram The New York Times, Janiweri 7, 2024.

•   “Rosha no tap jrap bum an dem sitn de pan Yuukrien.”—Dis a fram UN News, Janiweri 11, 2024.

•   “Wen it kom aan tu moni an dem aami, Chaina a get chrangga an chrangga. Den yu av Taiwan we fiil se Chaina no fi a ruul dem. Pan tap a dat, di govament a Chaina an di govament a Merika iina bie kyas-kyas, an aal a dis jos mek piipl fried se sitn mait apm bitwiin dem wan die.”—Dis a fram The Japan Times, Janiweri 9, 2024.

 So aal a dem ting ya we a gwaan wid di govament dem, yu tingk di Baibl av notn fi se bout dat? Yu tingk aal a di konchri dem a-go en op a fait iina wan big waar wan die?

 A no laik se di Baibl did lis out di difrant difrant waar dem we wudaana gwaan iina fi wi taim ya nou. Bot di Baibl did tel wi se iina fi wi taim, “di piipl dem pan ort [wuda] ton gens dem wan aneda an kil aaf dem wan aneda iina waar.”—Revilieshan 6:4.

 Iina di Baibl, Daniyel did mek wi nuo se wen “di en de nier,” di govament dem wid di muos powa wuda iina wan ron gens ting fi pruuv a wich wan a dem a di badis. Kaa dem a “fait wid” dem wan aneda, dem wuda afi spen uol iip a moni a bil op dem aami dem.—Daniyel 11:40, 42, 43.

 Di Baibl mek wi nuo se di ting dem we a gwaan iina di worl a-go get wos bifuo dem get beta. Jiizas did tel wi bout wan taim we a kom wen “piipl a-go sofa bad bad. Sofarieshan neva so wikid fram di worl a mek til nou.” (Matyu 24:21) Di laas paat a da wos sofarieshan de a-go bi di waar we di Baibl kaal Aamagedan. Azkaadn tu di Baibl, dat a “di waar we a-go apm pan di big die wen Gad, we muo powaful dan evribadi, a-go joj piipl.”—Revilieshan 16:14, 16.

 Bot wi no afi fried se da Aamagedan waar de a kom fi kil aaf evribadi pan di ort. Nuo sa, a siev Aamagedan a-go siev piipl, kaa Gad a-go yuuz Aamagedan fi get rid a aal a di govament dem we de pan ort ya nou. An a dem sed govament ya kaaz nof a di waar dem we kil aaf piipl. Gad a-go yuuz Aamagedan fi mek wi av piis kyaahn don. Fi fain out ou dat a-go apm, riid dem ya:

•   “What Is the Battle of Armageddon?”

•   “Armageddon Is Good News!”