1. (a) A wa Jeuova waahn wi wiet pan? (b) A wa it miin fi “wiet pan Jeuova”? (Luk iina di paat we niem “Dis Miin Se.”)

 JEUOVA gi evribadi we lov im sitn nais fi luk faawod tu. Suun suun, im a-go mek shuor se nobadi no sik agen, an notn naa go mek nobadi ala ar baal, an nobadi naa go ded agen. (Rev. 21:3, 4) Im a-go elp “di wan dem we ombl” uu de wiet pan im fi ton di ort iina wan paradais. (Sa. 37:9-11) An im a-go mek di wol a wi kyan get kluos kluos tu im, iivn kluosa dan rait ya nou. Dem taim de a-go nais, no chuu? Ye man! Dat a sitn nais fi luk faawod tu. Bot wa mek wi nuo se dem sitn ya a-go apm fi chuu? Wi nuo kaa eniting we Jeuova se a-go apm a so it a-go go fi chuu. So wi si wa mek wi fi “wiet pan Jeuova.” b (Sa. 27:14) So wi fi gwaan wiet pan di sitn dem we Jeuova se a-go apm, an wi fi api wen wi a wiet.​—Aiz. 55:10, 11.

2. Wa Jeuova a du aredi?

² Jeuova don du tingz fi mek wi si se im a-go du wa im se im a-go du. Si wan gud riizn ya we mek wi se so. Iina di Baibl buk we niem Revilieshan, Jeuova did pramis wi se im a-go mek piipl fram evri konchri, chraib, an piipl we chat aal kain-a difrant difrant langwij kom worship im. Wi si se a dat a apm tide. An da gruup a piipl ya, di Baibl kaal dem wan “big kroud a piipl.” (Rev. 7:9, 10) Aalduo da gruup a piipl ya av man, uman an pikni iina it, an dem  kom fram difrant difrant plies an luk difrant, di wol a dem liv iina piis wid dem wan aneda. (Sa. 133:1; Jan 10:16) Di big kroud a piipl a priich Gad Wod aad aad. Dem eva redi fi tel ada piipl se wan beta worl suun kom. (Mat. 28:19, 20; Rev. 14:6, 7; 22:17) Ef yu a paat a da big kroud a piipl de, wi na’afi aks ef dat miin nof tu yu.

3. A wa Sietan waahn fi apm?

³ Di Devl no waahn yu wiet pan Jeuova. Wa im waahn a fi yu no biliiv se Jeuova kier bout yu, an se Jeuova naa go du notn we im se im a-go du. Ef wi lou Sietan fi mek wi tingk dem wie de, wi a-go gi op an jrap wi an dem, an wi mait-a aal tap sorv Jeuova tu. Wi a-go si se a dat Sietan did waahn Juob fi du. Im chrai fi mek im tap wiet pan Jeuova an tap sorv Im tu.

4. Wa wi a-go luk pan iina da lesn ya? (Juob 1:9-12)

⁴ Iina da lesn ya, wi a-go luk pan ou Sietan chrai fi mek Juob tap sorv Jeuova. (Riid Juob 1:9-12.) Den wi a-go luk pan wa wi kyan lorn fram wa Juob did go chuu, an wa mek wi afi memba se Jeuova lov wi an im a-go du wa im se im a-go du.

5-6. Iina no taim wa an wa did apm tu Juob?

⁵ Laif did a gwaan gud fi Juob. Im an Jeuova did a gud gud fren. Im did av wan big fambili an di uol a dem did lov dem wan aneda. An im did av uol iip a moni an dem ting de tu. (Juob 1:1-5) Bot iina jos wan die, Juob aalmuos luuz evriting. Di fos ting we im luuz a im moni an dem ting de. (Juob 1:13-17) Den di uol a im pikni dem ded aaf. Jos tingk bout aal a wa im did go chuu, kaa wen sumadi pikni ded ino, it kyan mash dem op bad. So jos tingk bout ou Juob an im waif did fiil wen dem ier se aal a dem ten pikni dem ded aaf kaa ous tier dong pan di wol a dem. Wi kyan si wa mek wen Juob ier wa apm, im tier op di kluoz we im did av aan an staat fi ala an baal an jrap a grong.​—Juob 1:18-20.

⁶ Di neks ting we Sietan du a fi mek Juob get sik bad iina wan wie we mek piipl skaan im. (Juob 2:6-8; 7:5) Yu si bifuo dat did apm, iina di ieriya we Juob did liv, evribadi did rispek im. Piipl aalwiez go tu im wid dem prablem fi im tel dem wa fi du. (Juob 31:18) Nou evribadi skaan im, so dem neehn go nier im. Aal im uona breda dem, an im kluos fren dem, aal di sumadi dem we wok fi im iina im ous​—aal a dem staat fi skaan im an tan we fram im.​—Juob 19:13, 14, 16.

7. (a) Wa Juob did biliiv se a kaaz im fi sofa, bot wa im stil neehn du? (b) Wa a sitn we wan Kristiyan mait-a go chuu we komiin laik wa wi si iina di picha?

⁷ Sietan did waahn Juob fi biliiv se im a sofa kaa im naa du wa Jeuova waahn im fi du so Jeuova no api wid im agen. Wan a di ting dem we Sietan did du a das im yuuz wan chrang briiz fi tier dong di ous pan Juob ten pikni dem we did iin de a nyam fuud. (Juob 1:18, 19) Sietan aal mek faiya kom outa di skai we kil aaf di uol a Juob animal dem an di man dem we a tek kier a di animal dem tu. (Juob 1:16) Chuu di briiz an di faiya did a kum outa di skai, yu kuda si se a no notn naamal. So Juob did fiil se a Jeuova did a dwi’it. An kaaz a dis, Juob biliiv se im did du sitn fi ort Jeuova. Iivn duo a so im did  fiil im neva kos Jeuova. Juob did nuo se a uol iip a ierz nou Jeuova a du nof gud sitn fi im. So im did a se tu imself se, aal laik ou im did a tek di gud sitn dem we Jeuova did a gi’im, im kyan tek di bad we im a get nou tu. So im se: “Mek Jeuova niem stil get di big op we it fi get.” (Juob 1:20, 21; 2:10) Aalduo Juob did go chuu dem sitn ya, im stil did a tan op chrang. Bot yu tingk Sietan did don wid im? Nuo sa! Im stil neehn don wid im.

8. Wa a wan neks ting Sietan did yuuz pan Juob?

⁸ Sietan yuuz sitn els pan Juob. Im inviigl chrii a Juob frenimi dem fi kom tel im som tingz we wuda mek im fiil woklis. Dem did a se Juob a sofa kaa im a du tingz fi sin gens Gad. (Juob 22:5-9) Dem aal tel im se aal ef im neehn du notn, it no mek no sens im chrai fi du notn fi mek Gad api wid im kaa Gad no waahn av notn fi du wid im. (Juob 4:18; 22:2, 3; 25:4) Wa dem did a chrai fi du a mek Juob fiil se Gad no lov im an Gad naa go tek kier a im, so it no mek no sens im sorv Gad. Wa dem did a se tu Juob kuda mek Juob fiil laik se im laif don fa so it no mek sens im wiet pan Jeuova.

9. Wa did elp Juob fi tan op chrang an no fried?

⁹ Tingk bout dis: Juob sidong iina di ashiz an pien a waks im. (Juob 2:8) An im frenimi dem a chrai aad fi mek im fiil bad bout imself an a chrai mash op im gud niem. Di prablem dem we im go chuu did komiin laik a wan bordn did de pan im ed. Plos im did stil a fiil it bad, kaa im did stil fiil laik se iina im a tier op kaa im ten pikni dem did ded aaf. Juob sidong an neehn a se notn tu nobadi. (Juob 2:13–3:1) Ef Juob frenimi dem did fiil se chuu im sidong an neehn a se notn tu nobadi miin se im a-go ton im bak pan Di Wan We Mek im, dem mek a  sad mistiek. Wan a di taim, Juob mait-a did a uol op im ed an a luk pan im frenimi dem wen im se: “Mi rada ded fos, dan ton mi bak pan Gad!” (Juob 27:5) A wa yu tingk elp Juob fi tan op so chrang an no fried? Aalduo im did a sofa so moch, iivn wen im did de pan im fies, im neva tap wiet pan Jeuova an luk tu im fi elp im kaa im nuo se Gad lov im. Im did nuo se aal ef im en op ded, Jeuova kyan mek im kom bak alaiv agen.​—Juob 14:13-15.

10. Wa wi lorn fram wa Juob did go chuu?

¹⁰ Wa wi riid bout Juob mek wi si se Sietan kyaahn fuos nobadi fi ton dem bak pan Jeuova, an Jeuova nuo evriting we a gwaan wid wi. Wen wi luk pan aal a wa did apm tu Juob, it elp wi fi andastan wa mek im did afi go chuu aal a wa im did go chuu. Mek wi luk pan som sitn we wi kyan lorn fram Juob.

11. Ef wi gwaan chos iina Jeuova, wa wi kyan shuor bout? (Jiemz 4:7)

¹¹ Juob mek wi si se ef wi gwaan chos iina Jeuova, wi kyan go chuu aal kain-a prablem an tan op chrang gens Sietan. An di Baibl tel wi se wen wi du dat, Sietan wi ron we fram wi.​—Riid Jiemz 4:7.

12. Kaa Juob did nuo se ded piipl kyan kom bak alaiv agen, ou dat did mek im tan op chrang?

¹² Wi afi eng aan an wiet pan Jeuova kaa wi nuo se im a-go mek ded piipl kom bak alaiv agen. Memba se iina di laas lesn we wi du, wi fain out se Sietan kyan chrai fi mek wi ton wi bak pan Jeuova ef wi fried fi ded. An a dat im did chrai wid Juob, kaa im did a se Juob wuda du eniting​—iivn ton im bak pan Gad​—jos kaa im no waahn ded. Bot Sietan did rang. Kaa aal wen Juob did fiil laik se im a-go ded, im stil neehn ton im bak pan Gad. Kaa im nuo se Jeuova gud an im a-go du di rait ting, im neehn fiil no wie fi wiet pan Jeuova. Juob did biliiv se ef tingz no wok out nou an im en op ded, Jeuova a-go mek im kom bak alaiv iina di fyuucha. Juob did shuor se ded piipl kyan kom bak alaiv an a dat mek im kuda wiet pan Jeuova. Ef wi fiil laik ou Juob did fiil se ded piipl a-go kom bak alaiv agen, aal ef wi fiil laik se wi a-go ded, wi naa go ton wi bak pan Jeuova.

13. Wa mek wi fi tek iin wa Sietan du tu Juob?

¹³ Wi afi mek shuor se wi a tek iin wa Sietan du tu Juob kaa a di siem ting im a-go chrai pan wi tide. Luk pan wa Sietan did se: “Wan man wi gi op evriting we im av fi siev im laif.” (Juob 2:4, 5) So a no onggl Juob im a taak. Wa Sietan riili a se a dat wi no lov Jeuova so wi a-go ton wi bak pan im jos fi siev wi laif. Im aal se Gad no lov wi an eniting we wi a du fi mek im api im no bizniz wid dat. Bot wi we a wiet pan Jeuova naa mek Sietan kech wi.

14. Wen wi a go chuu aad taim, wa dat kyan shuo wi? An wa dis komiin laik?

¹⁴ Wen wi a go chuu aal kain-a prablem an aad taimz, wi fi yuuz dem taim de fi nuo uu wi riili bi. Di sitn dem we Juob did go chuu did elp im fi si wa im niid fi wok pan. Wan a di ting dem we Juob did si se im afi wok pan, a das im afi go wok likl aada fi bi ombl. (Juob 42:3) A di siem ting wid wi. Wen wi a go chuu aal kain-a prablem, wi kyan si wa wi fi wok pan tu. Wan breda we niem Nikolay c we did sik bad an we dem did lak op iina prizn se: “Yu si wen yu ga’a prizn, it komiin laik a eks-chrie yu go du, kaa it shuo op aal a yu  wiez dem, so yu kyan go si wa yu fi wok pan.” An wen yu si uu yu riili bi, yu afi wok aad fi chienj yu wiez dem.

15. A uu wi fi lisn tu, an wa mek?

¹⁵ Wi fi lisn tu Jeuova. Wi no fi lisn tu wi enimi dem we a fait gens wi. Juob did lisn gud wen Jeuova did a taak tu im. It komiin laik Gad did a se tu Juob se: ‘Yu si mi powa we mi yuuz fi mek evriting, duohn? So mi nuo evriting we a gwaan wid yu. Yu riili tingk se mi kyaahn tek kier a yu?’ Juob ombl imself an shuo Jeuova se im tangk Im fi aal a di gud sitn dem we Im du fi im. Juob se: “A onggl ier mi did ier bout yu ino, bot nou a laik se mi a si yu wid mi uona tuu yai dem.” (Juob 42:5) Yu memba wich paat Juob did de wen im se dis? A dong iina di ashiz im did sidong ino. An di wol a im badi did fasi-fasi, an aal a im pikni dem did ded aaf. Wid aal a dis we Juob did a go chuu, Jeuova mek Juob nuo se Im lov im an Im api wid wa im a du.​—Juob 42:7, 8.

16. Azkaadn tu Aizaiya 49:15, 16, wa wi fi memba wen wi a go chuu wi prablem dem?

¹⁶ A siem so tide, piipl mait-a shiem wi an chriit wi laik wi a no nobadi. Dem mait-a chat bad tingz bout mi an yu an bout di aaganaizieshan, an ‘se aal kain-a wikid sitn bout wi we no chuu.’ (Mat. 5:11) Wi lorn fram wa apm tu Juob se Jeuova nuo se wi kyan stik tu im wen wi a go chuu wi prablem dem. Jeuova lov wi an im naa go lef di wan dem we a wiet pan im. (Riid Aizaiya 49:15, 16.) No lisn tu di laiyad sitn dem we Gad enimi  dem we a fait gens im a se. Wan breda we kom fram Torki we niem Jiemz, fi im fambili did a go chuu som aad taim. Im se: “Wi did get fi si se wen wi lisn tu di lai dem we piipl tel pan Gad piipl dem, it mek wi fiil bad. So wi put wi main pan Gad Kindom an wa it a-go du fi wi an gwaan du nof sitn fi Jeuova, an a dat mek wi api.” Wi lisn tu Jeuova laik ou Juob did lisn tu im, so di lai dem we dem a tel naa go mek wi tap wiet pan Jeuova.

17. Dem man an uman ya we Iibruu chapta 11 taak bout, wa yu lorn fram wa dem did du?

¹⁷ Juob did a jos wan a di man dem we worship Jeuova we wen im a go chuu aal kain-a prablem, im tan op chrang an no fried. Iina di Baibl buk a Iibruu, di apasl Paal taak bout wan big “kroud a piipl” we did tan op chrang an no fried jos laka Juob. (Iib. 12:1) Di wol a dem go chuu uol iip a prablem, bot dem stil du wa Jeuova waahn dem fi du. (Iib. 11:36-40) Yu tingk aal a wa dem did du did wot it? Ye man! Aalduo dem neva si aal a di sitn dem we Gad did pramis dem bifuo dem ded, dem did stil gwaan wiet pan im. An kaaz dem nuo se Jeuova api wid dem, dem nuo se dem a-go get aal a wa Jeuova pramis dem wan die. (Iib. 11:4, 5) Wen wi luk pan di wie ou dem liv dem laif, it mek wi si se it wot it fi wiet pan Jeuova tu.

18. Wa yu mek op yu main fi du? (Iibruu 11:6)

¹⁸ Iina da worl ya tide, tingz a get fram bad tu wos. (2 Tim. 3:13) Sietan no tap chrai fi mek Gad piipl tap sorv Im. Tel yuself se, it no mata di prablem dem we yu mait-a fies iina laif, yu a-go eva wok aad fi du wa Jeuova waahn yu fi du kaa wi shuor se “wi chos iina di Gad we kyaahn ded.” (1 Tim. 4:10) Memba wa Gad did du fi Juob afta aal a wa im did go chuu. Dat mek wi si se Jeuova “jengkl an gud an kain.” (Jmz. 5:11) So mek wi stik tu Jeuova no mata wa tu, kaa im a-go du som uol iip a gud sitn fi “di wan dem we luk fi im aad aad.”​—Riid Iibruu 11:6.