Di wie ou som man gruo op mek dem fiil se man beta dan uman. Laik wan sorkit uovasiya we de a Boliviya we niem Hans se: “Di wie ou som man gruo op mek dem fiil laik se a man fi ron tingz. Kaaz a dat, it mek dem fiil se man beta dan uman.” Wan elda we niem Shengxian we liv iina Taiwan se: “Wich paat mi liv, nof a di man dem fiil se uman no fi tel dem wa fi du ar ou dem fiil bout notn. An ef wan man tel som man bout sitn we wan uman se ar ou shi fiil bout sitn, dem mait-a se im a wan maama man.” An som ada man mait shuo se dem no rispek uman iina som ada likl wie. Laik dem mait-a lov fi tel juok we mek it luk laik se uman na’av no sens.

Bot it nais fi nuo se no mata ou wan man gruo op, im kyan chienj. An im na’afi aalwiez fiil se man beta dan uman. (Ifii. 4:22-24) Im kyan du dis wen im lorn fi chriit uman laik ou Jeuova chriit dem. So iina da paat ya, wi a-go luk pan ou Jeuova chriit uman, an ou di breda dem kyan chriit di uman dem laik ou Jeuova chriit dem. An wi a-go luk pan ou di elda dem kyan chriit di sista dem gud an shuo se dem rispek dem iina wan wie we di ada breda dem kyan fala.

A OU JEUOVA CHRIIT UMAN?

Jeuova shuo wi di bes wie ou fi chriit uman kaa im a wan Faada we nuo ou wi fiil an we lov aal a im pikni dem. (Jan 3:16) An di sista dem komiin laik im daata dem we wot nof tu im. Mek wi luk pan som wie ou Jeuova chriit uman we mek dem si se im lov an rispek dem.

 Im no paashal wen im a diil wid dem. Jeuova mek di man an uman dem wid di siem wiez dem we im av. (Jen. 1:27) Im neehn mek di man dem wid muor sens dan di uman dem ar mek dem kyan du tingz beta dan di uman dem. An im no lov wan muor dan di ada wan. (2 Kr. 19:7) An im mek di tuu a dem so dat dem kyan andastan wa di Baibl a se, an fi du tingz we shuo se dem av di siem kain-a wiez dem we im av. It no mata ef wi a man ar uman, wans wi chos iina Jeuova, a di siem ting tu im. So man an uman a-go liv fi eva pan di ort ar ruul iina Gad Kindom Govament az king an priis iina evn. (2 Pii. 1:1) So wi si se wen it kom aan tu uman, Jeuova no paashal.

Im lisn tu dem. Jeuova kier bout ou di uman dem fiil bout sitn an im kier bout di sitn dem we a bada dem tu. Laik im did lisn tu Riechel an Ana wen dem prie, an im gi dem wa dem did aks im fa. (Jen. 30:22; 1 Sam. 1:10, 11, 19, 20) Jeuova mek som man we rait di Baibl rait bout som man we did lisn tu uman. Laik ou Iebriyam did du wa Jeuova se an lisn tu im waif Siera. (Jen. 21:12-14) An ou di king we did niem Dievid did lisn tu Abigiel, an im se a Jeuova sen ar fi kom taak tu im. (1 Sam. 25:32-35) An Jiizas, we du tingz jos laik im Faada, did lisn tu im mada Mieri. (Jan 2:3-10) So wi si se wan a di wie ou Jeuova shuo se im rispek uman a dat im lisn tu dem.

Im chos dem. Laik Jeuova did chos se Iiv wuda elp Adam fi tek kier a di wol a di ort. (Jen. 1:28) Dis mek wi si se Jeuova neehn fiil se Adam did beta dan Iiv, bot a gi im did gi im sumadi fi elp im fi tek kier a di ort. An Jeuova did chos di tuu uman dem we did a prafit we niem Debuora an Olda fi tel im piipl dem wa fi du. Dem did aal tel wan joj an wan king wa fi du tu. (Joj. 4:4-9; 2 Ki. 22:14-20) A siem so Jeuova chos di uman dem tide fi du im wok. Som a di uman dem priich an tiich, som a paiyanier, an som a mishineri. An yu av som we elp fi jraa op plan fi Kindom Aal an di difrant difrant plies dem we wi yuuz fi worship Jeuova. An yu av som ada wan we elp fi bil an tek kier a dem plies de tu. Som de a Betel an som elp fi rait uova tingz iina som ada langwij. Di sista dem komiin laik wan big aami we Jeuova a yuuz fi du di sitn dem we im waahn dem fi du. (Sa. 68:11) So wi si se Jeuova no tingk se uman wiik an kyaahn du notn.

A OU DI BREDA DEM KYAN LORN FI CHRIIT DI SISTA DEM LAIK OU JEUOVA CHRIIT DEM?

Fi wi we a breda fi nuo ef wi a chriit di sista dem di wie ou Jeuova waahn wi fi chriit dem, wi afi riili luk iina wiself fi si ou wi fiil bout di sista dem an ou wi a chriit dem. Bot wi kyaahn du dat wiself, wi niid elp. Jos laik ou wan dakta afi yuuz wan eks-chrie mashiin fi si wa’a gwaan iina sumadi aat, a siem so wi kyan yuuz di Baibl fi elp wi fi luk iina wiself fi si ou wi riili fiil bout di sista dem an ef wi a chriit dem di wie ou Jeuova waahn wi fi chriit dem. An wi kyan mek wi gud fren dem elp wi fi du dat tu. Ou wi kyan go du dat?

Aks wan a yu gud fren. (Pr. 18:17) Yu kyan aks wan a yu gud fren dem we nuo ou fi chriit piipl gud an we nuo ou fi luk pan tingz di rait wie dem kwestiyan ya: “Yu tingk mi chriit di sista dem gud? Di wie ou mi chriit dem mek dem si se mi rispek dem? Wa mi kyan du so dat mi kyan chriit dem beta?” An ef yu fren tel yu sitn we yu kyan du beta wid, no bada fiil no wie an chrai fi difen it, jos du wa yu niid fi du so dat yu kyan chriit di sista dem beta.

Stodi di Baibl. Di bes wie wi kyan nuo ef wi a chriit di sista dem gud a ef wi yuuz di Baibl fi luk pan ou wi fiil bout di sista dem an ou wi a chriit dem. (Iib. 4:12) Wen wi stodi di Baibl wi lorn bout som man we did chriit uman gud an som ada man we neehn chriit dem gud, an den wi kyan si wich wan a dem wi riili a fala. An wen wi nuo di Baibl gud gud, wi a-go nuo wa it a se wen it kom aan tu ou wi fi chriit uman. Laik 1 Piita 3:7 se wi fi memba se di waif dem “no chrang laka unu an dem kyaahn go du aal a wa unu kyan du.” Bot yu tingk se dis miin tu se di uman dem kyaahn du tingz we man du? Nuo sa! Kaa wen wi luk pan wa Piita did rait wid wa de a Gyalieshan 3:26-29, wi si se Jeuova no onggl pik man fi ruul  wid Jiizas iina evn, bot im pik uman tu. So wen wi stodi di Baibl ar aks wan breda ar wan sista we a wi gud fren ef wi chriit uman gud, it kyan elp wi fi nuo ef wi a rispek di sista dem di wie ou Jeuova waahn wi fi dwi’it.

WA DI ELDA DEM KYAN DU FI SHUO SE DEM A RISPEK DI SISTA DEM?

Aal a di breda dem iina di kanggrigieshan kyan luk pan di elda dem an si ou dem fi chriit di sista dem iina wan wie we mek dem si se dem rispek dem. So mek wi luk pan som tingz we di elda dem kyan du fi shuo se dem a rispek di sista dem.

Di elda dem big op di sista dem. Di apasl Paal did big op di sista dem iina wan wie we di elda dem kyan fala. Laik im did big op som a di sista dem iina wan leta we im did rait sen go a di kanggrigieshan iina Ruom. (Ruo. 16:12) Dem sista de mos did fiil gud wen dem did ier dem niem iina da leta de wen it did a riid iina di kanggrigieshan. A siem so tide, di elda dem kyan big op di sista dem fi di gud wiez dem we dem av, an fi aal a di wok we dem a du fi Jeuova. Wen dem du dis, it mek di sista dem si se di elda dem rispek dem an api fi av dem iina di kanggrigieshan dem. Wen di elda dem du dis, it mait-a bi wa di sista dem niid fi gwaan sorv Jeuova da taim dem.​—Pr. 15:23.

Wen di elda dem a big op di sista dem, dem fi mek dem nuo di riizn wa mek dem a big dem op. Laik wan sista we niem Jessica se: “It nais wen di breda dem tel wan sista se dem a ‘gwaan gud.’ Bot wi lov it muor wen dem tel wi di riizn wa mek dem a big wi op, laik ef dem mek wi nuo se dem a big wi op kaa wi tiich wi pikni dem ou fi sidong iina di miitn an no gi no chobl, ar kaa dem si se wi a go fi wi Baibl stodi dem an a kya dem kom a di miitn dem.” So wen di elda dem mek di sista dem nuo wa  dem a big dem op fa, it mek di sista dem si se dem wot nof tu di breda an sista dem iina di kanggrigieshan.

Di elda dem lisn tu di sista dem. Di elda dem we ombl nuo se a no dem wan a-go kyan kom op wid som gud aidiya. Dem a-go aks di sista dem ou dem fiil bout sortn tingz, an dem a-go lisn tu dem wen dem a taak. Wen di elda dem du dis, it mek di sista dem fiil gud an it a-go du di elda dem gud tu. Laik wan elda we niem Gerardo we de a Betel se: “Mi fain se wen mi aks di sista dem fi elp, it kyan elp mi fi du mi wok beta. An muor taim dem a du di wok fi uol iip muor ier dan mi an di ada breda dem.” Iina di kanggrigieshan dem, wol iip a wi sista dem a paiyanier so dem nuo wol iip muor bout di piipl dem we liv iina di komyuuniti dem dan di breda dem. Wan elda we niem Bryan se: “Dem sista ya kyan du nof tingz we kyan elp out di aaganaizieshan. Wi kyan lorn wol iip fram dem!”

Wan elda we a du tingz di wie ou Jeuova waahn im fi dwi’it a-go lisn tu wa wan sista av fi se bout sitn. Wan elda we niem Edward se: “Wa wan sista av fi se bout sitn an aal a wa shi mait-a go chuu aredi an nuo bout sitn kyan elp wan breda fi andastan sitn beta an elp im fi fiil it fi ada piipl muor tu.” (Pr. 1:5) Aal ef wan elda kyaahn du sitn we wan sista se, im kyan stil mek ar nuo se im tangk ar fi tel im wa shi nuo bout it.

Di elda dem tiich di sista dem. Di elda dem we nuo ou fi luk pan tingz di rait wie aalwiez a luk fi difrant difrant wiez ou dem kyan tiich di sista dem. Laik dem kyan tiich di sista dem ou fi du di miitn fi fiil sorvis ef no breda we baptaiz no de de. Ar dem kyan tiich dem ou fi yuuz som big tuul ar mashiin so dat dem kyan elp out wen dem a fiks op an mek Kindom Aal an dem ting de. An di breda dem we de a Betel tiich di sista dem ou fi du di difrant difrant wok we dem get fi du, laik ou fi kliin an fiks bak tingz we mash op, ou fi bai tingz, ou fi rait dong an chek op ou di moni a spen an dem ting de, ou dem kyan set op di kompyuuta an yuuz it fi du som big tingz, an fi du som ada sitn tu. Wen di elda dem tiich di sista dem ou fi du tingz, it shuo se dem chos di sista dem an se dem nuo se di sista dem kyan du tingz gud tu.

Wol iip a di sista dem we di elda dem tiich ou fi du tingz ton roun tiich ada piipl tu. Laik som sista we lorn ou fi mek op Kindom Aal an dem ting de, elp ada breda an sista iina dem kanggrigieshan fi fiks op bak dem ous an dem ting de afta wan ortkwiek ar wan orikien ar sitn laka dat apm. An som ada sista we lorn ou fi du di kyaat wok gud tiich ada sistaz ou fi dwi’it tu. Wan sista we niem Jennifer mek wi nuo ou nof sista fiil wen di elda dem tiich dem. Shi se: “Wen mi did get fi elp mek op wan Kindom Aal, wan breda we did inchaaj did tek di taim fi tiich mi. Im si di wok we mi du an im big mi op fi it. Mi did lov fi wok wid da breda ya kaa mi did fiil laik se im chos mi, an im mek mi fiil gud bout di wok we mi did a du.”

WA GUD KYAN KOM WEN WI CHRIIT DI SISTA DEM LAIK WI FAMBILI

Wi lov wi sista dem di siem wie ou Jeuova lov dem so wi chriit dem laik ou wi chriit wi fambili. (1 Tim. 5:1, 2) Wi fiil gud fi a wok wid dem an wi api fi mek dem nuo se wi lov dem an wi di de fi dem. Wan sista we niem Vanessa se: “Mi tangk Jeuova fi mek mi bi paat a im aaganaizieshan we av wol iip a breda iina it we mek mi fiil gud.” An wan neda sista we iina Taiwan se: “Mi tangk Jeuova fi im aaganaizieshan we mek di sista dem si se dem wot nof an se dem kier bout ou dem fiil bout tingz. Dis mek mi chos Jeuova muor an mek mi tangk im fi mek mi bi paat a im aaganaizieshan.”

Jeuova mos fiil gud wen im si di breda dem a chrai aad fi chriit di sista dem laik ou im waahn dem fi chriit dem. (Pr. 27:11) Wan elda we de iina Skatlan we niem Benjamin se: “Wol iip a man iina di worl no rispek uman, so wen wan uman kom a di Kindom Aal wi waahn dem fi si se wi rispek dem an wi api fi av dem de.” So wi waahn fi du evriting we wi kyan du fi du laik Jeuova an chriit di sista dem gud an mek dem si se wi lov dem an wi rispek dem.​—Ruo. 12:10.