1-2. (a) Ou wi mait-a fiil wen wi tingk bout Jiizas an aal a wa im du fi wi? (b) Wa wi a-go luk pan iina da lesn ya?

 YU SI wen sumadi we wi lov jos ded, an wi a tingk bout aal a wa dem go chuu bifuo dem ded, dat mek wi sad. Bot afta dat, an wi staat fi tingk bout sitn we dem did se we did elp wi ar wi tingk bout di ting dem we dem yuus tu du, dat a-go mek wi api.

² A siem so wen wi riid an si umoch Jiizas did sofa bifuo im ded, it mek wi sad bad. So wen it kom roun tu di taim wen wi a-go kip di Laad Sopa, wi fi sidong an tingk bout aal a di sitn dem we Jiizas du fi wi. (1 Kor. 11:24, 25) Wen wi tingk bout aal a wa Jiizas did se an wa im did du fi wi wen im de pan di ort an wa im a-go du fi wi, it a-go mek wi riili api. So iina da lesn ya, wi a-go si ou wen wi tingk bout dem sitn ya an umoch Jiizas lov wi, it a-go push wi fi du tingz fi shuo se wi tangk im an Jeuova fi wa dem du fi wi.

3. Wa mek wi api se Jiizas kom ded fi wi?

³ Wen wi tingk bout Jiizas an ou im kom ded fi wi, wi  si se wi av nof tingz fi tangk im fa. Kaa wen im did de pan di ort, im tiich piipl bout aal di gud sitn dem we Gad Kindom a-go du fi dem. An kaa im kom ded fi wi it mek wi an im an Jeuova kyan ton gud gud fren. An di wan dem we chos iina im kyan get di chaans fi liv fi eva an fi si dem piipl kom bak alaiv. (Jan 5:28, 29; Ruo. 6:23) A no laik se wi did du notn fi get aal a dem blesn ya an a no laik se wi kyan go pie dem fi wa dem du fi wi. (Ruo. 5:8, 20, 21) Bot wi kyan du tingz fi mek dem si umoch wi tangk dem fi wa dem du fi wi. Mek wi si ou wi kyan du dat.

4. Ou Mieri Magdaliin did shuo se shi tangk Jiizas fi wa im did kom du fi ar? (Luk pan di picha.)

⁴ Luk pan da uman ya we did niem Mieri Magdaliin. Shi did av sevn diiman iina ar an Jiizas ron di diiman dem outa ar. An kaa a dat, it mek ar fiil so gud dat shi ton wan a im falara dem. So shi du evriting we shi kuda du fi sopuot di wok we Jiizas did a du. (Luuk 8:1-3) Aalduo Mieri did fiil gud kaaz a wa Jiizas did du fi ar, shi neehn nuo se im did a-go du sitn biga fi ar an evribadi els tu. Ye man, im ded fi ar an aal a wi, “so enibadi we chos iina im” a-go liv fi eva. (Jan 3:16) Wen im did bout fi ded, Mieri shuo se shi wuda de de fi’im an im ada falara dem no mata wa. (Jan 19:25) An afta Jiizas ded, Mieri an tuu ada uman did kyari som swiit spais fi naint Jiizas badi. (Maak 16:1, 2) Kaa Mieri did stik tu Jiizas shi did get nof blesn. Laik wen shi did get fi taak tu Jiizas afta im kom bak alaiv, an dis a sitn we nof a im ada falara dem neva get fi du.​—Jan 20:11-18.

5. Wa wi kyan du fi mek Jeuova an Jiizas si se wi tangk dem fi wa dem du fi wi?

⁵ Jos laka Mieri, wi fi du evriting we wi kyan du fi shuo Jeuova an Jiizas se wi tangk dem fi wa dem kom du fi wi. Laik  wi fi yuuz wi chrent, wi moni, an di taim we wi av fi du tingz fi Jeuova. So ef wi kyan elp out wen dem a mek wan Kindom Aal, ar di plies we dem kip di sorkit miitn an dem ting de an so, wi fi elp, an wi fi elp fi kliin dem an tek kier a dem.

6. Wa mek yu kyan se Jeuova sen im bwai pikni fi kom ded fi yu?

⁶ Wen wi tingk bout ou Jeuova an Jiizas lov wi it mek wi lov dem tu. (1 Jan 4:10, 19) An wen wi si se Jiizas ded fi evri singgl wan a wi, it mek wi lov dem muor. Wi si se a so di apasl Paal did fiil wen im rait di breda an sista dem iina Gyaliesha an se: “Gad Bwai Pikni​—di wan we lov mi an ded fi mi.” (Gya. 2:20) Kaa Jiizas kom ded fi wi, a so Jeuova kuda jraa wi so dat wi an im kyan ton gud fren. (Jan 6:44) It no mek yu fiil gud fi nuo se Jeuova si sitn gud iina yu wa mek im sen im bwai pikni kom ded fi yu so dat yu an im kyan ton gud gud fren? Fi nuo dat no mek yu lov Jeuova an Jiizas muor? An kaa yu lov dem so moch, wa it a-go mek yu du?

7. Ou wi kyan du laik da sista ya iina di picha an shuo se wi lov Jeuova an Jiizas? (2 Korintiyan 5:14, 15; 6:1, 2)

⁷ Kaa wi lov Jeuova an Jiizas it a-go mek wi du tingz fi mek ada piipl si se wi lov dem. (Riid 2 Korintiyan 5:14, 15; 6:1, 2.) Wan ting we wi du fi mek piipl si se wi lov dem a wen wi du evriting we wi kyan du fi priich tu dem. So it no mata wich paat dem kom fram, ar ou dem luk, ar ef dem rich ar dem puor, ar ou brait dem bi, wi taak tu evribadi. Wen wi du dis wi a mek wa Jeuova waahn fi apm apm. “Im waahn evribadi  fi get siev an fi nuo di chuut.”​—1 Tim. 2:4.

8. Wa wi kyan du fi shuo wi breda an sista dem se wi lov dem?

⁸ Wi shuo Gad an Jiizas se wi lov dem wen wi du tingz fi mek wi breda an sista dem si se wi lov dem. (1 Jan 4:21) Laik wen sumadi fi dem ded wi osh dem, wen dem sik wi go luk fi dem, an wen dem fiil a wie laik dem kyaahn go aan no muor wi elp dem fi gwaan tan op chrang. (2 Kor. 1:3-7; 1 Tes. 5:11, 14) Kaa wi aalwiez memba se di wan we a du wa rait “im prieya ful op a powa an wi mek gud sitn apm,” so wi no tap prie fi wi breda an sista dem.​—Jmz. 5:16.

9. Wa a wan neda sitn we wi kyan du fi shuo se wi lov wi breda an sista dem?

⁹ Wi mek di breda an sista dem si se wi lov dem wen wi chrai aad fi liv iina piis wid dem. An wen wi paadn piipl, wi a shuo se wi redi fi paadn piipl laik Jeuova. Bot tingk bout it, Jeuova did mek im Bwai Pikni kom ded fi wi sin dem, so yu no tingk wi fi paadn wi breda an sista dem wen dem du sitn fi ort wi? Wi no waahn fi bi laik di wikid sorvant we Jiizas did tel wi bout iina wan a im tuori dem. Im did uo di king som uol iip a moni an di king paadn im, an den im go si wan neda sorvant we uo im likl bit a moni an im neehn paadn im. (Mat. 18:23-35) Tingk ef yu an nobadi iina di kanggrigieshan av no prablem. Ef yu kyan tingk bout nobadi, yu tingk yu kyan go saat it out bifuo di Laad Sopa? (Mat. 5:23, 24) Ef yu go saat out tingz wid dem it a-go shuo se yu lov Jeuova an Jiizas.

10-11. Wa an wa di elda dem fi du so dat Jeuova an Jiizas kyan si se dem lov dem? (1 Piita 5:1, 2)

¹⁰ Wan ting we di elda dem kyan du fi shuo se dem lov Jeuova an Jiizas a fi tek kier a Jiizas shiip dem. (Riid 1 Piita 5:1, 2.) Memba Piita, a chrii taim im did se im neehn nuo Jiizas. So wen Jiizas kom bak alaiv im did wel waahn fi shuo im se im lov im. Nou afta Jiizas kom bak alaiv, im aks Piita se: “Saiman, Jan bwai pikni, yu lov mi fi chuu?” Wi nuo se Piita wuda du eniting fi shuo Jiizas se im lov im. So Jiizas tel Piita se: “Tek kier a mi shiip dem.” (Jan 21:15-17) So Jiizas mek it klier klier tu Piita se im fi tek kier a im shiip dem, an a dat Piita du fi di res a im laif, an dat mek Jiizas si se Piita lov im.

¹¹ Unu we a elda, iina di taim wen di Laad Sopa a kip, unu fi du laik wa Jiizas did tel Piita fi du. Yu kyan mek Jeuova shiip si umoch yu lov dem wen yu aalwiez go luk fi dem fi yuuz Gad Wod an elp dem, an elp di wan dem we tap priich an tap kom a miitn fi staat agen. (Izii. 34:11, 12) An luk out fi di wan dem we a stodi di Baibl wid wi an fi di wan dem we a kom a di Laad Sopa fi di fos taim an go taak tu dem; dis a-go mek dem fiil gud.

12. Wa mek wen wi tingk bout wa Jiizas did se di nait bifuo im ded it mek wi no friedi-friedi? (Jan 16:32, 33)

¹² Di nait bifuo Jiizas ded, im tel im falara dem se: “Iina da worl ya, unu gweehn av chobl an sofarieshan. Bot no fret! Mi don win di fait wid di worl.” (Riid Jan 16:32, 33.) Kaa a Jeuova Jiizas did a luk tu fi elp im, it mek im no  fried a im enimi dem, an it mek im du wa Jeuova se im fi du rait op til im ded. Jiizas did nuo se im falara dem wuda go chuu di siem kain-a sitn we im did go chuu, so im aks Jeuova fi yuuz im powa fi gyaad dem. (Jan 17:11) Dis mek wi no fried kaa wi nuo se Jeuova chrangga dan wi enimi dem. (1 Jan 4:4) Jeuova nuo evriting we a gwaan, an wi nuo fi shuor se ef a Jeuova wi a mek elp wi wi na’afi fried a notn.

13. Wa Juozif, we kom fram Arimatiya, did du we shuo se im briev?

¹³ Yu did av wan man we niem Juozif, we kom fram Arimatiya, we nof piipl did riet. An im a did wan a di Juu liida dem. Bot Juozif did friedi-friedi ino, kaaz wen Jiizas did de pan ort Jan did se: “Juozif a did wan a Jiizas falara dem, bot im neehn mek nobadi nuo kaaz im did fried a di Juu liida dem.” (Jan 19:38) Miebi Juozif did fiil se piipl wudn riet im no muor kaa im a fala Jiizas. Bot di Baibl mek wi nuo se afta Jiizas ded “im get briev an go tu Pailat go aks im fi gi im Jiizas badi.” (Maak 15:42, 43) So evribadi did nuo nou se Juozif a did wan a Jiizas falara dem.

14. Wa yu fi du ef yu friedi-friedi?

¹⁴ Yu eva fiil friedi-friedi laik Juozif? Laik wen yu de a skuul ar wen yu de a wok, yu eva fiil fried fi mek piipl nuo se yu a wan Jeuova Witnis? Ar kaa yu a wori bout wa ada piipl av fi se, yu no staat fi priich yet ar mek op yu main fi baptaiz? Ef dat a apm tu yu, prie tu Jeuova an aks im fi elp yu fi no friedi-friedi. An wen yu du dat yu a-go si ou Jeuova elp yu.​—Aiz. 41:10, 13.

15. Kaa Jiizas falara dem did api se im kom bak alaiv, wa dat did mek dem du? (Luuk 24:52, 53)

¹⁵ Jiizas falara dem did sad bad wen im did ded. So a no onggl se dem fren did ded bot dem did a uop se im a did di wan we a-go frii Izrel, bot nou im ded. (Luuk 24:17-21) Bot wen Jiizas did kom bak alaiv im mek dem nuo wa mek dem sitn ya did afi apm tu im an im gi dem wan speshal wok fi du. (Luuk 24:26, 27, 45-48) A 40 die Jiizas did de pan ort fa afta im kom bak alaiv, an iina da taim de im falara dem did api kaa dem nuo se im alaiv an im a-go elp dem fi du di wok we  im gi dem fi du.​—Riid Luuk 24:52, 53; Aks 5:42.

16. Ou wi kyan du laik Jiizas falara dem?

¹⁶ Ou wi kyan du laik Jiizas falara dem? Wi kyan du laik dem wen wi mek shuor se a Gad Kindom wok kom fos iina wi laif. Som a di breda an sista dem chienj op ou dem du tingz so dat dem kyan go a miitn an fiil sorvis, an get fi kip dem fambili Baibl stodi, an so dat som a dem kyan du muor iina di kanggrigieshan an go wich paat dem niid muor elp iina di priichin wok. An dem du widout sortn tingz we ada piipl fiil se dem kyaahn du widout. So aal a dis mek wi si se wi no onggl a-go api a sorv Jeuova roun di taim wen di Laad Sopa a kip bot wi fi api fi sorv im fi di uol a di ier. An a no laik se di rof taim dem naa go kom we wi afi go fait aad fi eng aan, bot Jeuova pramis wi se ef wi put wi main pan fi’im Kindom an du wa im waahn wi fi du, im a-go bles wi kyaahn don.​—Pr. 10:22; Mat. 6:32, 33.

17. Roun di taim wen wi a-go kip di Laad Sopa, wa yu mek op yu main fi du? (Luk pan di picha.)

¹⁷ Wi kyaahn wiet fi Chuuzde, Iepril 4 fi kom fi kip di Laad Sopa. Bot wi na’afi wiet fi da die de fi tingk bout ou Jeuova an Jiizas lov wi an bout aal a wa dem du fi wi, an fi tingk bout Jiizas an ou im kom ded fi wi. So wa wi kyan du a set wan taim fi riid di Baibl an fi riid an tingk bout di paat iina di Appendix B12 a di New World Translation we niem “The Final Week of Jesus’ Life on Earth”. An wen yu a du dat, luk out fi di paat dem we mek yu waahn fi tangk Jeuova an Jiizas fi wa dem du. An tingk bout wa a-go mek wi lov dem an ada piipl, an wa a-go mek wi no friedi-friedi, an wa a-go mek wi api fi du Jeuova wok. An tingk bout tingz we yu kyan du fi mek Jeuova an Jiizas si se yu tangk dem. Yu kyan nuo se Jiizas a-go api wid aal a wa yu du fi memba im roun di taim wen di Laad Sopa a kip.​—Rev. 2:19.