DI LESN FI STODI 17
SANG 99 Uol Iip A Bradaz
Wi No De Pan Wi Uon
“Mi a-go elp yu.”—AIZ. 41:10.
A DIS WI A-GO LUK PAN
Wi a-go luk pan fuor tingz we Jeuova du fi shuo se im kier fi wi.
1-2. (a) Wa mek wi nuo se Jeuova di de fi wi wen wi a go chuu wi prablem dem? (b) A wa wi a-go luk pan iina da lesn ya?
A CHUU se wen wi a go chuu wan rof taim, it wuda komiin laik se wi wan de iina wan likl buot a baks bout so wen sii rof. Bot wi fi memba se a no wi wan di de. Jeuova wi Faada no onggl si di prablem dem we wi a go chuu bot im pramis wi se im a-go elp wi fi go chuu dem wen im se: “Mi a-go elp yu.”—Aiz. 41:10.
2 Wi nuo fi shuor se no mata ou tingz get rof iina wi laif, Jeuova naa go figet bout wi, im a-go aalwiez di de fi wi. An so iina da lesn ya, wi a-go luk pan dem fuor sitn ya we shuo wi se Jeuova di de fi wi an a elp wi: (1) Im shuo wi ou wi fi liv wi laif, (2) im gi wi di sitn dem we wi niid fi liv, (3) im kip wi sief, an (4) im osh wi an mek wi fiil beta wen wi sad.
JEUOVA SHUO WI OU WI FI LIV WI LAIF
3-4. A ou Jeuova shuo wi ou wi fi liv wi laif? (Saam 48:14)
3 Riid Saam 48:14. Jeuova nuo se di bes wie fi liv wi laif a wen im tel wi wa fi du. An wan a di ting dem we im yuuz fi du dat a di Baibl. (Sa. 119:105) So wen wi riid Gad Wod, a so Jeuova a elp wi fi mek op wi main bout wa fi du iina wi laif, an wi a-go kyan av di wiez dem we im waahn wi fi av so dat wi kyan api nou an kyan go get fi liv fi eva. a Laik Jeuova elp wi fi si se wi no fi kyari beli fi wi wan aneda, an se wi fi anis iina evriting we wi du, an se wi fi du tingz fi shuo se wi lov wi wan aneda wid aal a wi aat. (Sa. 37:8; Iib. 13:18; 1 Pii. 1:22) Wen wi av dem kain-a wiez ya, wi a-go bi wan beta mada an faada, wan beta ozban an waif, an wan beta fren tu.
4 Iina di Baibl, Jeuova mek wi si se yu did av piipl we go chuu di siem ting dem laik we wi a go chuu an did fiil di siem wie laik ou wi fiil. (1 Kor. 10:13; Jmz. 5:17) So wen wi riid bout wa dem go chuu an wi du di sitn dem we wi lorn fram dem, dat kyan elp wi iina tuu wie. Fos, wi get fi si se a no wi wan a go chuu dem sitn ya—ada piipl go chuu dem tu an stil eng aan an tan op chrang. (1 Pii. 5:9) An di sekan ting a dat wi get fi si ou wi kyan diil wid di sitn dem we wi a go chuu.—Ruo. 15:4.
5. A uu an uu Jeuova yuuz fi shuo wi ou fi liv wi laif?
5 Pan tap a dat, Jeuova yuuz di breda an sista dem fi elp wi fi si ou wi kyan liv wi laif. b Laik im gi wi di sorkit uovasiya dem we kom luk fi wi aafn fi gwaan push wi fi tan op chrang. Di taak dem we dem gi elp wi fi chos iina Jeuova muor an elp wi fi wok tugeda az wan iina di kanggrigieshan. (Aks 15:40–16:5) An Jeuova gi wi di elda dem tu we a wok aad fi elp evri wan a wi fi stie kluos tu im. (1 Pii. 5:2, 3) An fi di pikni dem, im gi dem mada an faada we a elp dem fi get kluosa tu Jeuova an fi elp dem fi tingk bout tingz di wie ou Jeuova tingk bout tingz an fi aalwiez a du di likl ting dem we rait. (Pr. 22:6) An di sista dem we chrang iina wa dem biliiv iina kyan du tingz so dat di yongga sista dem kyan fala dem an tel dem tingz we kyan elp dem tu. An dem kyan tel di yongga sista dem tingz fi push dem fi gwaan tan op chrang.—Taitos 2:3-5.
6. Ef yu waahn Jeuova fi elp yu fi liv yu laif, wa yu mos du?
6 Jeuova du wa im fi du fi shuo wi ou wi fi liv wi laif. Bot ou wi kyan shuo Jeuova se wi tangk im fi wa im du fi wi? Pravorbz 3:5, 6 se: “No du tingz di wie yu tingk se rait, wa yu fi du a chos iina Jeuova wid aal a yu aat.” An wen yu du dat, “im a-go mek yu nuo di bes wie fi liv yu laif.” Dat miin tu se wi naa go get wiself iina no wol iip a prablem an wi a-go muor api tu. An yu api se Jeuova a mek yu nuo di bes wie ou yu fi liv yu laif, no chuu?—Sa. 32:8.
JEUOVA GI WI DI SITN DEM WE WI NIID FI LIV
7. Wa a som a di tingz dem we Jeuova gi wi? (Filipiyan 4:19)
7 Riid Filipiyan 4:19. Jeuova no onggl shuo wi ou wi fi liv wi laif bot im elp wi fi wok aad fi get fuud fi nyam, kluoz fi wier an somwe fi liv. (Mat. 6:33; 2 Tes. 3:12) Ye, wi a-go a tingk bout di tingz dem we wi niid bot Jeuova a mek wi nuo se wi no fi a wori wori op wiself bout dem sitn de. (Matyu 6:25) Wi no afi du dat kaa wi Faada, Jeuova, naa go lef di wan dem we a worship im wen dem a go chuu wan rof taim. (Mat. 6:8; Iib. 13:5) Wi kyan nuo fi shuor se Jeuova a-go aalwiez gi wi di ting dem we wi niid fi liv, wi kyan put wi pat pan faiya fi dat.
8. Wa Jeuova did du fi Dievid?
8 Tingk bout ou Jeuova did elp Dievid wen im did a go chuu som rof taim. Laik di taim wen Dievid did afi ron an aid fram King Saal fi uol iip a ier kaa im di waahn fi kil im. Bot Jeuova tek kier a im an di man dem we did de wid im an gi dem di sitn dem we dem did niid fi liv. Wen Dievid memba aal a wa Jeuova du fi’im, im rait se: “Mi uol ya nou, an fram mi a lili bwai, mi neva eva si sumadi we a du wa rait afi a fen fi demself, ar si dem pikni a beg fuud.” (Sa. 37:25) Yu gudli si fi yuself aredi ou Jeuova a tek kier a im piipl dem.
9. Ou Jeuova a gi im piipl dem di tingz we dem niid wen orikien an dem sitn de gwaan? (Luk pan di picha dem tu.)
9 Wen orikien an dem ting de gwaan, Jeuova gi im piipl dem we dem niid fi liv tu. Laik wen wan torbl sofarieshan did a gwaan iina di taim wen di Baibl did a rait, di breda an di sista dem we kom fram difrant difrant plies did sen tingz fi di ada breda an sista dem we did a sofa. (Aks 11:27-30; Ruo. 15:25, 26) A siem so Gad piipl dem ya nou lov fi elp dem breda an sista dem tu. Wen wan orikien ar sitn laka dat apm, Jeuova piipl gi fuud an waata an kluoz an medisn tu di wan dem we go chuu dem sitn ya, an som a dem go a dem plies ya fi elp fiks bak di breda an sista dem ous an di Kindom Aal dem tu. An Jeuova piipl dem redi fi yuuz di Baibl fi osh di wan dem we piipl fi dem ded ar we luuz dem tingz. c
A ou Jeuova osh wi wen orikien an dem ting de a gwaan? (Luk iina paragraaf 9) e
10-11. Wa yu lorn fram wa did gwaan wid Boris?
10 Jeuova no onggl kain tu di piipl dem we a sorv im, bot im kain tu di piipl dem we naa sorv im tu. So wi fi bi laik Jeuova an kain tu dem piipl ya tu. (Gya. 6:10) Wen wi kain tu piipl we naa sorv Jeuova, dis kyan elp dem fi lorn muor bout wi an Jeuova. Luk pan wa did gwaan wid wan skuul prinsipal we liv iina Yuukrien we niem Boris. Im a neehn wan Jeuova Witnis bot im aalwiez chriit di Jeuova Witnis pikni dem gud, an im shuo se im rispek dem fi we dem biliiv iina. Bot wan a di taim, Boris did afi ron we fram im yaad kaaz a waar, an di breda an sista dem did elp im out nof nof. An im go a di Laad Sopa afta dat. Wen Boris tingk bak pan wa did gwaan, im se: “Di Witnis dem did elp mi nof nof wen dem shuo se dem kier bout mi. Mi afi tangk di Jeuova Witnis dem fi we dem du.”
11 Wi kyan du laik Jeuova tu an shuo piipl we a sofa se wi lov dem aal ef dem naa sorv Jeuova. (Luuk 6:31, 36) An wi uop se wa wi du fi elp dem wi mek dem waahn sorv Jeuova tu. (1 Pii. 2:12) Bot aal ef dem no ton wan Jeuova Witnis, wi stil a-go api kaa wi get fi gi sumadi sopm.—Aks 20:35.
JEUOVA KIP WI SIEF
12. Wa Jeuova se im a-go du fi kip im piipl dem sief? (Saam 91:1, 2, 14)
12 Riid Saam 91:1, 2, 14. Jeuova pramis wi se im naa go mek notn tap im piipl dem fram worship im di rait wie. An im naa go mek Sietan mek wi no get fi worship im di rait wie niida. (Jan 17:15) An wen di ‘wos sofarieshan’ brok out, wi kyan nuo fi shuor se Jeuova a-go du wa im se im a-go du fi mek shuor se im piipl dem gwaan chos iina im, an im a-go siev dem tu.—Rev. 7:9, 14.
13. Wa an wa Jeuova du fi kip evri wan a wi sief?
13 Jeuova gi wi tingz we elp fi kip wi sief. Laik im yuuz di Baibl fi elp wi fi nuo wa rait fram wa rang. (Iib. 5:14) An wen wi nuo ou fi yuuz di Baibl fi riizn pan tingz, it elp fi kip wi sief an fi gwaan sorv Jeuova. (Sa. 91:4) Pan tap a dat, Jeuova gi wi di breda an sista dem iina di kanggrigieshan fi elp wi fi gwaan chos iina im. (Aiz. 32:1, 2) Wen wi spen taim wid di breda an sista dem we lov Jeuova an a du wa im se dem fi du, it a-go push wi fi gwaan sorv Jeuova an no du wa bad. (Pr. 13:20) Dem ya a som a di wie dem ou Jeuova kip wi sief.
14. (a) Wa mek Jeuova lou im piipl dem fi go chuu prablem? (b) Wa Saam 9:10 mek wi nuo se naa go apm? (Luk pan di said paint tu.)
14 Bak iina Baibl taim, Jeuova did du tingz fi kip im piipl dem sief. Bot a no evri taim im du dat, kaa di Baibl mek wi nuo se: “Tingz we [wi] neehn tingk wuda apm, apm tu [wi].” (Iik. 9:11) Wan a di riizn wa mek Jeuova lou piipl fi chriit im piipl dem bad an aal kil dem a so dat evribadi kyan si se Sietan a wan big laiyad. (Juob 2:4-6; Mat. 23:34) An a di siem ting a apm iina fi wi taim. Aalduo Jeuova no tek we di prablem dem we wi a go chuu, wi kyan nuo fi shuor se im naa go lef di wan dem we lov im. d—Sa. 9:10.
WEN WI SAD JEUOVA OSH WI AN MEK WI FIIL BETA
15. A ou wen wi prie, an riid Gad Wod, an de roun wi breda an sista dem it kyan osh wi an mek wi fiil beta? (2 Korintiyan 1:3, 4)
15 Riid 2 Korintiyan 1:3, 4. Som a di taim wi mait-a fret an wori wori op wiself kaa sumadi ded fi wi ar kaa wi a go chuu som wol iip a prablem. An yu mait-a a go chuu sopm laik dat rait ya nou we mait-a mek yu fiil laik se yu na’av nobadi. Jos nuo se aal ef nobadi no nuo wa yu a go chuu, Jeuova nuo we yu a go chuu. Im no onggl si wa yu a go chuu bot im mek wi nuo se ‘wen wi a go chuu aal kain-a sofarieshan, a im kom elp wi an push wi fi gwaan tan chrang.’ So wen wi prie tu im, im elp wi tan op chrang an gi wi ‘piis iina wi aat an main iina wan wie we [wi] kyaahn iivn andastan.’ (Fil. 4:6, 7) An wen wi riid di Baibl an wi si umoch Jeuova lov wi an ou im waiz an wa an wa im a-go du iina di fyuucha, a dem sopm ya mek wi fiil gud rait ya nou. Wen wi go a wi miitn dem an de roun wi breda an sista dem an wi ier di sitn dem fram di Baibl, a dem sopm de elp fi osh wi an push wi fi go aan.
16. Wa wi lorn fram wa did gwaan wid Nietan an Prisila?
16 Luk pan ou Jeuova yuuz im Wod, di Baibl, fi push Nietan an Prisila we liv iina Merika fi go aan. Kopl ier a go, dem mek op dem main se dem a-go elp out we dem waahn muor piipl fi priich di gud nyuuz. Nietan se: “Mi did tingk se Jeuova weehn go mek evriting wok out gud fi wi.” Bot wen dem riich de, di tuu a dem get sik an dem staat fi av moni prablem tu. An so dem did afi go baka dem yaad, bot dem stil did a av moni prablem. Nietan se: “Mi wanda wa mek Jeuova neehn mek tingz wok out fi wi di wie ou wi tingk im wuda dwi’it, an mi aal did a wanda ef mi did du sitn rang.” Afta a wail, Nietan an Prisila get fi si se Gad neehn lef dem wen dem a go chuu dem prablem dem. Nietan se: “Wen wi did a go chuu dem aad taim de, di Baibl did komiin laik wan fren we waiz we elp wi fi go aan an mek wi nuo wa fi du. Kaa wi tingk bout ou Jeuova elp wi fi eng aan an go chuu an wi neehn tingk tu moch bout wi prablem dem, dat did elp wi fi nuo fi shuor se Jeuova a-go elp wi iina di fyuucha tu.”
17. A ou Jeuova did osh wan sista we niem Elga? (Luk pan di picha tu.)
17 Jeuova yuuz wi breda an sista dem fi wi osh wi tu. An a dis did gwaan wid Elga we kom fram Onggari. Fi wol iip a ier shi did a fret an wori wori op arself an fiil laik se shi no wot notn kaa shi did a go chuu wol iip a prablem. Bot wen shi tingk bout ou Jeuova yuuz di breda an sista dem iina di kanggrigieshan fi osh ar, shi rait se: “Jeuova aalwiez di de fi mi wen mi fiil laik se mi kyaahn go aan, kaa di wok we mi did a du did a tek wol iip out a mi. An pan tap a dat, mi a tek kier a mi bwai pikni we sik, an mi did av wol iip a ada tingz a diil wid tu. Evri die fi di laas 30 ier, Jeuova du we im se im wuda du fi osh mi. Im yuuz di nais sitn dem we di breda an sista dem wuda se tu mi fi gi mi di chrent fi go chuu. Nof taim mi get wan teks mesij ar wan kyaad, ar dem big mi op bout sitn di rait taim wen mi niid it.”
A ou Jeuova kuda yuuz yu fi osh sumadi an mek dem fiil beta? (Luk iina paragraaf 17)
18. Wa wi kyan du fi osh ada piipl?
18 A wan big sitn wi get fi du fi du laik Jeuova an osh piipl. Wi kyan du dat wen wi tek di taim an lisn tu wa dem a se, an wen wi taak tu dem an mek dem nuo se wi fiil it fi wa dem a go chuu, an wen wi du tingz fi elp dem. (Pr. 3:27) Wi chrai aad fi osh di wan dem we a sofa, aal di wan dem we naa sorv Gad yet. So wen sumadi ded fi dem an wen dem sik bad an wen dem a wori wori op demself, wi go luk fi dem an lisn tu dem, an tel dem som nais tingz fram di Baibl we kyan mek dem fiil beta an push dem fi go aan. Jeuova a di Gad we elp piipl wen dem niid it an we osh dem wen dem sad. An wen wi du laik im, wi no onggl a-go elp wi breda an sista fi go chuu dem prablem dem, bot wi a-go elp di wan dem uu naa worship im ya nou fi waahn fi lorn muor bout im.—Mat. 5:16.
JEUOVA AALWIEZ DE DE FI WI
19. Wa Jeuova du fi wi, an ou wi kyan du laik im?
19 Jeuova riili kier bout di wan dem we lov im, an kaaz a dat im naa go lef wi wen wi a go chuu wi prablem dem. An jos laik ou wan mada an faada a-go mek shuor se dem tek kier a dem pikni, a siem so Jeuova a-go tek kier a im piipl dem we a sorv im. An a dat mek im shuo wi ou wi fi liv wi laif, an gi wi di sitn dem we wi niid fi liv, an kip wi sief, an osh wi wen wi fiil sad. So mek wi du laik Jeuova, wi Faada, an de de fi di wan dem we a go chuu wol iip a prablem tu. Ye, wi a-go go chuu tingz we a-go mek wi fiil sad an wi a-go av prablem, bot wi kyan nuo fi shuor se Jeuova a-go di de wid wi. An wi nuo dis kaa im tel wi se: “No fried, kaa mi di de wid yu.” (Aiz. 41:10) So wi no afi if-an-bot an wanda-wanda, wi kyan nuo fi shuor se wi no de pan wi uon!
SANG 100 Wi Fi Bi Kain An Shier Wid Piipl
a Luk pan di lesn we niem “Make Decisions That Honor God” we de iina The Watchtower fi Iepril 15, 2011.
b Luk iina paragraaf 11-14 iina di lesn we niem “Gwaan Fala Di Wie We Jeuova A Shuo Yu” we de iina Di Wachtowa fi Febiweri 2024.
c Fi si som a di ting dem we di breda an sista dem du, go pan jw.org an sorch fi “orikien an dem ting de”.
d Luk pan di paat we niem “Questions From Readers” we de iina The Watchtower fi Febiweri 2017.
e DIS A WA DI PICHA A SHUO WI: Afta wan flod did gwaan iina Malaawi, di breda an sista dem a get we dem niid fi push dem fi gwaan tan op chrang iina di sitn dem we dem biliiv iina, an dem a get fuud an dem ting de tu.
