DI LESN FI STODI 6
SANG 18 Tangk Jeuova Fi Sen Im Son Fi Wi
Wa Mek Wi Tangk Jeuova Fi Paadn Wi Sin Dem?
“Gad lov di worl so moch dat im gi op im wan dege-dege Bwai Pikni.”—JAN 3:16.
A DIS WI A-GO LUK PAN
Wi a-go luk pan di riizn wa mek Jeuova paadn wi sin dem, an dat a-go mek wi tangk im iivn muor fi wa im du fi wi.
1-2. A ou wa apm tu wi komiin laik wa apm tu di yong man we paragraaf 1 taak bout?
TINGK bout wan yong man we im mada an faada did rich bad. Bot wan die sitn apm we mek dem ded. Dis did lik im fi siks. Bot wan neda ting we did apm a dat im mada an faada spen aaf aal a di moni we dem av. An pan tap a dat, dem did uo wol iip a piipl. So dem neehn av notn fi lef fi im, aal im get a wol iip a piipl we im afi pie bak moni tu. An di piipl dem waahn bak dem moni, an di moni we im uo muo dan wa im kyan pie bak.
2 Iina wan wie aal a wi komiin laik da yong man ya kaa wi fos mada an faada, Adam an Iiv, did porfek an did liv iina wan paradais. (Jen. 1:27; 2:7-9) An dem did av di chaans fi liv fi eva, bot aal av a sodn dem du sitn we mek dem get ron outa da paradais de an dem neehn get di chaans fi liv fi eva agen. So dem neehn av notn gud fi lef fi dem pikni dem. Di Baibl tel wi se: “A wan man [Adam] kaaz sin fi kom iina di worl, an a da man de sin kaaz im fi ded. An siem ou it go wid im a siem so it go wid evribadi—evribadi sin so evribadi a-go ded.” (Ruo. 5:12) So aal Adam lef fi wi a sin we kaaz wi fi ded. So it wuda komiin laik da moni de we da bwai de did uo we im kudn pie bak. A siem so non a wi kyaahn pie fi wa Adam did luuz.—Sa. 49:8.
3. Wa mek di Baibl se wen wi sin it komiin laik wi uo sumadi sitn?
3 Di Baibl mek wi nuo se wen wi sin it wuda komiin laik wen wi “uo” sumadi. (Mat. 18:32-35) So wen wi sin, it wuda komiin laik se wi uo Jeuova sitn. An wi afi pie fi wi sin dem. So ef Jeuova neehn du sopm so dat wi kyan get paadn fi wi sin dem, a onggl wen wi ded wi kuda pie fi wi sin dem.—Ruo. 6:7, 23.
4. (a) Ef Jeuova neehn du wa im du fi elp wi, wa wuda apm tu aal a wi? (Saam 49:7-9) (b) Wen di Baibl taak bout “sin”, wa an wa it a taak bout? (Luk pan di paat we niem “ Sin.”)
4 Wi kyaahn du notn pan wi uon fi get bak aal a wa Adam an Iiv did luuz. (Riid Saam 49:7-9.) Ef Jeuova neehn du wa im du fi elp wi, wi wudn get di chaans fi liv fi eva ar kom bak alaiv. Matarafak, wen wi ded it wuda komiin jos laik wen wan animal ded.—Iik. 3:19; 2 Pii. 2:12.
5. A wa Jeuova du fi elp aal a wi we a sina? (Luk pan di picha.)
5 Tingk bout di yong man we wi did taak bout iina di fos paragraaf. Tingk bout ou im wuda fiil ef wan man we av nof moni tel im se im wuda pie aaf wa im uo. No chuu se im wuda wel api an tek di elp we im a get? Wi Faada, Jeuova, shuo se im lov wi bad wen im mek wan wie fi pie aaf wi sin dem we wi get fram Adam. Jiizas tel wi se: “Gad lov di worl so moch dat im gi op im wan dege-dege Bwai Pikni, so enibadi we chos iina im naa go ded bot a-go liv fi eva.” (Jan 3:16) An kaaz a dis, it mek aal a wi an Jeuova kyan ton gud gud fren.
Jiizas priich bout ou Jeuova kyan paadn piipl kaa Jiizas kom ded fi wi. (Jan 3:16) An im did redi fi gi op im laif fi wi tu (Luk iina paragraaf 5)
6. Iina da lesn ya, wa a som sitn we di Baibl se we wi a-go luk pan, an wa mek wi a-go luk pan dem?
6 Kaaz a wa Jeuova du fi elp wi, ou dat mek wi kyan get paadn fi wi sin dem? Fi get di ansa fi da kwestiyan ya wi a-go luk pan som difrant difrant sitn we di Baibl se an wa dem miin. Laik wa Gad du fi mek tingz rait bitwiin wi an im, an ou Jiizas gi op im laif fi bai wi bak an frii wi fram sin. An wi a-go luk pan ou Gad siev wi fram di kain-a laif we wi did a liv, an ou kaaz a dat wi nuo se wi kyan du wa rait iina Gad yai. Wen wi sidong an tingk bout wa dem sitn ya riili miin, wi a-go waahn fi tangk Jeuova muor an muor fi wa im du fi paadn wi.
JEUOVA WAAHN FI MEK TINGZ RAIT BITWIIN WI AN IM
7. (a) A wa els Adam an Iiv did luuz? (b) A wa aal a wi we kom fram Adam an Iiv riili niid? (Ruoman 5:10, 11)
7 Bifuo Adam an Iiv sin, dem a did paat a Jeuova fambili bot afta dem sin dem a neehn paat a im fambili agen. (Luuk 3:38) So dem en op kyaahn liv fi eva agen. An a bifuo dem staat fi av pikni Jeuova did put dem outa im fambili. (Jen. 3:23, 24; 4:1) Kaa aal a wi a Adam an Iiv pikni, tingz wuda afi set bak rait bitwiin wi an Jeuova agen. (Riid Ruoman 5:10, 11.) So aal a wi afi wok aad fi ton Gad fren. Iina di Griik langwij we a di fos langwij we da paat ya a di Baibl did rait iina, wen it taak bout fi “mek tingz rait” it kyan miin se sumadi a chrai fi mek dem enimi ton dem fren. An wen yu tingk bout it, iivn duo a neehn Jeuova faalt se wi ton im enimi, a im mek di fos muuv so dat wi kyan ton im fren. A ou im du dat?
JEUOVA DU SOPM FI MEK TINGZ RAIT BITWIIN WI AN IM
8. A wa Jeuova did du?
8 Jeuova du sopm fi mek tingz rait bitwiin wi an im so dat wi an im kyan ton fren agen. So im did afi gi op sopm we wot di siem laik wa Adam did luuz. An wa Jeuova du wuda mek wi kyan get bak wa Adam did kaaz wi fi luuz. (Ruo. 3:25) So wi an Jeuova wuda kyan ton fren agen.
9. A wa Jeuova did set op fi a taim fi mek di Izrelait dem get paadn fi dem sin dem?
9 Jeuova did set op sopm fi a taim fi di Izrelait piipl dem get paadn fi dem sin dem so dat dem kuda ton im fren. Di Izrelait dem did av wan die evri ier we dem wuda go fi get dem sin paadn. An pan da die de, di Liida fi di priis dem wuda gi op animal sakrifais fi di piipl dem sin. Bot wi nuo se animal sakrifais kudn get rid a nobadi sin fi gud kaa wan animal no wot nof laik sumadi. Bot so langks dem gi op di sakrifais we Jeuova se dem fi gi op im did redi fi paadn dem fi dem sin. (Iib. 10:1-4) An pan tap a dat, wa di Izrelait dem did du did elp dem fi memba se dem a sina an dem niid sopm fi get rid a dem sin fi gud.
10. A wa Jeuova did du so dat wi kyan get paadn fi wi sin dem fi gud?
10 Bot Jeuova did nuo se im a-go du sitn so dat wi kyan get paadn fi wi sin dem fi gud. So Jeuova set op tingz so dat im Bwai Pikni we im lov so moch kuda “sakrifais imself onggl wan taim fi paadn uol iip a piipl sin.” (Iib. 9:28) Krais Jiizas “gi op im laif so piipl kyan get frii fram dem sin dem.”—Mat. 20:28
JIIZAS GI OP IM LAIF FI MEK TINGZ RAIT BITWIIN WI AN JEUOVA
11. (a) Wa Jiizas did du fi wi? (b) A wa kain-a sumadi kuda gi op dem laif fi wi?
11 Azkaadn tu di Baibl, Jiizas gi op im laif fi bai wi bak an siev wi fram sin. An Jeuova nuo se it wuda mek wi kyan get bak wa Adam did kaaz wi fi luuz. Kaa memba se Adam an Iiv did luuz dem porfek laif an wudn kyan liv fi eva. So wa Jiizas gi op fi wi wuda afi wot di siem laik wa Adam did luuz. (1 Tim. 2:6) So a onggl wan man kuda kyan gi op im laif fi wi. An im did afi (1) porfek; (2) kuda kyan liv fi eva pan ort; an (3) redi fi gi op im laif az wan sakrifais fi wi. A onggl so wi kuda get bak di kain-a laif we Adam did kaaz wi fi luuz.
12. Wa mek Jiizas kuda gi op im laif an mek tingz rait bitwiin wi an Jeuova?
12 Si chrii riizn ya wa mek Jiizas kuda gi op im laif an mek tingz rait bitwiin wi an Jeuova. (1) Im did porfek—“im neva sin.” (1 Pii. 2:22) (2) Im kuda kyan liv fi eva pan ort kaa im did porfek. (3) Im did redi fi kom ded fi wi. (Iib. 10:9, 10) Jiizas did porfek jos laik ou Adam did porfek. (1 Kor. 15:45) So wen Jiizas kom ded, im kuda mek wi get bak wa Adam did kaaz wi fi luuz. (Ruo. 5:19) A das wai di Baibl se Jiizas a “di laas Adam,” so nobadi els neehn afi kom ded fi wi kaa Jiizas ded “wan taim, fi evribadi, an a it dat.”—Iib. 7:27; 10:12.
13. A wa Jeuova did du fi mek tingz rait bitwiin wi an im?
13 Jeuova did du sopm fi mek tingz rait bitwiin wi an im wen im sen Jiizas fi gi op im laif fi wi. So wen Jiizas kom ded fi wi, im pie fi wi sin dem, an a fi im blod im yuuz fi du dat fi wi.—Ifii. 1:7; Iib. 9:14.
KAAZ A WA JEUOVA AN JIIZAS DU, WI GET SIEV FRAM DI LAIF WE WI DID A LIV AN TINGZ RAIT BITWIIN WI AN GAD
14. A wa wi a-go luk pan ya nou, an wa mek?
14 Kaa Jeuova du sopm fi mek tingz rait bitwiin wi an im, a ou it elp wi? Wi a-go luk pan tuu a di ting dem we di Baibl se we mek wi si ou wa Jeuova du kyan elp evri singgl wan a wi ya nou.
15-16. (a) Wa di Baibl mek wi nuo se Jeuova an Jiizas did du fi wi? (b) Wa wi fi waahn fi du kaaz a wa dem did du?
15 Di Baibl mek wi nuo se wi get siev fram di laif we wi did a liv kaaz a wa Jeuova an Jiizas du. An di apasl Piita put it da wie ya: “Unu nuo se a no notn laik silva an guol we kyaahn laas fi eva Gad tek siev unu fram di kain-a laif we unu did a liv. Da laif de neva wot notn, an a da laif de unu get fram unu mada an faada piipl dem we did de ya bifuo unu. Bot Gad siev unu wid Krais Jiizas preshos blod. Preshos blod laik wan biebi shiip we neva du notn rang at aal at aal. Wan biebi shiip we naa no maak ar no kot ar notn laka dat.”—1 Pii. 1:18, 19.
16 A kaaz Jiizas kom ded fi wi mek wi kyan get fi liv fi eva. (Ruo. 5:21) An a das wai wi tangk Jeuova so moch fi wa im du, an wi tangk Jiizas fi kom gi op im preshos blod fi siev wi fram di kain-a laif we wi did a liv.—1 Kor. 15:22.
17-18. (a) Di fak se Jeuova mek tingz rait bitwiin wi an im, wa it miin? (b) A ou it elp wi kaa Jeuova mek tingz rait bitwiin wi an im?
17 Di Baibl mek wi nuo se wa Jeuova an Jiizas du mek tingz rait bitwiin wi an Jeuova. So dat miin tu se wi na’afi pie di prais fi wi uona sin dem agen. Wen Jeuova du dis, dat no miin tu se im a go bak pan wa im se rait. Im nuo se wi kyaahn du wa rait pan wi uon, an im no put op wid rangz niida. Bot a kaa wi chos iina wa im du fi mek tingz rait bitwiin wi an im, an kaa im sen im Bwai Pikni fi kom gi op im laif fi wi mek im kyan paadn wi sin dem.—Ruo. 3:24; Gya. 2:16.
18 Di fak se Jeuova mek tingz rait bitwiin wi an im, a wa dat du fi wi? Gad mek tingz rait bitwiin im an di wan dem we get pik fi ruul iina evn wid Jiizas an im kaal dem im uona pikni. (Taitos 3:7; 1 Jan 3:1) Gad paadn dem fi dem sin aredi an im no luk pan dem an se dem gilti a notn. An a dat mek dem kyan go ruul iina Gad Kindom govament. (Ruo. 8:1, 2, 30) An Gad mek tingz rait wid di wan dem we a-go liv pan di ort an se dem a im fren kaa im paadn dem fi dem sin dem. (Jmz. 2:21-23) An di big kroud a piipl we a-go go chuu Aamagedan a-go kyan liv fi eva. (Jan 11:26) An di piipl dem we did “du wa gud” an di wan dem we did “du wa bad” we ded a-go get di chaans fi kom bak alaiv agen. (Aks 24:15; Jan 5:28, 29, NWT ) So di taim a-go kom wen Gad a-go frii evribadi we a sorv im an “gi dem aal a wa im av pudong fi im pikni dem.” (Ruo. 8:21) Tingz a-go nais kaa Gad mek tingz rait bitwiin wi an im!
19. Kaaz a wa Jeuova an Jiizas du fi wi, a ou dat mek tingz beta fi wi nou? (Luk pan di paat we niem “ Wa Aal A Dis Av Fi Du Wid Wi.”)
19 Wi did komiin laik di yong man we wi taak bout iina di fos paragraaf we di onggl ting we im did get fram im mada an faada a wol iip a piipl we im did uo we im kudn pie bak. Bot tingz difrant fi wi kaa Jeuova sen im Bwai Pikni fi kom gi op im laif fi wi fi mek tingz rait bitwiin wi an im. An kaa wi chos iina Jiizas Krais, it frii wi fram sin an det. An Jeuova kyan luk pan wi an se wi no gilti a notn. An di bigis ting a dat wi an wi Faada, Jeuova, kyan ton gud gud fren agen.
20. Wa wi a-go luk pan iina di neda lesn?
20 Wen wi sidong an tingk bout wa Jeuova an Jiizas du fi wi, it mek wi api bad. (2 Kor. 5:15) Kaa ef dem neehn du wa dem du fi wi, wi kaana wuda daak. Wi lorn se Jeuova redi fi paadn piipl, bot wa dat miin fi yu? A dat wi a-go luk pan iina di neda lesn.
SANG 10 Priez Jeuova Gad!
