Di apasl Paal did tel Timoti, we a did wan elda laik im, se: “Gad, Jiizas Krais an di uol a di ienjel dem we Gad pik a mi witnis, du wa mi tel yu fi du. Du it an mek shuor se yu chriit evribadi di siem wie. No av no fievrit.”​—1 Tim. 5:21.

So wi nuo se iina da vors ya, di wan dem we Gad pik a no di 144,000. Kaa wen Paal did a rait tu Timoti, di 144,000 neehn staat go a evn yet. So di apasl dem an di ada wan dem we get pik neehn de a evn niida. So wi nuo se a no dem wan ya Paal did rait bout.​—1 Kor. 15:50-54; 1 Tes. 4:13-17; 1 Jan 3:2.

Wi nuo tu se wen di Baibl a taak bout ‘di ienjel dem we get pik,’ it naa taak bout di wan dem we neehn lisn tu Gad wen di flod did a gwaan, kaa dem ienjel de did a bak Sietan an a fait gens Jiizas an a so dem en op ton demself iina diiman. (Jen. 6:2; Luuk 8:30, 31; 2 Pii. 2:4) Iina di fyuucha, dem ienjel de a-go get tai op iina wan daak daak pit fi 1,000 ier, an afta dat dem an Sietan a-go don fa.​—Juud 6; Rev. 20:1-3, 10.

So dem ienjel ya we get pik we di vors taak bout a mos di wan dem we a bak “Gad an Jiizas Krais,” we di vors taak bout tu.

Uol iip a ienjel de a evn a du wa Jeuova waahn dem fi du. (Iib. 12:22, 23) Bot aal a dem no av di siem kain-a wok fi du di siem taim. (Rev. 14:17, 18) An memba se wan a di taim a wan ienjel did get di wok fi kil aaf 185,000 suoja fram Asiriya. (2 Ki. 19:35) An som a di ienjel dem mait-a did get di wok fi “tek outa [Jiizas] Kindom evriting we mek piipl du rang an aal a di rang-duwa dem.” (Mat. 13:39-41) An som ada wan mait-a did fi “gyada op di piipl dem” we fi go a evn. (Mat. 24:31) An som ada wan did get di wok fi wach uova wi.​—Sa. 91:11; Mat. 18:10; an luk pan Matyu 4:11 an Luuk 22:43 tu.

“Di ienjel dem we Gad pik” we 1 Timoti 5:21 taak bout mait-a bi som ienjel we get som speshal wok fi du fi Jeuova piipl dem. Bies pan wa Paal did a taak bout, im mek di elda dem nuo se dem fi mek di breda an sista dem we iina di kanggrigieshan rispek dem, an wen dem a du tingz iina di kanggrigieshan, dem fi mek shuor se dem “chriit evribadi di siem wie” an “no av no fievrit.” So wen dem a-go du sitn ar joj nobadi, dem fi mek shuor se dem tingk bout it gud fos. An dat a kaa dis a wan siiros sitn kaa Paal did tel dem se dem a du dis bifuo “Gad, Jiizas Krais an di uol a di ienjel dem we Gad pik.” Dis mek wi si klier klier se som ienjel get di wok fi tek kier a tingz iina di kanggrigieshan, an fi kip wi sief, an fi elp wid di priichin wok we a gwaan, an fi mek Jeuova nuo wa dem si a gwaan tu.​—Mat. 18:10; Rev. 14:6.