Yu did a riid Di Wachtowa dem fi da ier ya gud gud? Wel, si ef yu kyan ansa dem kwestiyan ya:

Wa gud it a-go du yu ef yu spen taim fi taak tu Jeuova, lisn tu im, an tingk bout im?

Wi a-go kyan du tingz beta, an wi a-go kyan tiich beta, an wi fiet a-go get chrangga, an wi a-go lov Jeuova muor tu.​—w22.01-E, p. 30-31.

Ou it a-go elp wi ef wi chos iina Jeuova an di wan dem we im a yuuz fi liid wi?

A nou wi fi a shuo se wi nuo se di wie ou Jeuova se tingz fi go a di rait wie. An wi shuo se a dat wi a du wen wi no if-an-bot an wanda wanda, bot wi du wa di elda dem se wi fi du. So wen di wos sofarieshan we di worl eva si a gwaan, wi a-go redi fi du wa Jeuova aaganaizieshan se wi fi du, aal wen it luk laik se it no mek no sens.​—w22.02-E, p. 4-6.

Wa mek di ienjel did tel Zakaraiya bout di sitn we dem yuuz fi elp dem fi mek di bildin chriet we niem plom lain we iina Govana Zeruubabel an? (Zak. 4:8-10)

Da vijan de did mek Gad piipl nuo se Gad ous we dem did a mek, dem wuda get fi don mek it an it wuda luk di wie ou Gad waahn it fi luk.​—w22.03-E, p. 16-17.

Ou wi kyan mek shuor se wi a “liv rait so piipl kyan fala” wi iina ou wi taak? (1 Tim. 4:12)

Wi du dat wen wi taak tu piipl iina wan nais wie an mek dem si se wi rispek dem wen wi iina sorvis. An wi du dat wen wi a sing wi sang dem fram wie dong iina wi aat, an wen wi de a wi miitn dem wi aalwiez put op wi an fi ansa kwestiyan. Plos, wi no tel lai an wi push wi wan aneda fi tan op chrang, an wi no kos ada piipl an se tingz fi tier dem dong niida.​—w22.04-E, p. 6-9.

Wa mek di wail animal we Revilieshan 13:1, 2 tel wi bout av sitn fi du wid aal a di fuor wail animal dem (we a fuor govament) we Daniyel chapta 7 taak bout?

Di wail animal we Revilieshan 13 taak bout no miin jos wan govament laik ou yu wuda av Ruom. Bot it av fi du wid aal a di govament dem we ron tingz iina di worl.​—w22.05-E, p. 9.

Wa a di mien ting we wi kyan du we shuo se wi nuo se Jeuova fier so im a-go gi evribadi jostis?

Wen sumadi du sitn we ort wi, wi fi chrai no fi beks wid dem an wi no fi kip dem op iina wi aat, bot wi fi lef tingz tu Jeuova. Jeuova a-go get rid a aal a di sitn dem we a ort wi kaaz a sin.​—w22.06, p. 10-11.

Wa wan breda we a prie a di miitn dem fi memba?

Wen im a prie, im no fi yuuz it fi jraa op di breda an sista dem iina di kanggrigieshan, an im no fi yuuz it fi taak bout tingz we di breda dem no nuo bout yet niida. Im fi memba se im no fi “yuuz wan bag a wod” wen im a prie, wos ef di miitn jos a staat. (Mat. 6:7)​—w22.07, p. 24-25.

Wen di Baibl se “di wan dem we did du wikidnis a-go kom bak fi get joj,” wa it miin? (Jan 5:29)

Dem naa go get joj kaaz a wa dem yuus tu du bifuo dem ded, bot afta dem kom bak alaiv. Jiizas a-go luk fi si ef dem piipl ya we yuus tu du wa bad staat fi du wa Jeuova waahn dem fi du.​—w22.09, p. 18.

A di kanvenshan we gwaan iina Septemba 1922, a wa Breda Rutherford did tel di breda dem fi du?

A di kanvenshan we did kip iina Siida Paint, we de iina Owaiyo iina Merika, im tel dem se: “Di King a ruul ya nou! An a unu fi mek ada piipl nuo bout dis. So unu fi gwaan go priich, gwaan go priich, gwaan go priich, bout di King an im Kindom!”​—w22.10, p. 3-5.

Iina Aizaiya chapta 30, wa a di chrii wie dem we Jeuova elp wi fi go chuu wi prablem dem?

Jeuova elp im piipl dem wen im (1) lisn tu wi gud gud an ansa wi wen wi prie tu im, (2) wen im tel wi ou fi liv wi laif, an (3) wen im gi wi nof blesn nou an iina di fyuucha.​—w22.11, p. 9.

Wa mek wi kyan se we rait dong iina Saam 37:10, 11, 29 did av sitn fi du wid sopm we gwaan aredi, an it av sitn fi du wid wa a-go gwaan iina di fyuucha?

Wa Dievid did rait dong tel wi bout di nais sitn dem we did a gwaan iina Izrel wen Salaman did a ruul, bot Jiizas did yuuz Saam 37:11 fi mek wi si wa a-go gwaan iina di fyuucha wen di ort ton iina wan paradais. (Mat. 5:5; Luuk 23:43)​—w22.12, p. 8-10, 14.