1. Wa di skripcha did miin wen it se “unu niid Gad iina evri wie,” an ou dat kyan mek wi api?

 WEN sumadi riili api, dem no jos api tide an no api tumaro, kaaz sumadi we riili api a-go aalwiez api. Bot wa kyan mek sumadi aalwiez fiil api? Iina di sorman we Jiizas did gi wen im did de pan di mountn, im did mek wi nuo wa sumadi kyan du fi riili api. Im se, di wan dem “we nuo se [dem] niid Gad iina evri wie, Gad bles [dem].” (Mat. 5:3) So sumadi we liv dem laif fi shuo se dem “niid Gad iina evri wie” an Gad bles dem, a dat riili a-go mek dem api. An Jiizas did nuo se Jeuova did mek piipl fi wel waahn fi nuo Im an worship Im. A so dem shuo se dem niid Gad iina evri wie. An wi nuo se Jeuova a wan api Gad, so di piipl dem we worship im kyan api tu.

2-3. (a) A uu els Jiizas se kyan api? (b) Wa wi a-go luk pan iina da lesn ya, an wa mek wi a-go luk pan dem?

² Yu tingk se evriting afi set iina yu laif fi yu api? Nuo sa, memba di sorman we Jiizas did gi wen im de pan di mountn, se im did taak bout di wan dem we did “a baal” tu, kaa dem mait-a a baal kaa dem fiil a wie kaa dem naa du di sitn dem we Gad waahn dem fi du, ar kaaz a di prablem dem we de gwaan iina dem laif. Bot Jiizas se dem stil kyan api. An a di siem ting dem Jiizas did se bout “di piipl dem we ada piipl mek sofa jos kaaz dem liv ou Gad waahn piipl fi liv,” an di wan dem we “piipl shiem” tu, kaa dem a du tingz ou Jiizas did dwi’it. (Mat. 5:4, 10, 11) Bot wa mek wi nuo se piipl kyan go chuu aal a dem sitn ya an stil api?

³ Jiizas did mek wi nuo se wi kyan api aal ef evriting iina wi laif no saat out, kaa im mek wi nuo se wa a-go riili mek wi api a wen wi nuo se wi niid Gad iina evri wie an wi a du wi bes fi jraa nier tu im. (Jmz. 4:8) Iina da lesn ya,  wi a-go luk pan chrii sitn we wi kyan du we a-go mek wi riili api.

4. Ef wi riili waahn fi bi api, wa a di fos ting wi fi du? (Saam 1:1-3)

⁴ FOS TING: Ef wi waahn fi bi riili api, wi afi riid an stodi Gad Wod. Jiizas did se Gad Wod komiin laka fuud. An wi nuo se piipl an animal niid fi nyam fuud fi liv. Bot a onggl piipl kyan riid Gad Wod an dis a sitn we dem niid fi du. A dat mek Jiizas did se: “Man no liv pan bred wan. Bot wi niid evri wod we kom outa Gad mout fi riili liv.” (Mat. 4:4) So wi fi mek shuor se wi riid Gad Wod evridie. Di Baibl tel wi se: ‘Di man we api a Jeuova wod mek im api an im riid it die an nait.’​—Riid Saam 1:1-3.

5-6. (a) Wa’a som tingz we di Baibl tel wi bout? (b) Wa it kyan du fi wi wen wi riid di Baibl?

⁵ Kaa Jeuova lov wi so moch, im tel wi iina di Baibl wa wi fi du so dat wi kyan api. Di Baibl tel wi wa mek wi de ya, an wa wi fi du fi jraa nier tu Jeuova, an wa wi fi du so dat im kyan paadn wi fi wi sin dem. An di Baibl mek wi nuo bout di nais nais sitn dem we Jeuova a-go du fi wi iina di fyuucha. (Jer. 29:11) Wen wi stodi di Baibl an lorn bout aal a dem sitn ya we Jeuova a-go du fi wi nou an wa im a-go du fi wi iina di fyuucha, it mek wi api so til!

⁶ Di Baibl av som uol iip a gud sitn iina it we ef wi du dem it wi mek wi liv wan beta laif, an it a-go mek wi api tu. An wen yu fiil laik se yu kyaahn go aan no muor kaaz a di uol iip a prablem dem we yu av, a dem taim de yu fi riid yu Baibl som  muor an tingk bout wa it a se. Jiizas se: “Di piipl dem we ier Gad wod an du we it a se, a dem riili bles.” Kaa yu si wen Gad a bles yu, yu a-go api!​—Luuk 11:28.

7. Wa yu fi du wen yu a riid di Baibl so dat yu kyan enjai it?

⁷ Wen yu a riid di Baibl, mek shuor se yu a tek di taim fi tingk bout an enjai wa yu a riid. Dis eva apm tu yu? Sumadi kuk sitn we yu lov bad. Bot kaa yu main de pan sitn els ar yu liet fi go somwe, yu jos kot an swala. An wen yu don, yu nat iivn memba ou di fuud did ties an yu sari se yu did nyam it dong so kwik. Dat eva apm tu wen yu riid di Baibl, kaa yu a ron chuu it so faas yu nat iivn get di taim fi tingk bout wa it a se? Wen yu a riid di Baibl, tingk bout di sitn dem we yu a riid an mek it komiin laik yu de de, an tingk bout wa di piipl dem vais did soun laik dem taim de. An wen yu du dat, dem ting de a-go mek yu enjai it an it a-go mek yu api tu.

8. Ou “di waiz sorvant” a du di wok we dem get fi du? (Luk pan di said paint.)

⁸ Jiizas did pik “di waiz sorvant” fi gi wi fuud wen a taim fi wi nyam, an dem gi wi uol iip a sitn fi elp kip wi fiet chrang. b (Mat. 24:45) Di Baibl a di mien ting we di waiz sorvant yuuz fi tiich wi. (1 Tes. 2:13) An dis elp wi fi nuo ou Jeuova fiil bout tingz. An dat a wa mek wi riid Di Wachtowa an Awake! magaziin dem an di sitn dem pan jw.org. An das wai wi stodi op fi di miitn dem we dem kip iina di wiik an pan di wiiken. An ef di pruogram we kom a mont taim pan JW Broadcasting^® de iina wan langwij we wi kyan andastan, wi a-go mek shuor se wi wach dat tu. So ef wi mek shuor se wi gwaan riid di Baibl an du dem sitn ya we wi jos taak bout, it a-go elp wi fi du di neks sitn we a-go riili mek wi api.

9. Wa a di sekan ting we wi fi du we a-go mek wi riili api?

⁹ SEKAN TING: Ef wi waahn fi bi riili api, wi afi du di sitn we Jeuova waahn wi fi du. Di Baibl se: “Yu si di sumadi we av nof rispek fi Jeuova an we no waahn du notn fi ort im, an a du wa im waahn dem fi du, a da sumadi de api.” (Sa. 128:1) Dat miin tu se wi naa go du notn we Jeuova no waahn wi fi du. (Pr. 16:6) So wi a-go gwaan chrai fi du di sitn dem we Jeuova se rait an wi naa go du di sitn dem we im se rang. (2 Kor. 7:1) Wen wi lov di sitn dem we Jeuova lov an iet di sitn dem we im iet dat a-go mek wi api.​—Sa. 37:27; 97:10; Ruo. 12:9.

10. Azkaadn tu Ruoman 12:2, wa wi supuoz tu du?

¹⁰ Riid Ruoman 12:2. Sumadi mait-a nuo se a Jeuova av di rait fi se wa rait an wa rang, bot dem no onggl fi nuo it, dem fi du wa Gad se rait tu. Jos laik ou sumadi mait-a nuo se di govament av di rait fi tel dem ou faas ar ou sluo fi jraiv pan di ruod, bot im mait no waahn du wa di govament waahn im fi du, an kaa a dat im jraiv pan di ruod faasa dan ou im fi jraiv pan it. Wen wi du di sitn dem we Jeuova waahn wi fi du a so wi shuo se wi nuo se wa Jeuova se wi fi du a di bes ting fi wi. (Pr. 12:28) An a siem so Dievid did fiil, kaa ier wa im se bout Jeuova, im se: “Yu mek mi nuo di sitn dem we mi fi du an ou fi liv mi laif. Enibadi we de bifuo yu a-go api bad, an enibadi we de a yu rait an a-go api fi eva.”​—Sa. 16:11.

11-12. (a) Wen wi a go chuu prablem an wi fiil laik se wi kyaahn go no muor, wa wi fi chrai fi no du? (b) Ou di wod dem iina Filipiyan 4:8 kyan elp wi wen wi a tingk bout wa fi du fi enjai wiself?

 ¹¹ Wen wi a go chuu prablem an wi fiil laik se wi kyaahn go no muor, wi mait-a fiil se wi afi du sitn fi fiil beta so dat wi kyan tek wi main aafa wi prablem. An wi kyan si wa mek wi fiil so, bot wi fi mek shuor se di sitn dem we wi du a no sitn we Jeuova iet.​—Ifii. 5:10-12, 15-17.

¹² Di apasl Paal did rait wan leta tu di Kristiyan dem we did de iina Filipai, an im tel dem se dem fi gwaan tingk bout “eniting we rait, eniting we gud an kliin, eniting we piipl kyan luk pan an fiil gud bout, . . . an eniting we fit fi get big op.” (Riid Filipiyan 4:8.) Aalduo Paal neehn did a rait an a tel wi di sitn dem we wi fi du fi enjai wiself, wa im rait an se kyan elp wi stil wen wi plan fi du sitn fi enjai wiself. So chrai an du dis: eniwe yu si iina da vors ya di wod we se “eniting” tek it out an put dem wod ya de: “sang,” “muuvi,” “buk,” ar “vidiyo giem.” Wen yu du dis, yu wi get fi si ef di muuvi dem we yu wach an ada tingz we yu du fi enjai yuself, ef Jeuova aarait wid dem. Wi waahn fi mek shuor se wi a liv di wie ou Jeuova waahn wi fi liv. (Sa. 119:1-3) Den kaa wi kanchens naa bada wi, wi kyan go du di neda ting we wi fi du we a-go mek wi riili api.​—Aks 23:1.

13. Ef wi waahn fi bi riili api, wa’a di tord ting we wi fi du? (Jan 4:23, 24)

¹³ TORD TING: Mek shuor se di wie yu worship Jeuova a di big ting iina yu laif. A im mek wi, so a im wi fi worship. (Rev. 4:11; 14:6, 7) So wi fi mek shuor se di bigis ting iina wi laif a dat wi a worship Jeuova di wie ou im waahn wi fi worship im. Dat miin se, wi fi worship im di wie ‘ou di spirit waahn [wi] fi worship’ im​—iina di chuu wie. (Riid Jan 4:23, 24.) So dis a mek wi si se wi fi liv di wie ou Gad Wod se wi fi liv. Aal ef wi liv iina som konchri we dem a mek tingz aad fi wi kaa wi a sorv Jeuova, ar dem put wi wok anda lakdong, di wie ou wi worship Jeuova fi stil bi di bigis ting iina wi laif. Matarafak, a muor dan 100 a wi breda an wi sista dem de iina prizn jos kaa dem a wan Jeuova Witnis.  c Bot dem stil api fi du wa dem kyan du fi tel ada piipl bout Gad an im Kindom, an wa it a-go du fi dem, an fi stodi Gad Wod an prie tu Gad. Wen piipl shiem wi an se aal kain-a bad sitn bout wi kaaz a wa wi biliiv iina wi stil api kaa wi nuo se Jeuova stil de de wid wi, an im a-go gi wi nof nof blesn kaaz a wa wi du.​—Jmz. 1:12; 1 Pii. 4:14.

14. Wa dem did du tu da breda ya we did liv iina Tajikistan, an wa mek dem dwi’it?

¹⁴ Di ting dem we wi breda an sista dem go chuu, mek wi si se ef wi du dem chrii sitn ya we wi jos luk pan, no mata wa wi a go chuu wi kyan stil api. Mek wi luk pan wa did apm tu Jovidon Bobojonov, im a did jos 19 ier oul an im kom fram Tajikistan. Kaa im neehn jain di aami an go fait waar fi dem, pan Aktuoba 4, 2019, dem go a im yaad go tek im we an lak im op, an chriit im laik se im a wan kriminal. An kaaz a dat, nof piipl fram aal uova di worl did si se im naa get no jostis. Piipl se dem did biit im, an chrai fi fuos im fi put aan  dem aami yuunifaam, an fi tek di uot we sumadi tek wen dem a jain di aami. Afta dat, dem se ye im gilti an sen im ga’a wan prizn kyamp we dem mek yu wok aad, an den wan die di sumadi weehn a ruul di konchri se dem fi let im go. Wid aal a wa did a gwaan wid Jovidon im stil did a du wa Jeuova waahn im fi du an im did api tu. Im kuda du dis kaa im did nuo se im did niid Gad iina evri wie.

15. Wen Javidon did iina prizn wa im did a du so das im kuda stil a tek iin di sitn dem fi kip im fiet chrang?

¹⁵ Wen Jovidon did iina prizn, im did stil a tek iin di sitn dem fi kip im fiet chrang, aalduo im neva av no Baibl ar non a wi buk an pamplet dem. Bot ou im kuda stil du dat? Im kuda du dat kaa di breda an sista dem we kyari fuud go gi’im wen im iina prizn rait dong di skripcha fi di die pan di bag we dem kyari di fuud iina go gi’im. So dis mek im kuda riid di Baibl evridie an tingk bout di sitn dem we im a riid. Afta im kom outa prizn im se dis tu di ada breda an sista dem we neva go chuu da rof taim ya yet. Im se: “A wan gud taim nou fi yu yuuz di taim we yu av fi riid Gad Wod an di buk an pamplet dem so dat yu kyan get fi nuo nof tingz bout Jeuova.”

16. Wa’a som a di sitn dem we Javidon did tingk bout wen im did iina prizn?

 ¹⁶ Javidon did du di sitn dem we Jeuova waahn im fi du. Wen im did de iina prizn, im neehn did a tingk bout no uol iip a bad sitn an staat fi du di bad sitn dem we di ada prizna dem a du. Bot insted-a dat, im tingk bout di sitn dem we Jeuova waahn im fi du. Im did get di taim fi tingk bout aal a di nais sitn dem we Jeuova mek. Laik iina di maanin taim, di bod dem wiek im op wid dem singin, an iina di nait im kuda luk out an si di muun an di staar dem. Im se: “Wen mi si aal a dem nais sitn ya dem mek mi api an fiil laik fi eng aan kaa dem did komiin laik wan prezent fram Jeuova.” Wen wi tangk Jeuova fi aal a di buk an pamplet dem, an di sitn dem we im gi wi so dat wi kyan get fi nuo im, an di fuud an ada tingz dem we im gi wi fi enjai wi laif, it mek wi api iina wi aat, an wen wi api it mek wi kyan tan op chrang an eng aan.

17. Ou wa 1 Piita 1:6, 7 se kyan elp sumadi we a go chuu sitn laik wa Javidon did go chuu?

¹⁷ Javidon did mek shuor se fi worship Jeuova a di bigis ting iina im laif. Im did nuo se di big ting iina im laif a fi im du di sitn dem we Jeuova waahn im fi du. Jiizas se: “Yu fi worship di Laad we a yu Gad, an a im wan yu fi sorv.” (Luuk 4:8) Di suoja dem an di ada wan dem we did inchaaj a di aami did waahn Javidon fi ton im bak pan im rilijan. Bot wa did elp im, a das im prie aad aad evridie an evri nait an aks Jeuova fi elp im no fi ton im bak pan im. An aalduo dem did chriit im bad an ting wen dem did tek im we an biit im an kyari im go prizn, im api kaa im neva ton im bak pan Jeuova, im go chuu an paas di tes.​—Riid 1 Piita 1:6, 7.

18. Ef yu waahn fi aalwiez api wa yu fi du?

¹⁸ Jeuova nuo wa wi riili niid fi bi api. An ef wi du dem chrii sitn ya we wi jos luk pan iina da lesn ya, it a-go mek wi api fi chuu aalduo wi mait-a go chuu uol iip a prablem. Den yu kyan go se: “Di piipl dem we Jeuova a dem Gad api!”​—Sa. 144:15.