LESN 04
Gad—A Uu Im Bi?
Fram piipl de pan ort til nou, dem aalwiez a worship uol iip a difrant difrant gad. Bot di Baibl mek wi nuo se yu av wan Gad “we muo powaful dan aal a di ada gad dem.” (2 Kranikl 2:5) Iina da lesn ya, yu a-go lorn uu da Gad de bi an wa mek im so powaful.
1. Wa Gad niem, an wa mek wi nuo se im waahn wi nuo im niem?
Iina di Baibl, Gad tel wi wa im niem. Im se: “A mi niem Jeuova. Dis a fi mi niem.” (Riid Aizaiya 42:5, 8.) Di niem “Jeuova” kom fram wan Iibruu wod, an da wod de miin “Im kyan du eniting we im waahn fi du.” Jeuova niem de iina di Baibl muor dan 7000 taim! a So dat mek wi nuo se im waahn wi fi nuo da niem de, an im waahn wi fi yuuz it. (Eksidos 3:15) Wen wi se “Gad” ar “Laad,” wi kyan a taak bout enibadi we piipl worship. Bot wen wi taak bout Jeuova, wi a taak bout “di chuu Gad fi di evn dem an di ort.”—Dyuutaranami 4:39.
2. Wa di Baibl tel wi se bout Jeuova?
Di Baibl mek wi nuo se Jeuova a di onggl chuu Gad we wi fi worship. Wi av nof riizn wa mek wi se so. No ada ruula no de we av muor powa dan im, an a im aluon “a di Muos Ai uova di wol ort.” (Riid Saam 83:18.) A im “mek evriting” we de a evn an we de pan di ort. (Revilieshan 4:8, 11) So bifuo eniting did de bout, Jeuova did aalwiez de bout, an im a-go de bout fi eva.—Saam 90:2.
LORN SOM MUO
Wi a-go luk pan som wod laik “Laad” an so, we di Baibl yuuz fi tel wi bout Gad, an ou dem de difrant fram im rait niem. An yu a-go lorn wa mek im waahn yu fi nuo im niem an wa im did du fi mek wi nuo it.
3. A uol iip a wod de we tel wi bout Gad, bot a onggl wan niem im av
Fi fain out di difrens bout som wod we tel wi uu sumadi bi an wa dem du, an dem riil niem, plie di VIDIYO, an den wi a-go taak bout da kwestiyan ya:
-
Wa mek wan wod laik “Laad” difrant fram sumadi rait niem?
Di Baibl don tel wi se piipl worship uol iip a difrant difrant gad an laad. Riid Saam 136:1-3, an den wi a-go taak bout da kwestiyan ya:
-
A uu a di “Gad we big an muo powaful dan aal di ada gad dem” an di “Laad we big an muo powaful dan aal di ada laad dem”?
4. Jeuova waahn yu fi nuo im niem an yuuz it wen yu a taak tu im
Ou wi nuo se Jeuova waahn wi fi nuo im niem? Plie di VIDIYO, an den wi a-go taak bout dem kwestiyan ya:
-
Yu tingk se Jeuova waahn wi nuo wa im niem? Wa mek yu se so?
Jeuova waahn evribadi fi nuo im niem an yuuz it wen dem a taak tu im. Riid Ruoman 10:13, an den wi a-go taak bout dem kwestiyan ya:
-
Yu tingk a wan big ting ef wi yuuz Gad niem?
-
Ou yu fiil wen sumadi memba yu niem an yuuz it wen dem a taak tu yu?
-
Yu tingk it mata tu Jeuova ef wi yuuz im niem?
5. Jeuova waahn yu fi jraa nier tu im
Wan uman we niem Soten we did kom fram wan plies we niem Cambodia did se, “a did di naisis ting eva” wen shi did fain out wa Gad niem. Plie di VIDIYO, an den wi a-go taak bout da kwestiyan ya:
-
Wen Soten did get fi nuo Gad niem, ou dat did chienj ar laif fi di beta?
Bifuo yu an sumadi kyan ton fren, duohn yu afi get fi nuo dem niem fos? Riid Jiemz 4:8a, an den wi a-go taak bout dem kwestiyan ya:
-
Wa Jeuova a aks yu fi du?
-
Wen yu get fi nuo Gad niem an yuuz it, ou dat wi mek yu staat fi jraa nier tu Gad?
SUMADI MAIT-A SE: “A onggl wan Gad de, so it no mata wa yu kaal im.”
-
Yu riili biliiv se Gad niem Jeuova?
-
Ou yu wuda mek sumadi nuo se Gad waahn wi fi yuuz im niem?
DIS A WA YU FI MEMBA
A onggl wan chuu Gad de, an im niem Jeuova. An im waahn wi fi nuo an yuuz da niem de so dat wi kyan jraa nier tu im.
Wa yu did lorn iina da lesn ya?
-
Ou Jeuova difrant fram aal a di ada gad dem we piipl worship?
-
Wa mek wi no fi fried fi yuuz Gad niem?
-
Wa mek wi nuo se Jeuova waahn yu fi jraa nier tu im?
CHEK OUT SOM MUO SITN
Wi a-go fain out bout faiv sitn wa mek wi nuo se Gad de fi chuu.
“Yu Tingk Gad De Fi Chuu?” (Sitn we yu kyan get pan di websait)
Wa mek it mek sens fi biliiv se Jeuova did aalwiez de bout an im a-go de bout fi eva?
Fain out wa mek wi fi stil kaal Gad bai im niem, iivn duo wi no nuo ou dem yuus tu kaal it lang lang taim ago.
Yu tingk it mata wa wi kaal Gad? Fain out wa mek wi se a wan rait niem im av.
a Fi lorn som muor sopm bout wa Gad niem miin an wa mek dem tek it outa som a di Baibl dem, yu kyan riid Appendix A4 iina di New World Translation of the Holy Scriptures.
