“Wha ruawa kpahe oware ovo ho, rekọ evaọ oware kpobi wha rọ olẹ avọ olẹ ayare-ọgaga kugbe uyere-okẹ ta ayare rai via kẹ Ọghẹnẹ; udhedhẹ Ọghẹnẹ nọ u vi otoriẹ kpobi o vẹ te sẹro udu rai gbe ogaga iroro rai ẹkwoma Kristi Jesu.”​—Ahwo Filipai 4:6, 7, Efafa Akpọ Ọkpokpọ.

 “Wha ruawa oware ovo ho; rekọ eva koware koware rọ olẹ gbe olẹ-ayare, te uyere-okẹ he ro ruẹ, nọ iyei epanọ whọ guọlọ kẹ Ọghẹnẹ. Re udhedhẹ Ọghẹnẹ nọ uvi eriariẹ kpobi, ote yọrọ eva gbe iroro rai eva Kristi Jesu.”​—Ahwo Filipai 4:6, 7, Ebaibol Ẹri Na.

 Nọ idibo Ọghẹnẹ a te bi roro iroro egaga hayo ruawa, a sae lẹ se Ọghẹnẹ re ọ kẹ ae omosasọ. Ọghẹnẹ ọ ya eyaa nọ ọ te kẹ idibo riẹ udhedhẹ iroro. Udhedhẹ nana o sai fiobọhọ kẹ ai whaha awaọruọ ọgaga, iroro egaga, jẹ sai thihakọ ebẹbẹ rai. Evaọ owọ avọ 6, a fodẹ oghẹrẹ elẹ sa-sa nọ e rẹ sai fiobọhọ kẹ idibo Ọghẹnẹ wo udhedhẹ riẹ.

 Olẹ ayare-ọgaga yọ olẹ nọ ohwo ọ rẹ jọ lẹ Ọghẹnẹ re o fiobọhọ kẹe. Ohwo ọ rẹ sae lẹ olẹ nana nọ ọkora ọgaga ọ tẹ rrọ oma riẹ hayo nọ uzuazọ riẹ ọ tẹ rrọ ọza, wọhọ epanọ Jesu o ru. (Ahwo Hibru 5:7) Evaọ ẹsibuobu, a rẹ lẹ olẹ nana ẹlẹlẹ.

 Olẹ ayare yọ olẹ nọ ohwo ọ rẹ jọ yare Ọghẹnẹ kẹ uzedhe oware jọ. Idibo Ọghẹnẹ a rẹ sae lẹ elẹ ayare evaọ “oware kpobi” hayo “eva koware koware.” Rekọ u fo nọ oware kpobi nọ ma be yare o rẹ rọwokugbe oreva Ọghẹnẹ wọhọ epanọ o rrọ Ebaibol na.—1 Jọn 5:14.

 Olẹ uyere-okẹ yọ olẹ nọ ma re jo yere Ọghẹnẹ rọkẹ eware nọ o ru kẹ omai no gbe enọ o ti ru kẹ omai evaọ obaro. Nọ ma tẹ be hai yere Ọghẹnẹ rọkẹ eware nọ o ru kẹ omai no, onana u re ru nọ eva e rẹ rọ were omai ẹsikpobi.​—1 Ahwo Tẹsalonika 5:16-18.

 Nọ idibo Ọghẹnẹ a tẹ lẹ oghẹrẹ elẹ nana, Ọghẹnẹ ọ rẹ kẹ ae udhedhẹ riẹ. “Udhedhẹ Ọghẹnẹ” nana yọ oghẹrẹ udhedhẹ nọ ohwo o re wo fikinọ ọ rrọ ogbẹnyusu ọkpekpe Ọghẹnẹ. (Ahwo Rom 15:13; Ahwo Filipai 4:9) Udhedhẹ nana u “vi otoriẹ kpobi” keme obọ Ọghẹnẹ u no ze, yọ o rẹ sai fiobọhọ kẹ omai evaọ idhere nọ ma rẹro riẹ hẹ.

 Oria Ebaibol nana ọ ta nọ udhedhẹ Ọghẹnẹ ọ rẹ sae sẹro udu mai. Ẹme Griki nọ a fa “sẹro” na, yọ ẹme nọ a sai ro dhesẹ oware nọ utu isoja a re ru re a sae sẹro okpẹwho nọ a di ogba wariẹ họ. Epọvo na, udhedhẹ Ọghẹnẹ ọ rẹ sẹro udu gbe iroro ohwo. U re fiobọhọ kẹ ohwo nọ ọ be rẹriẹ ovao dhe ebẹbẹ nọ ọ gbẹ rọ jọ ọkọkora ha.

 Udhedhẹ Ọghẹnẹ ọ rẹ sẹro mai “ẹkwoma Kristi Jesu,” keme ẹkwoma Jesu ma sae rọ jọ egbẹnyusu Ọghẹnẹ. Jesu ọ rehọ uzuazọ riẹ dhe idhe fiki izieraha mai. Fikiere nọ ma te fi ẹrọwọ họ Jesu, Ọghẹnẹ ọ rẹ ghale omai. (Ahwo Hibru 11:6) Ma sae jẹ rọ ẹkwoma Jesu lẹ se Ọghẹnẹ. Jesu ọ ta nọ: “Ohwo ọvo ọ rẹ nyabru Ọsẹ na ze he ajokpaọ ẹkwoma mẹ.”—Jọn 14:6; 16:23.

 Obe Ahwo Filipai yọ ileta nọ Pọl ukọ na o kere se Ileleikristi nọ e be rria okpẹwho Filipai. a Evaọ obe Ahwo Filipai uzou avọ 4, Pọl ukọ na ọ tuduhọ ahwo ukoko Filipai awọ inọ a hae ghọghọ, kẹsena o te yere ae rọkẹ uruemu ọghọ-oruo rai. Uruemu rai nana o wha oghọghọ se Pọl. (Ahwo Filipai 4:4, 10, 18) Pọl o dhesẹ nọ olẹ o rẹ sai fiobọhọ kẹ ohwo wo udhedhẹ Ọghẹnẹ, yọ ọ fodẹ oghẹrẹ eware sa-sa nọ ma re roro kpahe gbe uruemu nọ ma re dhesẹ. Ma te ru eware nana, “Ọghẹnẹ udhedhẹ na” o re fiobọhọ kẹ omai.—Ahwo Filipai 4:8, 9.