Sea cucumber yọ amara nọ ọ wọhọ ohoi nọ oma riẹ o wọhọ ikukumba. Obotọ abade ọ rẹ rria. Ovioma riẹ o rẹ sai vre ibi, jọ krase krase, hayo tubẹ jọ inwinwe. Amara na ọ sai ru ovioma riẹ na oghẹrẹ kpobi nọ ọ gwọlọ. Ọ sai ru oma riẹ lọlọhọ hayo gaga evaọ umutho emaharo jọ ọvo. Onana u ru nọ ọ sai ro vighi ruọ imighogho esese nọ e rrọ itho evaọ obotọ ame, kẹsena o ve ru oma riẹ gaga re eware nọ e gwọlọ re iẹe no e gbẹ sai si ei no etẹe ze he. Ovioma na họ oware nọ o be hai fiobọhọ kẹ amara na ru onana.

 Roro kpahe onana: Ovioma sea cucumber o rẹ sai nwene kpohọ oghẹrẹ esa. O rẹ sae jọ gaga, o rẹ sae dina lọhọ, o vẹ jẹ jọ biẹghẹ biẹghẹ. Amara na o wo iriẹ jọ evaọ ovioma na. O te si iriẹ na ga, ovioma na o rẹ jọ gaga. Nọ o je ru iriẹ na lọlọhọ, ovioma na o vẹ jọ lọlọhọ. U wo ame jọ nọ o re ro si iriẹ na ga, gbe ame ọfa nọ o re ro ru ai lọhọ.

 Nọ ọ tẹ gwọlọ nọ ovioma na o rẹ jọ gaga, o vẹ rọ ame nọ o re ro si iriẹ na ga na ro si ai ga. Kẹsena nọ ọ jẹ gwọlọ nọ ovioma na o rẹ jọ lọlọhọ, ọ vẹ rọ ame nọ o re ro ru iriẹ na lọhọ na ze. Amara nana ọ rẹ sai ru ovioma na lọhọ te epanọ ohwo o re ro roro nọ oma riẹ o be guọ no.

 Egba-eriariẹ a be daoma ku eware nọ e rẹ sai ru wọhọ ovioma sea cucumber na. Ojọ rai họ, okwakwa nọ a rẹ sai fihọ ẹvori na nọ a te bi ru obẹrọ. A gwọlọ nọ okwakwa na o rẹ jọ gaga, kẹsena nọ a je fi ei họ ẹvori na no, o vẹ lọhọ. Okwakwa na o tẹ sai ru enẹ, ẹsiẹe o te sai ru iruo nọ a gwọlọ.

 Ẹvẹ Who Roro? Kọ oghẹrẹ nọ ovioma sea cucumber o rẹ rọ lọhọ jẹ ga na u mu romavia? Manikọ ẹma a ma riẹ?