Ebaibol na o fiobọhọ kẹ omai riẹ nọ Devidi nọ ọ jọ ovie Izrẹl ọ rria etoke ikpe 1100 rite 1001 taure Kristi ọ tẹ te ze. U te no ere no, ahwo uyẹ riẹ a su evaọ etoke ikpe udhusoi buobu. Rekọ egba-avro jọ a ta nọ Devidi ọ rria akpọ na oke ovo ho, inọ iku riẹ yọ iku esia gheghe nọ ahwo a gbe, nọ etoke nọ Ebaibol ọ fodẹ na o vrẹ thethabọ no. Kọ Devidi ovie na ọ ginẹ rria akpọ na oke jọ?

 Evaọ 1993, ohwo jọ nọ a re se Avraham Biran avọ utu riẹ nọ a rẹ kiotọ eware anwae a duku ẹwẹ-utho jọ nọ a kere eware fihọ evaọ Tel Dan nọ ọ rrọ ofẹ ẹkpẹlobọ ovatha-ọre Izrẹl. Ẹme jọ nọ a kere fihọ ẹwẹ-utho na họ “Uwou Devidi.” A ruẹ nọ ẹvẹrẹ Hibru oke anwae a ro kere ẹme na, yọ etoke ikpe 900 rite 801 taure Kristi ọ tẹ te ze a kere i rie. O rrọ vevẹ nọ ẹwẹ-utho nana o no upila utho nọ ahwo Eram a ro vi ze, onọ a jẹ jọ ya-oma kpahe epanọ a ro fi orẹwho Izrẹl kparobọ unuẹse buobu.

 A jọ obe na Bible History Daily ta nọ: “Ahwo jọ a be vro ẹme nọ ọ rrọ ẹwẹ-utho nana nọ o fodẹ ‘Uwou Devidi’ na . . . Rekọ, egba-eriariẹ eme Ebaibol gbe ekiotọ eware anwae buobu a rọwo nọ upila utho nọ a jọ Tel Dan ruẹ na họ imuẹro ọsosuọ nọ u dhesẹ nọ Devidi ovie na nọ Ebaibol na o gbiku riẹ na ọ ginẹ rria akpọ na. Onana o rrọ usu eware nọ e mai wuzou nọ a kiẹ via kpahe Ebaibol na, onọ obe na Biblical Archaeology Review o niyẹrẹ riẹ.”