Mercy: Eva e were omẹ nọ me ro di owhẹ fihọ uwou Sarah, ẹvẹ obonẹ?

Sarah: Ma riẹ.

Mercy: Ẹdẹdekọ nọ mẹ rọ nyaze, ma ta nọ Ọghẹnẹ ọ be daezọ uye nọ ma be ruẹ. * Yọ whọ ta nọ u kri no nọ u bi ro gbe owhẹ unu sọ Ọghẹnẹ ọ be ginẹ daezọ mai, maero kọ anwẹnọ oni ra ọ rọ rrọ otọ fiki asidẹnte na. Ẹhẹẹ, kọ ẹvẹ oma riẹ na dede?

Sarah: Oma riẹ na u re kpotọ kpehru. Rekọ, o dina woma nẹnẹ.

Mercy: Ma yere Ọghẹnẹ. Mẹ riẹ nọ o ginẹ lọhọ kẹ owhẹ vievie he.

Sarah: Ere o rrọ. Mẹ riẹ hẹ sọ oma riẹ na o te ginẹ ga ẹdẹjọ.

Mercy: Ere o rẹ jọ ohwo oma. Whọ tẹ kareghẹhọ evaọ ẹdẹdekọ nọ mẹ rọ nyaze, mẹ ta nọ me te zihe ze, ma te ta kpahe oware nọ Ọghẹnẹ ọ rọ kuvẹ kẹ uye-oruẹ, kpakiyọ o wo ogaga nọ ọ sai ro ku ei họ.

Sarah: Mẹ kareghẹhọ.

Mercy: Re ma tẹ kuyo onọ oyena no Ebaibol ze, joma kake kiẹ eware jọ nọ ma ta kpahe ẹdẹdekọ riwi tao.

Sarah: U woma.

Mercy: Ma ta nọ odibo Ọghẹnẹ jọ dede nọ a fodẹ evaọ Ebaibol na ọ jẹ nọ kpahe oware nọ o soriẹ nọ Ọghẹnẹ ọ rọ kuvẹ kẹ uye-oruẹ. Rekọ Ọghẹnẹ ọ whọku ei hi fikinọ ọ nọ enọ itieye na, hayo ta nọ o wo ẹrọwọ họ.

Sarah: Ere ma ta ẹdẹdekọ.

Mercy: Ma te je wuhrẹ nọ o rẹ da Ọghẹnẹ gaga nọ ma tẹ be ruẹ uye. Wọhọ oriruo, Ebaibol na ọ ta nọ okenọ idibo Ọghẹnẹ a jẹ ruẹ uye evaọ oke anwae, o jẹ da Jihova gaga. * Kọ o gbẹ rrọ oware omosasọ inọ Ọghẹnẹ ọ be daezọ uye-oruẹ mai?

Sarah: Ẹhẹ.

Mercy: Ofariẹ, ma tẹ jẹ ta nọ Ọghẹnẹ o ti ku uye-oruẹ kpobi họ evaọ oke nọ o fihọ keme o wo ogaga nọ ọ sai ro ru ei.

Sarah: Whaọ, oware nọ u bi gbe omẹ unu na oye. Fikieme Ọghẹnẹ ọ rọ kuvẹ re eware iyoma e via, kpakiyọ o wo ogaga nọ ọ sae rọ whaha ae?

Mercy: Re ma kuyo onọ ra na, ma re kpohọ obe ọsosuọ Ebaibol na, koyehọ obe Emuhọ. Kọ whọ riẹ kpahe iku Adamu avọ Ivi gbe ubi ure nọ Ọghẹnẹ ọ ta nọ a re he na?

Sarah: Ee, a jọ obọ ichọche wuhrẹ omai kpahe iẹe. Ọghẹnẹ ọ ta nọ a re ubi ure jọ họ, rekọ a tẹ nyae re iẹe ghele.

 Mercy: Nwanọ ere. Obọnana, joma ta kpahe oware nọ o via nọ o lẹliẹ Adamu avọ Ivi raha uzi na. Yọ oware yena nọ o via na oye o soriẹ nọ Ọghẹnẹ ọ rọ kuvẹ kẹ uye-oruẹ. Iviena rovie kpohọ obe Emuhọ 3:1-5, re who sei ze.

Sarah: U woma. “Whaọ oriọvọ o tẹrọ arao nọ o wo ẹghẹ vi erao ẹwọ kpobi nọ ỌNOWO na, Ọghẹnẹ ọ mae, ọ tẹ ta kẹ aye na nọ, ‘Kọ Ọghẹnẹ ọ ghinẹ ta nọ wha re ubi-ure ovuovo eva ogba na ha?’ Aye na ọ tẹ ta kẹ oriọvọ na nọ, ‘Ujomai ma rẹ re ibi-ire ogba na. Rekọ Ọghẹnẹ ọ ta nọ, “Wha re ubi-ure nọ o rọ udevie ogba na ha, hayo obọ urote gbe he, ogbẹrọ erehe wha re ti whuẹ.” ’ Oriọvọ na ọ tẹ ta kẹ aye na nọ, ‘Wha re ti whuẹ hẹ. Keme Ọghẹnẹ ọ riẹ nọ, ẹdẹ nọ wha re riẹ, ibiaro rai i re ti rovie, wha vẹ te jọ wọhọ Ọghẹnẹ, nọ ọ rẹ riẹ uwoma gbe uyoma.’”

Mercy: Whẹ kobiruo. Joma ta kpahe oria Ebaibol nana unọjọ utọjọ. Orọ ọsosuọ, muẹrohọ nọ araomuomu ọ ta ẹme kẹ aye na, Ivi. Oria ofa evaọ Ebaibol na o ta nọ Setan Ẹdhọ na họ ohwo nọ ọ rọ ẹkwoma araomuomu na ta ẹme kẹ Ivi. * Setan ọ nọ Ivi kpahe uzi nọ Ọghẹnẹ o fihọ kpahe ubi ure nọ o jọ udevie ogba na. Kọ who muẹrohọ oware nọ Ọghẹnẹ ọ ta nọ u ti noi ze otẹrọnọ Adamu avọ Ivi a re ubi ure na?

Sarah: Ọghẹnẹ ọ ta nọ a ti whu.

Mercy: Ginọ ere. Setan ọ rọ ẹkwoma ẹme nọ ọ ta rọ bọwo Ọghẹnẹ ota. Ọ ta nọ: “Wha re ti whuẹ hẹ.” Ọtọrue Setan o se Ọghẹnẹ na.

Sarah: Me ri yo kpahe abọ iku nana vẹre he.

Mercy: Nọ Setan o se Ọghẹnẹ ọtọrue, ọ tẹ rọ ere fi ẹme avro jọ họ otọ nọ o rẹ rehọ oke re a te kuhọ. Kọ whọ gbẹ ruẹ oware nọ o wha riẹ ze?

Sarah: Um. Ẹme na o vẹ omẹ ẹro tere he.

Mercy: Mẹ rehọ oriruo jọ ru ẹme na vẹ kẹ owhẹ. Ma rehọ iẹe nọ mẹ nya bru owhẹ ze ẹdẹjọ jẹ ta kẹ owhẹ nọ me wo ẹgba vi owhẹ. Ẹvẹ ma sae rọ riẹ ohwo nọ ọ mae ga?

Sarah: Me roro nọ ma rẹ rọ oware jọ dawo iẹe.

Mercy: Ginọ ere. Ma rẹ sai fi oware ogbẹgbẹdẹ jọ họ otọ re ma riẹ ohwo nọ ọ rẹ sae wọe. Uzẹme riẹ họ, o rẹ raha oke he re ma riẹ ohwo nọ ọ mai ga.

Sarah: Ẹme ra na o vẹ omẹ ẹro.

Mercy: Kọ ẹvẹ otẹrọnọ mẹ ta nọ mẹ rọ ohwo oruọzewọ vi owhẹ keme whọ rẹ viẹ ahwo họ? O lọhọ họ re ma nwane riẹ oyena ovavo, ogbẹrọ ere?

Sarah: Ere o rrọ.

Mercy: O rrọ ere keme a rẹ sae rọ oware ogbẹgbẹdẹ nọ a rẹ wọ rọ riẹ ohwo nọ o wo uruemu oruọzewọ họ.

Sarah: Vievie.

Mercy: Uzẹme riẹ họ, re ma ginẹ riẹ ohwo nọ o wo uruemu oruọzewọ, ma rẹ kuvẹ re ahwo a muẹrohọ omai re a riẹ ohwo nọ ọ ginẹ rrọ oruọzewọ.

Sarah: Oware nọ o mai woma oye.

Mercy: Ma wariẹ rri oria Ebaibol nọ ma se na. Kọ Setan ọ ta nọ o wo ogaga vi Ọghẹnẹ?

Sarah: Ijo.

Mercy: O hae jọ nọ ere ọ ta, Ọghẹnẹ ọ hae rọ omoware osese dhesẹ kẹe nọ o te he. Ukpoye Setan ọ ta nọ ọ rrọ ohwo oruọzewọ vi Ọghẹnẹ, inọ Ọghẹnẹ yọ ohwo eviẹhọ. Koyehọ ọ be ta nọ Ọghẹnẹ yọ ọtọrue, inọ ọyomariẹ họ ohwo nọ ọ be ta uzẹme kẹ Ivi.

Sarah: Ẹme na o vẹ omẹ ẹro.

Mercy: Fikinọ Ọghẹnẹ o wo areghẹ gaga, ọ riẹ nọ edhere nọ ọ mae woma nọ a sai ro ku ẹme nana họ họ, ọ rẹ kuvẹ re Setan o dhesẹ oghẹrẹ ohwo nọ ọ rrọ via. Ukuhọ riẹ, ahwo kpobi a vẹ te riẹ ohwo nọ ọ ta uzẹme gbe ọnọ ọ ta ọrue.

Sarah: Koyehọ, Ọghẹnẹ họ ọnọ ọ ta uzẹme na, keme Ivi o whu wọhọ epanọ Ọghẹnẹ ọ ta.

Mercy: Ginọ ere. Rekọ u wo ẹme ọfa jọ nọ  Setan ọ ta. Wariẹ rri owọ avọ 5 na. Kọ who muẹrohọ ẹme ọfa nọ Setan ọ ta kẹ Ivi?

Sarah: Ọ ta kẹe nọ ibiaro riẹ i re ti rovie nọ ọ tẹ re ubi ure na.

Mercy: Ere, ọ tẹ jẹ ta nọ Ivi ọ te jọ “wọhọ Ọghẹnẹ, nọ ọ rẹ riẹ uwoma gbe uyoma.” Koyehọ, Setan ọ be ta nọ Ọghẹnẹ ọ be rọ oware uwoma jọ gbọ ahwo-akpọ ogbọ.

Sarah: Ẹme na o bi vẹ omẹ ẹro.

Mercy: Ẹme yena ginọ okpẹme dẹẹ.

Sarah: Fikieme whọ rọ ta ere?

Mercy: Setan ọ be rọ ẹkwoma ẹme nọ ọ ta na dhesẹ nọ eware e te mai woma kẹ Ivi gbe ahwo-akpọ kpobi nọ a te bi su omobọrai ababọ Ọghẹnẹ. Re ọ sai ku ẹme avro nana họ, Ọghẹnẹ ọ riẹ nọ edhere nọ ọ mai woma nọ o re ro ru ei họ ọ rẹ kẹ Setan uvẹ re o su ahwo-akpọ na. Oye o soriẹ nọ Setan o bi ro su akpọ na. Kọ whọ gbẹ ruẹ oware nọ o soriẹ nọ uye-oruẹ o rọ da akpọ na fia na? Setan họ ọnọ o bi su akpọ na orọnikọ Ọghẹnẹ hẹ. * Rekọ emamọ usi jọ o riẹ.

Sarah: Didi emamọ usi?

Mercy: U wo eware ivẹ jọ nọ Ebaibol na o wuhrẹ omai kpahe Ọghẹnẹ. Orọ ọsosuọ, Jihova ọ be daezọ uye-oruẹ mai. Wọhọ oriruo, muẹrohọ eme nọ Devidi ovie na ọ ta evaọ obe Olezi 31:7. Dede nọ Devidi ọ reoja eware buobu evaọ uzuazọ, muẹrohọ eme nọ ọ ta evaọ olẹ riẹ jọ se Ọghẹnẹ. Iviena se oria Ebaibol yena ze.

Sarah: U woma. O ta nọ: “Mẹ rẹ te wereva ghọghọ fiki uvi uyoyou ra, keme whọ ruẹ ẹbẹbẹ mẹ, who ghine vuhu uye mẹ na mu.”

Mercy: Fikiere, dede nọ Devidi ọ reoja eware buobu, o wo omosasọ keme ọ riẹ nọ Jihova ọ be ruẹ eware nọ e be via kẹe. Jihova ọ be ruẹ ebẹbẹ kpobi nọ ma be rẹriẹ ovao dhe, makọ edada nọ ohwo ọvo ọ sae ruẹ hẹ. Kọ oyena o gbẹ rrọ oware omosasọ kẹ owhẹ?

Sarah: Ẹhẹ.

Mercy: Orọ avivẹ họ, Ọghẹnẹ ọ te kuvẹ re ma ruẹ uye bẹdẹ bẹdẹ hẹ. Ebaibol na ọ ta nọ, kẹle na Ọghẹnẹ ọ te rọ esuo Setan te oba. Ọghẹnẹ o ve ti si uye-oruẹ kpobi no riẹriẹriẹ, makọ uye nọ o be bẹ owhẹ avọ oni ra na dede. Kọ o te were owhẹ re me zihe ze oka notha re ma ta kpahe oware nọ u ro mu omai ẹro nọ Ọghẹnẹ o ti si uye-oruẹ kpobi no kẹle? *

Sarah: Ee, o te were omẹ.