Kọ a ru owhẹ eva dha no ẹdẹjọ nọ o lẹliẹ owhẹ viẹ no?— * O via kẹ omai kpobi no. Ẹsejọ, ma sae viẹ fikinọ a ru omai eva were he. O sae jọnọ ohwo jọ o gu ọrue fihọ omai uzou. Oyena o rẹ sae lẹliẹ eva dha ohwo, ogbẹrọ ere?— Eva e rẹ dha Ọghẹnẹ re nọ a te gu ọruẹ fihọ iẹe uzou. Joma ta kpahe epanọ ma sai ro ru Ọghẹnẹ eva were re eva e siẹe ba ẹdha.

Ebaibol na ọ ta kpahe ahwo jọ nọ a ta nọ a you Ọghẹnẹ, rekọ a ru rie “eva dha” jẹ “rariẹ ofu” riẹ. Joma ta kpahe oware nọ o rẹ lẹliẹ eva dha Jihova nọ ma gbe ru oware nọ ọ ta ha.

Imava ọsosuọ nọ Ọghẹnẹ ọ ma evaọ akpọ na a ru rie eva dha gaga. O fi rai họ aparadase owowoma nọ a re se ọgbọ Idẹn. Kọ whọ riẹ imava yena?— Ee, Adamu avọ Ivi. Joma ta kpahe oware nọ a ru nọ o lẹliẹ eva dha Jihova.

Nọ Jihova o fi ai họ ọgbọ na no, ọ tẹ ta kẹ ae nọ a rẹrote ei. Ọ tẹ jẹ ta kẹ ae nọ a yẹ emọ re aikpobi a rria ọgbọ na bẹdẹ bẹdẹ. Rekọ taure a te ti yẹ emọ, a te ru oware uyoma jọ. Kọ whọ riẹ oware nọ a ru?— Ukọ-odhiwu jọ o te ru ai ghẹmeeyo kẹ Jihova. Joma ta epanọ onana o rọ via.

Ukọ-odhiwu na ọ rọ ẹkwoma araomuomu ta ẹme kẹ Ivi. Ẹme nọ Ivi o yo na ọ were riẹ gaga, keme araomuomu na ọ ta kẹe nọ ọ “te jọ wọhọ Ọghẹnẹ.” Fikiere o te ru oware nọ araomuomu na ọ ta kẹe nọ o ru. Kọ whọ riẹ oware nọ o ru na?—

Ivi ọ tẹ re ubi ure nọ Jihova ọ ta kẹ Adamu nọ a re he na. Taure Ọghẹnẹ ọ tẹ te ma Ivi, ọ ta kẹ Adamu nọ: “Whọ rẹ sae ria ibi ire nọ e rọ ogba  na odode; rekọ whọ rẹ re ure ẹriẹ ewoma gbe eyoma na ha, keme eva ẹdẹ nọ whọ re riẹ, who re ti whuẹ.”

Ivi ọ riẹ uzi yena. Rekọ o te gbe bi rri ure na, ọ tẹ te ruẹ nọ “ure na u woma ẹriọ, u teje woma eru . . . ọ tẹ kọrọ ubi ure na, ọ tẹ re, ọ tẹ rehọ kẹ ọzae riẹ re ọ re ire.” Eme who roro nọ o lẹliẹ Adamu re ubi ure na?— Fikinọ uyoyou nọ o wo kẹ Ivi aye riẹ, o ga vi onọ o wo kẹ Jihova. O te ru aye riẹ eva were viukpenọ o re ru Jihova eva were. Rekọ o gwọlọ nọ ma re yoẹme kẹ Jihova vi omọfa kpobi.

Kọ whọ kareghẹhọ nọ ma ta nọ araomuomu ọ ta ẹme kẹ Ivi? Wọhọ epanọ ohwo o re yo edo uvou nọ u bi no emu edọbebi ze, o vẹ wọhọ nọ edọbebi na ọ be ta ẹme na, ere ohwo jọ ọ ta ẹme no emu araomuomu na ze. Kọ uvou ono u je no emu araomuomu na ze?— Uvou “oriọvọ anwae na ọnọ a re se Ukumuomu gbe Setan na.”

Kọ whọ riẹ epanọ whọ sai ro ru eva were Jihova?— Whọ rẹ sai ru eva were iẹe nọ whọ tẹ be daoma yoẹme kẹe ẹsikpobi. Setan ọ ta nọ ọ rẹ sai ru ahwo kpobi yoẹme kẹ ọyomariẹ. Fikiere Jihova ọ tẹ tuduhọ omai awọ nọ: “Ọmọzae mẹ [hayo ọmọtẹ mẹ], wo areghẹ, re who ru omẹ eva were, re mẹ sae kẹ ọnọ ọ poviẹ omẹ uyo.” Setan ọ be poviẹ hayo se Jihova ẹkoko. O s’eha nọ ọ rẹ sai ru ahwo kpobi nọ a gbẹ rọ gọ Jihova ha. Fikiere daoma ru Jihova eva were ẹkwoma ẹme nọ who re yo kẹe, re whọ jẹ gọe. Kọ whọ te daoma ru ere?—