Si Kẹle Ọghẹnẹ

“Erẹwho na Kpobi A Vẹ te Riẹ nọ Mẹ Họ ỌNOWO Na”

ẸVẸ oma o rẹ jọ owhẹ nọ a tẹ wọ eku họ owhẹ uzou kpahe oware nọ who ru hu? Kọ ẹvẹ otẹrọnọ oware na o wha uye se amọfa, makọ se ahwo nọ a riẹ onahona ha? Ababọ avro, whọ te gwọlọ edhere kpobi re eku na o no owhẹ uzou. Kọ whọ riẹ nọ a wọ eku otiọye na fihọ Jihova uzou? Ahwo buobu a rẹ fo Ọghẹnẹ fiki okienyẹ avọ uye-oruẹ nọ e rrọ akpọ na. Kọ o rrọ Jihova oja re o ru odẹ riẹ fo? Ẹhẹ. Joma ta kpahe oware nọ Jihova ọ ta evaọ obe Izikiẹl.—Se Izikiẹl 39:7.

Jihova ọ ta nọ: “Mẹ gbẹte rọwo re a gbe odẹ ẹri mẹ ku ofa ha.” Nọ ahwo-akpọ a tẹ be fo Ọghẹnẹ fiki okienyẹ nọ ọ rrọ akpọ na, yọ a bi gbe odẹ riẹ ku. Evaọ oghẹrẹ vẹ? Evaọ Ebaibol na, ẹsibuobu a rẹ rọ “odẹ” ohwo riẹ oghẹrẹ ohwo nọ ọ rrọ. Obe jọ o ta nọ odẹ Ọghẹnẹ u re ru ahwo riẹ “oghẹrẹ [Ọghẹnẹ] nọ ọ rrọ, koyehọ oghẹrẹ nọ o dhesẹ omariẹ; u te je dhesẹ oruaro gbe adhẹẹ riẹ.” Odẹ Jihova u dhesẹ oghẹrẹ Ọghẹnẹ nọ ọ rrọ. Ẹvẹ Jihova o rri okienyẹ? O mukpahe iẹe. O te je wo ọdawẹ kẹ enọ a bi kienyẹ. * (Ọnyano 22:22-24) Nọ ahwo-akpọ a tẹ be ta nọ Ọghẹnẹ ọ be wha eware nọ ọyomariẹ o mukpahe ze, yọ a be raha odẹ riẹ, jẹ be rọ “odẹ [na] zaharo.”—Olezi 74:10.

Muẹrohọ nọ isiava soso Jihova ọ wariẹ ẹme na “odẹ ẹri mẹ.” (Owọ avọ 7) A tẹ fodẹ Jihova evaọ eria jọ Ebaibol na, a rẹ fodẹ “ọrẹri” kugbei. Ẹme na “ọrẹri” u dhesẹ oware nọ o hẹriẹ oma no eware efa, hayo nọ o rrọ fuafo tẹtẹtẹ. Odẹ Jihova o rrọ ọrẹri keme ọyomariẹ nọ o wo odẹ na ọ rrọ ọrẹri, ọ hẹriẹ oma no oware ugbegbe kpobi. Kọ whọ gbẹ ruẹ nọ ahwo nọ a be fo Ọghẹnẹ fiki emuemu nọ ọ rrọ akpọ na a be poviẹ “odẹ ẹri” riẹ?

Ugogo uzoẹme nọ o dhẹ Ebaibol na duwu họ, epanọ Jihova ọ te rọ rehọ ẹkwoma Uvie riẹ ru odẹ riẹ fo. A jọ obe Izikiẹl ta kpahe uzoẹme nana unuẹse buobu inọ, “erẹwho na kpobi a vẹ te riẹ nọ mẹ họ ỌNOWO na.” (Izikiẹl 36:23; 37:28; 38:23; 39:7) Muẹrohọ inọ erẹwho na a wo udu nọ a te rọ jiroro na kẹ oma rai hi, sọ a rẹ riẹ Jihova hayo a rẹ riẹe he. Ukpoye, o gba rai họ nọ ‘a rẹ riẹe.’ Koyehọ, o rrọ ẹjiroro Jihova re o ru oware jọ nọ o te lẹliẹ erẹwho akpọ na kpobi riẹ nọ ọye họ Jihova, Osu Ehrugbakpọ na, ọnọ odẹ riẹ o rrọ ọrẹri jẹ rrọ fuafo tẹtẹtẹ.

Ẹme nọ Jihova ọ wariẹ unuẹse buobu inọ, “erẹwho na kpobi a vẹ te riẹ nọ mẹ họ ỌNOWO na,” yọ emamọ usi rọkẹ ahwo nọ a bi rẹro oke nọ a ti ro si okienyẹ gbe uye-oruẹ kpobi notọ. Kẹle na, Jihova o ti ru ẹme nọ ọ ta na gba, je si afuẹwẹ kpobi no odẹ riẹ. O ti si emuemu gbe irumuomu kpobi notọ, je siwi ahwo nọ a be kẹ odẹ riẹ adhẹẹ. (Itẹ 18:10) Kọ oma o gbẹ be wọ owhẹ re who wuhrẹ kpahe epanọ whọ sai ro si kẹle Jihova, Ọghẹnẹ ọrẹri nọ “o you oziẹokiẹrẹe” na?—Olezi 37:9-11, 28.

[Oruvẹ-obotọ]