Whọ jọ Obọ O Rrọ Owhẹ Hẹ!
Kọ whẹ yọ Osẹri Jihova nọ ọ rrọ ukoko na kri no, yọ whọ gwọlọ nọ ọrivẹ-orọo ra o kuomagbe owhẹ evaọ egagọ Jihova?
Manikọ udu u whrehe owhẹ no ẹdẹjọ fikinọ ọmọ-uwuhrẹ Ebaibol ra nọ who roro nọ o ti kuomagbe egagọ uzẹme o ru ere he?
Iku inievo mae jọ evaọ obọ Britain i ti fi obọ họ kẹ owhẹ ruẹ oware nọ u gbe fo nọ whọ kuvẹ re obọ o rrọ owhẹ hẹ. Whọ te jẹ ruẹ oghẹrẹ nọ whọ sai ro “gbolo ebrẹdi ra fihọ evaọ ame,” wọhọ odẹme, re whọ sai fi obọ họ kẹ ahwo nọ a re te riẹ uzẹme na ha.—Ọtausi. 11:1.
O GWỌLỌ AKOTHIHO
Oware jọ nọ u wuzou gaga họ akothiho. U fo nọ whọ rẹ dadamu uzẹme na hayo usu ra kugbe Jihova. (Izie. 10:20) Ere Georgina o ru. Evaọ ukpe 1970 nọ o mu Ebaibol họ ewuhrẹ kugbe Isẹri Jihova, onana u ru eva dha ọzae riẹ nọ a re se Kyriacos gaga. Ọzae na ọ jẹ daoma whaha uwuhrẹ na inọ Isẹri Jihova a gbe te uwou riẹ hẹ, ọ tẹ jẹ kwa ebe Isẹri Jihova kpobi nọ ọ ruẹ evaọ uwou na kufiẹ.
Eva e dha ọzae na thesiwa nọ Georgina o mu iwuhrẹ ukoko họ ẹnya no. Ẹdẹjọ ọzae riẹ ọ tẹ wọ ẹwhọ kpobọ Ọgwa Uvie. Nọ oniọvo-ọmọtẹ jọ ọ ruẹ nọ ọzae Georgina ọ be riẹ ẹvẹrẹ Griki jẹ vi Oyibo, o te se oniọvo-ọmọzae jọ nọ ọ rẹ ta ẹvẹrẹ Griki no ukoko ofa ze re o lele ọzae na ta ẹme sọ udu riẹ o rẹ lọhọ. Oghẹrẹ nọ oniọvo-ọmọzae na o ro lele ọzae Georgina ta ẹme o were riẹ, u tube ru nọ a sai ro ru uwuhrẹ Ebaibol kugbei emerae jọ. Rekọ u te oria jọ, ọzae Georgina ọ gbẹ rọwo nọ a wuhrẹ kugbei hi.
Ikpe esa nọ i lele i rie, Georgina ọ ruẹ uye ukpokpoma evaọ obọ ọzae na. Ọzae na ọ ta nọ Georgina ọ tẹ họ-ame evaọ ukoko na, ọ te siẹe. Evaọ ẹdẹ nọ Georgina ọ be te rọ họ-ame, ọ lẹ se Jihova inọ ajọ ọzae riẹ ọ siẹe he. Nọ inievo na a dhẹ ze re a wọe kpohọ okokohọ na, ọzae riẹ ọ tẹ vuẹ ae nọ: “Wha hae dhẹ. Mẹ te rọ omoto wọe ze.” Ọzae na ọ jọ abọ ohiohiẹ okokohọ na je rri ughe aye riẹ nọ a jẹ họ-ame.
Nọ Georgina ọ nyaku Isẹri Jihova no, oware wọhọ ikpe udhuvẹ e ruemu taure ọzae riẹ ọ tẹ te họ-ame
No umuo oke yena vrẹ ukpokpoma na u te kpotọ, ẹmẹrera na ọzae na o te ru inwene ilogbo. Nọ Georgina ọ nyaku Isẹri Jihova no, oware wọhọ ikpe udhuvẹ e ruemu taure ọzae riẹ ọ tẹ te họ-ame. Eme o fi obọ họ kẹ ọzae riẹ, Kyriacos? Ọ ta nọ: “U woma gaga inọ Georgina ọ gba riẹ mu nọ ọ rẹ siọ egagọ Ọghẹnẹ ba ha.” Georgina omariẹ ọ ta nọ: “Ghelọ epanọ ọzae mẹ o kpokpo omẹ te, o jọ ọtamuo mẹ nọ mẹ rẹ siọ egagọ Ọghẹnẹ ba ha. Oke yena kpobi, mẹ jẹ hae lẹ se Jihova, mẹ riẹ nọ ujerekrẹ, ọzae mẹ o ti nwene.”
EPANỌ URUEMU OKPOKPỌ NA U WUZOU TE
Emamọ uruemu Oleleikristi nọ who re dhesẹ yọ oware ofa nọ u re fi obọ họ kẹ ọrivẹ-orọo ra. Pita ukọ na ọ hrẹ eyae Ileleikristi nọ: “Wha rọ oma kpotọ kẹ ezae rai, re otẹrọnọ ejọ e kezọ ẹme na ha, a vẹ te rọ fiki uruemu eyae rai ze edhere na, omake rọnọ a yo ẹme na ha.” (1 Pita 3:1) Oniọvo-ọmọtẹ nọ a re se Christine o ru lele ohrẹ yena, dede nọ o rehọ ikpe buobu re ọzae riẹ o te kuomagbei evaọ ukoko na. Nọ o kurẹriẹ, ikpe udhegbọ e ruemu rekọ John ọzae riẹ ọ rọwo Ọghẹnẹ hẹ evaọ oke yena soso. Ọzae na ọ gwọlọ kuomagbe uvumọ egagọ họ, rekọ ọ ruẹ nọ Christine o se egagọ riẹ gboja gaga. Ọ ta nọ: “Mẹ ruẹ nọ egagọ na e be lẹliẹ eva were aye mẹ. Yọ o wo ajọwha iruo gaga, onọ u fi obọ họ kẹ omẹ evaọ okenọ eware e jọ gaga.”
Christine ọ jẹ gba egagọ riẹ họ ọzae riẹ hẹ, ọnọ ọ ta nọ: “No emuhọ ze, Christine ọ jẹ hae rehọ iwuhrẹ egagọ riẹ kpokpo omẹ hẹ, ọ kẹ uvẹ re mẹ ọvo me vuhu uzẹme na mu.” Nọ Christine ọ tẹ jọ Uwou-Eroro hayo Awake! ruẹ izoẹme nọ e ta kpahe otokiẹ-eriariẹ gbe emama nọ ọ riẹ nọ e rẹ were ọzae riẹ gaga, o ve dhesẹ ae kẹe nọ, “Me roro nọ oware nọ a be jọ etenẹ ta kpahe na o te were owhẹ.”
Nọ oke o be nyaharo na, John o te serihọ no iruo nọ ọ jọ vẹre je mu iruo obọ riẹ họ. Enẹna nọ o wo uvẹ vi epaọ anwẹdẹ no na, o te mu enọ nọ i wuzou họ eroro kpahe, wọhọ, ‘Kọ kpregede ma rọ ziọ akpọ, manikọ a ma omai avọ ẹjiroro?’ Ẹdẹjọ oniọvo jọ nọ o je lele John ta ẹme ọ nọ riẹ nọ, “Kọ ma gbe mu uwuhrẹ Ebaibol họ?” John ọ ta nọ, “Enẹna nọ u bi mu omẹ ẹro nọ Ọghẹnẹ ọ rrọ no na, mẹ tẹ rọwo.”
Whọ gbẹ ruẹ epanọ akothiho Christine o fi obọ họ te? Ikpe udhe soso ọ lẹ nọ jọ Ọghẹnẹ o fi obọ họ kẹ John ọzae riẹ vuhu uzẹme na, uwhremu na John ọ tẹ họ-ame. Enẹna aimava a be gọ Jihova. John ọ ta nọ: “Eware ivẹ e lẹliẹ omẹ kurẹriẹ. Ẹwo gbe uruemu owhẹwhẹtiẹ inievo na. Omọvo Isẹri Jihova ọ tẹ rrọ ọrivẹ-orọo ra, kiyọ ọrivẹ-orọo nọ o wo omaurokpotọ, nọ a re fievahọ, nọ ọ rẹ rọ ẹgwọlọ ọrivẹ karo who wo na.” Ẹhẹ, Christine o ru lele ẹme nọ ọ rrọ obe 1 Pita 3:1, yọ o wha emamọ iyẹrẹ ze.
IBI NỌ A KỌ E RẸ MỌ EVAỌ OBARO
Kinọ ọmọ-uwuhrẹ Ebaibol ra o gbe bi wo isiuru kẹ uwuhrẹ na wọhọ epaọ ọsosuọ họ. Solomọn ovie na o kere nọ: “Evaọ ohiohiẹ kọ ibi ra, gbe evaọ owọwọ who si obọ ra no ho; keme whọ riẹ onọ u re ti woma ha, onana hayo oyena, hayo ai ivẹ i re ti woma.” (Ọtausi. 11:6) Ẹsejọ o rẹ rehọ ikpe buobu re ohwo o te ti kurẹriẹ ziọ ukoko na. O make rrọ ere na, ohwo ọ rẹ sai vuhu mu uwhremu na inọ u gine wuzou re o bigba Ọghẹnẹ. (Jem. 4:8) Ẹhẹ, oke nọ who rẹro riẹ hẹ, ohwo na o ti ro kurẹriẹ.
Joma ta kpahe Alice nọ ọ kwa no India kpohọ England. O mu Ebaibol họ ewuhrẹ evaọ ukpe 1974. Ẹvẹrẹ India nọ a re se Hindi ọ rẹ ta, rekọ ọ jẹ gwọlọ nọ ọ rẹ riẹ Oyibo ziezi. Ọ ruabọhọ uwuhrẹ Ebaibol na te ikpe jọ, yọ ọ jẹ hai kpohọ iwuhrẹ evaọ ukoko Oyibo ẹsejọ. Ọ riẹ nọ eware nọ o bi wuhrẹ na ginọ uzẹme, rekọ o je rri rai evevere. U te no ere no, o wo isiuru kpahe ugho gaga yọ o re kpohọ arozaha omakugbe ẹsikpobi. Ukuhọ riẹ Alice ọ tẹ siọ uwuhrẹ Ebaibol ba.
Oware wọhọ ikpe Ọgba e vrẹ no, Alice o te vi ileta se Stella nọ o je wuhrẹ Ebaibol kugbei vẹre. O kere nọ: “Mẹ riẹ nọ eva e te were owhẹ re who yo nọ ohwo jọ nọ who je wuhrẹ Ebaibol kugbe evaọ ukpe 1974 ọ họ-ame evaọ okokohọ ubrotọ nọ ọ vrẹ na. Who ru oware ulogbo jọ evaọ uzuazọ mẹ. Whọ kọ ubi uzẹme na họ omẹ udu, yọ dede nọ mẹ roma mudhe kẹ Ọghẹnẹ evaọ oke yena ha, ubi na o jọ omẹ udu.”
Ileta nọ Alice o kere se Stella e ta nọ: “Mẹ riẹ nọ eva e te were owhẹ re who yo nọ ohwo nọ who je wuhrẹ Ebaibol kugbe evaọ ukpe 1974 ọ họ-ame evaọ okokohọ ubrotọ nọ ọ vrẹ na”
Eme ọ wọ Alice kurẹriẹ? Ọ ta nọ uweri ogaga o jariẹ oma nọ ọzae riẹ o whu evaọ ukpe 1997. Ọ tẹ lẹ se Ọghẹnẹ. Nọ iminiti ikpe e nwane vrẹ no, Isẹri Jihova ivẹ jọ nọ e be ta ẹvẹrẹ Punjabi a tẹ nyaze uwou riẹ, jẹ kẹe omobe ovẹvẹ na, Didi Ẹruore Ọ Rrọ kẹ Iyoyou Mai nọ I Whu No? Alice o vuhumu nọ Ọghẹnẹ o yo olẹ riẹ na, fikiere ọ tẹ jiroro nọ o re kuomagbe Isẹri Jihova. Rekọ ẹvẹ ọ te rọ ruẹ Ọgwa Uvie? Ọ ruẹ obe anwae jọ nọ o kere adrẹse ukoko Punjabi nọ Stella ọ kẹ riẹ fihọ. Alice o te kpohọ Ọgwa Uvie na, yọ inievo na a dede i rie rehọ ziezi. Ọ ta nọ, “Uyoyou nọ inievo na a dhesẹ kẹ omẹ gbe oghẹrẹ nọ a rọ whẹtiẹ omẹ h’oma u duobọte omẹ nọ mẹ maki no Ọgwa Uvie na no, u si uweri no omẹ oma.”
O te mu iwuhrẹ họ ẹnya ẹsikpobi jẹ wariẹ mu uwuhrẹ Ebaibol riẹ họ, o te je wuhrẹ epanọ ọ sae rọ ta je se ẹvẹrẹ Punjabi ziezi. Ọ họ-ame evaọ ukpe 2003. Enẹ o ro ku ileta nọ o kere se Stella na họ, “Me yere owhẹ gaga kẹ ubi uzẹme na nọ whọ kọ họ omẹ udu ikpe udhegbizii nọ e vrẹ, gbe emamọ oriruo nọ who fi h’otọ kẹ omẹ.”
“Me yere owhẹ gaga kẹ ubi uzẹme na nọ whọ kọ họ omẹ udu ikpe udhegbizii nọ e vrẹ, gbe emamọ oriruo nọ who fi h’otọ kẹ omẹ.”—Alice
Eme who wuhrẹ no iku nana kpobi ze? O sai lehie owhẹ obọ vi epanọ who roro, rekọ ohwo ọ tẹ ginẹ rrọ oruọzewọ, wo isiuru kẹ uzẹme na gbe omaurokpotọ, Jihova o re fi obọ họ kẹe re o kurẹriẹ ziọ ukoko na. Kareghẹhọ ẹme nọ Jesu ọ ta evaọ ọtadhesẹ riẹ: ‘Ubi na o vẹ rro, ọnọ ọ kọ ubi na ọ riẹ epanọ o rọ rro ho. Otọ na ovo o mọ ubi; ọsosuọ ebe, kẹsena iluelue, kẹsena eruọka ọ tẹ rrọ eva iluelue na.’ (Mak 4:27, 28) Orro otiọye na ẹmẹrera “oye ọvo” o rẹ rọ romavia. Evaọ uzẹme, owhowho-uvie ọ rẹ riẹ epanọ ubi na o te rọ mọ họ. Fikiere, gbẹ hae kọ ibi buobu. Ẹsejọhọ who ti vu buobu re.
Whọ jọ olẹ o thọrọ owhẹ ẹro ho. Georgina avọ Christine a jẹ hae lẹ kẹse kẹse. Whọ tẹ be “hẹ lẹ kẹse kẹse,” obọ o gbẹ be rrọ owhẹ hẹ, whọ te wariẹ ruẹ “ebrẹdi” nọ who gbolo fihọ ame nọ “edẹ buobu e [tẹ] vrẹ no.”—Rom 12:12; Ọtausi. 11:1.
