UZOẸME UWUHRẸ 26
OLE AVỌ 8 Jihova Họ Adhẹzọ Mai
Ru re Jihova Ọ Jọ Utho Ra
“Utho ọvo nọ o wọhọ Ọghẹnẹ mai o rrọ họ.”—1 SAM. 2:2.
OWARE NỌ A JARIẸ TA KPAHE
A jariẹ ta kpahe uruemu nọ Jihova o wo nọ u ru nọ a ro sei utho, gbe epanọ ma sae rọ rehọ aro kele iei jọ wọhọ utho.
1. Eme Devidi o ro dhesẹ Jihova evaọ Olezi 18:46?
AKPỌ nana nọ ma rrọ na, ebẹbẹ jọ e sai te ohwo idudhe. Yọ e sae raha eware ku ohwo hayo tube nwene uzuazọ ohwo fihọ oghẹrẹ ọfa no. Ma yere Jihova gaga nọ o bi ro fiobọhọ kẹ omai. Ma jọ uzoẹme nọ ọ vrẹ na wuhrẹ nọ Jihova yọ Ọghẹnẹ nọ ọ rrọ uzuazọ, yọ ọ ruẹrẹ oma kpahe inọ o re fiobọhọ kẹ omai ẹsikpobi. Nọ ma tẹ ruẹ epanọ o bi ro fiobọhọ kẹ omai, o rẹ lẹliẹ omai riẹ nọ “Jihova ọ rrọ uzuazọ!” (Se Olezi 18:46.) Nọ Devidi ọ nwane ta nọ Jihova yọ Ọghẹnẹ nọ ọ rrọ uzuazọ no, ọ tẹ ta nọ Jihova họ “Utho mẹ.” Kọ fikieme Devidi ọ rọ rehọ utho nọ o rrọ uzuazọ họ ro dhesẹ Jihova Ọghẹnẹ nọ ọ rrọ uzuazọ na?
2. Eme ma ti wuhrẹ kpahe ẹme nọ Devidi ọ ta inọ Jihova họ “Utho mẹ” na?
2 Ma te jọ uzoẹme nana ta kpahe oware nọ o soriẹ ze nọ a ro se Jihova utho, gbe oware nọ oyena u ru omai riẹ kpahe Jihova. Ma te jẹ ruẹ oware nọ o sae lẹliẹ omai gine rri Jihova fihọ Utho mai. Ma vẹ te ta ẹme te epanọ ma sai ro wo uruemu nọ Jihova o wo nọ a rọ fiki riẹ sei Utho na.
OWARE NỌ A RỌ FIKI RIẸ SE JIHOVA UTHO
3. Eria vẹ a jo se Jihova utho, kọ fikieme a ro sei ere evaọ Ebaibol na? (Rri uwoho nọ o rrọ uke Uwou-Eroro na.)
3 Nọ a jọ Ebaibol se Jihova “utho” na, o rẹ lẹliẹ omai riẹ oghẹrẹ nọ Jihova ọ rrọ. Eria buobu nọ a jo se Jihova utho na yọ eria nọ a jo jiri Jihova inọ ohwo ọvo nọ ọ wọhọ e riẹ ọ rrọ họ. Oria ọsosuọ nọ a jo sei “Utho na” họ obe Iziewariẹ 32:4. Okenọ Hana ọ jẹ lẹ se Ọghẹnẹ, ọ ta nọ “utho ọvo nọ o wọhọ Ọghẹnẹ mai o rrọ họ.” (1 Sam. 2:2) Habakọk ọruẹaro na o se Jihova “Utho mẹ.” (Hab. 1:12) Yọ ohwo nọ o kere Olezi avọ 73 na o se Jihova “utho udu mẹ.” (Ol. 73:26, ẹme-obotọ) Makọ Jihova dede o se omariẹ utho re. (Aiz. 44:8) Ma te ta ẹme kpahe eware esa jọ nọ a rọ fiki riẹ se Jihova utho. Yọ ma te ruẹ epanọ ma sai ro ru re Jihova ọ jọ “Utho mai.”—Izie. 32:31.
Idibo Jihova a rri Jihova inọ ọye họ Utho rai nọ a rẹ sae rẹroso (Rri edhe-ẹme avọ 3)
4. Fikieme ma sae rọ ta nọ Jihova yọ adhẹzọ? (Olezi 94:22)
4 Jihova yọ adhẹzọ. Ohwo ọ rẹ sae dhẹ kpohọ oria nọ utho ulogbo o rrọ nọ ọ tẹ ruẹ nọ okposo ọ be te rrọ, hayo ofou ọgaga ọ be gwọlọ fou ze. Ere ọvona re, ma rẹ sae dhẹ bru Jihova re ọ sẹro mai nọ ẹbẹbẹ ologbo jọ o te te omai. (Se Olezi 94:22.) Jihova ọ be thọ omai no ebẹbẹ buobu. Ọ tẹ make kuvẹ nọ ebẹbẹ jọ i te omai, o re fiobọhọ kẹ omai re ma sai gbe dikihẹ ga. Yọ ọ ya eyaa inọ o ti si ebẹbẹ kpobi gbe eware nọ e rẹ lẹliẹ ozọ mu omai no akpọ na.—Izik. 34:25, 26.
5. Eme ma re ru nọ u re dhesẹ nọ ma rri Jihova nọ ọye họ Utho nọ ma rẹ dhẹ dhere?
5 Oware jọ nọ ma re ru nọ u re dhesẹ nọ ma rehọ Jihova wọhọ Utho nọ ma rẹ dhẹ dhere họ, ma rẹ lẹ sei. Nọ ma tẹ lẹ sei, ọ rẹ kẹ omai “udhedhẹ” riẹ nọ o rẹ lẹliẹ udu te omai otọ. (Fil. 4:6, 7) Ere Jihova o ru kẹ oniọvo-ọmọzae jọ nọ a re se Artem okenọ a mu ei fihọ uwou-odi fikinọ ọ be gọ Jihova. U wo ohwo jọ nọ ọ rẹ kiẹ otọ oware nọ o via nọ ọ jẹ hai se oniọvo na re ọ nọe enọ. Ọ rrọ eva gaga. Ọ jẹ hai ru re ozọ u mu oniọvo na, yọ o je ru oma vuọ ẹe. Oniọvo na ọ ta nọ: “Oke kpobi nọ o te mu omẹ enọ họ ẹnọ no, udu u re bru omẹ. . . . Mẹ jẹ hae lẹ se Jihova re udu o siọ omẹ ba ebru, re ọ jẹ kẹ omẹ areghẹ. Onana u ru nọ oware nọ ohwo na ọ jẹ gwọlọ u gbe tei obọ họ. . . . Fikinọ Jihova ọ jọ kugbe omẹ, o tẹ wọhọ ẹsenọ ugbẹhẹ ogaga o rrọ omẹ emu.”
6. Fikieme ma jẹ rẹroso Jihova ẹsikpobi? (Aizaya 26:3, 4)
6 Jihova yọ Ọghẹnẹ nọ a rẹ sae rẹroso. Utho ulogbo o rẹ jọ oria ọvo, u re no etẹe hẹ. Ere re, oke kpobi Jihova ọ riẹ gidigba. Ma sae rẹroso ẹe inọ o ti fiobọhọ kẹ omai keme ọye họ “Utho ebẹdẹ bẹdẹ na.” (Se Aizaya 26:3, 4.) Jihova o re whu hu. Fikiere eyaa kpobi nọ ọ ya, o re ru ei gba. Yọ oke kpobi nọ ma lẹ sei, o re yo. O re je fiobọhọ kẹ omai oke kpobi nọ ma tẹ rrọ uye. Ma rẹ jẹ rẹroso Jihova keme ọ rẹ talamu ahwo nọ a be gọe. (2 Sam. 22:26) Onana u dhesẹ nọ eware nọ ma ru kẹe e rẹ thọrọ iẹe ẹro vievie he. Ọ te hwosa kẹ omai.—Hib. 6:10; 11:6.
7. Ẹvẹ udu mai o rẹ jọ nọ ma te fievahọ Jihova? (Rri uwoho na re.)
7 Oware jọ nọ u re dhesẹ nọ ma rri Jihova inọ ọye họ Utho mai họ, ma te fi eva mai kpobi họ iẹe. Ma re fievahọ iẹe inọ ma te gbe bi ru oware nọ ọ ta o tẹ make rọnọ o lọhọ họ, erere o ti te omai. (Aiz. 48:17, 18) Yọ ma tẹ ruẹ epanọ Jihova o bi ro fiobọhọ kẹ omai, o rẹ lẹliẹ omai fievahọ iẹe viere. Udu o vẹ te jọ omai awọ inọ u wo oghẹrẹ ọvo nọ eware e te ga te he, Jihova o ti fiobọhọ kẹ omai. Ẹsejọ nọ ẹbẹbẹ jọ o te te omai, yọ u wo ohwo ọvo nọ ọ sai fiobọhọ kẹ omai hi, ẹsiẹe ma rẹ mae ruẹ nọ Jihova yọ Ọghẹnẹ nọ a rẹ sae ginẹ rẹroso. Ere o jọ kẹ Brọda Vladimir. Ọ ta nọ: “Okenọ a ro fi omẹ họ uwou-odi oye mẹ mae rọ kẹle Jihova kpaobọ. O lẹliẹ omẹ rẹroso Jihova vi epaọ anwẹdẹ keme mẹ ọvo mẹ jọ etẹe, yọ Jihova ọvo ọ rẹ sai fiobọhọ kẹ omẹ.”
Ma te fi eva mai kpobi họ Jihova, kiyọ ma rri rie nọ Utho mai ọ rrọ (Rri edhe-ẹme avọ 7)
8. (a) Fikieme ma rọ ta nọ Jihova o re nwene he? (b) Eme ma rẹroso Jihova inọ o ti ru fikinọ ma rri rie nọ ọye họ Utho mai? (Olezi 62:6, 7)
8 Jihova o re nwene he. Epanọ utho ulogbo u re nwene he na, ere Jihova o re nwene he. Uruemu riẹ u re nwene he. Yọ oware kpobi nọ ọ gwọlọ ru, o re ru ei. (Mal. 3:6) Okenọ Ẹdhọ gbe Adamu avọ Ivi a wọso Jihova evaọ ọgbọ Idẹn, Jihova o nwene oware nọ ọ gwọlọ ru hu. O nwane wọhọ ẹme nọ Pọl ukọ na o kere inọ Jihova “ọ sae vro omariẹ hẹ.” (2 Tim. 2:13) Onana u dhesẹ nọ oware kpobi nọ o via kẹhẹ hayo oware kpobi nọ ohwo jọ o ru kẹhẹ, Jihova o re nwene uruemu riẹ hẹ. O re nwene izi riẹ gbe he. Yọ ọ rẹ kpairoro vrẹ oware nọ ọ gwọlọ ru hu. Ma rẹroso Jihova inọ o ti siwi omai je fiobọhọ kẹ omai nọ ẹbẹbẹ jọ o te te omai, o make ga kẹhẹ.—Se Olezi 62:6, 7.
9. Eme who wuhrẹ no iku Tatyana ze?
9 Ma tẹ be hae kareghẹhọ oghẹrẹ Ọghẹnẹ nọ Jihova ọ rrọ jẹ be hai roro kpahe oware nọ ọ gwọlọ ru, kiyọ ma rri Jihova fihọ Utho mai. Yọ o rẹ whae ze nọ ma gbe ro roro iroro ga hrọ họ nọ ebẹbẹ i te te omai, ma ve je kru ẹrọwọ mai. (Ol. 16:8) Oye u fiobọhọ kẹ oniọvo-ọmọtẹ jọ nọ a re se Tatyana thihakọ okenọ a fi ei họ uwou-odi evaọ uwou obọriẹ fikinọ ọ be gọ Jihova. Ọ ta nọ: “Mẹ ọvo mẹ jọ uwou oke yena. O jẹ kẹ omẹ uye gaga evaọ oke ọsosuọ. Me je roro iroro gaga.” Rekọ ọ tẹ kareghẹhọ nọ fiki Jihova nọ ọ be gọ ẹbẹbẹ na o ro tei na, yọ o roja gaga inọ o re kru ẹrọwọ riẹ. Ọ tẹ jẹ kareghẹhọ oware nọ Jihova ọ jiroro nọ o ti ru. O tẹ lẹliẹe kru udu ga. Oniọvo na ọ ta nọ: “Nọ me roro kpahe oware nọ o wha riẹ ze nọ ẹbẹbẹ na o ro te omẹ, mẹ tẹ ruẹ vevẹ nọ fiki Jihova nọ mẹ be gọ ẹbẹbẹ na o ro te omẹ. O tẹ whae ze nọ me gbe je roro kpahe omamẹ hẹ, inọ, ‘Kinọ ẹbẹbẹ nọ o te omẹ?’”
10. Eme ma re ru nọ u re dhesẹ nọ ma rri Jihova nọ ọye họ utho mai enẹna?
10 Eware jọ e te via evaọ obaro nọ ma bi yeri kpohọ na. Yọ o te gwọlọ nọ ma rẹroso Jihova vi epanọ ma rẹroso ẹe enẹna. Fikiere ma rẹ jọ enẹna rẹroso Jihova gaga inọ o ti fiobọhọ kẹ omai re ma sai thihakọ ebẹbẹ nọ i ti te omai. Kọ eme ma re ru re ma sai fievahọ iẹe? Ma rẹ hai se iku ahwo nọ e rẹroso Jihova nọ e rrọ Ebaibol na gbe iku inievo mai nọ e rẹroso Jihova re. Nọ who te bi se iku na, daoma muẹrohọ eware nọ Jihova o ru kẹ ae nọ u dhesẹ nọ ọ ginẹ wọhọ utho kẹ idibo riẹ. Roro didi kpahe iku na. Who te ru ere, who ti rri Jihova inọ ọye họ Utho ra.
RỌ ARO KELE JIHOVA UTHO MAI NA
11. Fikieme ma jẹ rọ aro kele uruemu Jihova nọ o lẹliẹ e riẹ wọhọ utho na? (Rri ẹkpẹti na re, “ Oware nọ Inievo-Emezae nọ E Gbẹ Maha A rẹ Sai Ru.”)
11 Ma ta ẹme kpahe eware nọ e lẹliẹ Jihova wọhọ utho no. Obọnana joma ta ẹme te epanọ ma sae rọ rehọ aro kele Jihova ru eware nana. Ma te bi ru eware yena, ẹsiẹe ma te sai ro gine fiobọhọ kẹ inievo na dikihẹ ga. Jesu ọ kẹ olele riẹ Saemọn odẹ ọfa, koyehọ Sifas, onọ a re je se Pita. Yọ otọ riẹ họ “Utho Osese.” (Jọn 1:42) Odẹ yena nọ Jesu ọ kẹ Pita na u dhesẹ nọ Pita ọ te sasa amọfa oma evaọ ukoko na je fiobọhọ kẹ ae dikihẹ ga. A jọ Ebaibol ta nọ ekpako ukoko a wọhọ “edhedhẹ ugbehru-utho ulogbo.” Oyena u dhesẹ nọ ekpako na a te thọ inievo na nọ ebẹbẹ jọ i te te ai. (Aiz. 32:2) Orọnikọ ekpako na ọvo a rẹ rọ aro kele Jihova jọ wọhọ utho kẹ inievo na ha, rekọ mai kpobi, te inievo-emezae, te inievo-emetẹ. Yọ u re fiobọhọ kẹ omai kpobi evaọ ukoko na.—Ẹf. 5:1.
12. Fodẹ eware jọ nọ ma re ru nọ ma sae rọ jọ oria adhẹzọ kẹ amọfa.
12 Jọ oria adhẹzọ kẹ inievo na. Ẹsejọ owhe ọ rẹ raha eware, otọ u re nuhu, yọ eware okpẹtu efa e rẹ via kẹ inievo mai. O sae jẹ jọ nọ a bi ru ozighi hayo a bi fi ẹmo evaọ oria rai. Inievo itieye na a sae dhẹ ze uwou mai. Eware okpẹtu e be via gaga nọ “edẹ urere na” i bi dhe eyeyoma na. Fikiere joma ruẹrẹ oma kpahe re ma hai fiobọhọ kẹ inievo mai. (2 Tim. 3:1) Ma sae jẹ tuduhọ inievo mai awọ jẹ sasa ae oma. Edhere jọ nọ ma sae rọ sasa ae oma họ, nọ ma te kpohọ ewuhrẹ, joma hai dede ae rehọ sasasa. Eva e vẹ te were ohwo kpobi evaọ ukoko na. Uye o be bẹ inievo mai, yọ ahwo buobu nọ a bi lele rria je ru eware kugbe a rrọ eva gaga, a rẹ daezọ ohwo ho. Fikiere nọ inievo mai a tẹ ziọ ewuhrẹ, joma daoma gaga re ma whẹtiẹ ae họ oma. Joma ru re a riẹ nọ ma you rai, re udu u te ae otọ.
13. Ẹvẹ ekpako ukoko a sae rọ jọ oria adhẹzọ kẹ amọfa? (Rri uwoho na re.)
13 Ekpako ukoko na a sae jọ oria adhẹzọ kẹ inievo nọ oware okpẹtu jọ o raha eware rai hayo nọ ebẹbẹ efa i te. Nọ ẹyao o te kie oniọvo jọ idudhe hayo nọ o te wo asidẹnte, hayo nọ oware okpẹtu jọ o tẹ raha eware riẹ, ekpako na a rẹ daoma ru oware jọ ro fiobọhọ kẹ oniọvo na. A rẹ jẹ rọ Ẹme Ọghẹnẹ tuduhọ iẹe awọ. Nọ ọkpako ọ tẹ rrọ wolẹ, yọ ọ rẹ re ohrọ ohwo jẹ gaviezọ kẹ ohwo ziezi, inievo na a te gwọlọ kake nyabru ei jẹ ta eva kẹe. Ọkpako o te wo uruemu yena, o rẹ lẹliẹ ahwo riẹ nọ o you rai. Yọ ọkpako ọ tẹ be rọ Ebaibol kẹ inievo na ohrẹ, a te gwọlọ kaki ru oware nọ ọ be ta na.—1 Tẹs. 2:7, 8, 11.
Nọ oware okpẹtu jọ o tẹ raha eware inievo na hayo nọ ebẹbẹ efa i te te ai, ekpako na a rẹ jọ oria adhẹzọ kẹ inievo na (Rri edhe-ẹme avọ 13) a
14. Ẹvẹ ma sae rọ jọ ahwo nọ a re fievahọ?
14 Jọ ohwo nọ a rẹ rẹroso. Ma gwọlọ nọ amọfa a rẹroso omai inọ ma ti dikihẹ kẹ ae maero nọ a te wo ẹbẹbẹ jọ. (Itẹ 17:17) Kọ eme ma re ru re ahwo a sae rẹroso omai? Ma re wo uruemu nọ o rẹ were Ọghẹnẹ ẹsikpobi, orọnọ ẹsejọ ọvo ho. Ọjọ họ, ma tẹ ta kẹ ohwo jọ nọ ma ti ru oware jọ kẹe, ma rẹ daoma ru ei. Yọ ma rẹ jọ ohwo nọ o re leti kpohọ oria ha. (Mat. 5:37) Ma tẹ ruẹ nọ ohwo jọ o wo ẹbẹbẹ jọ, ma rẹ daoma fiobọhọ kẹe. A tẹ kẹ omai ẹme jọ hayo oware jọ inọ ma ru, ma rẹ daoma ru ei, ma ve je ru ei oghẹrẹ nọ a ta nọ ma ru ei.
15. Ẹvẹ inievo ukoko na a rẹ jọ nọ ekpako a tẹ rrọ ahwo nọ a re fievahọ?
15 Nọ ekpako a tẹ rrọ ahwo nọ a rẹ rẹroso, u re fiobọhọ kẹ ukoko na. Evaọ oghẹrẹ vẹ? Nọ inievo na a tẹ riẹ nọ, a te se ọsẹro utu usi uwoma ota rai hayo ọkpako ọfa nọ a te wo ẹbẹbẹ jọ, ọ te kpunu je fiobọhọ kẹ ae, udu u re te inievo na otọ. Nọ ekpako na a tẹ be hae daoma fiobọhọ kẹ inievo na, o rẹ lẹliẹ inievo na riẹ nọ a you rai. Yọ ekpako ukoko na a tẹ gwọlọ kẹ oniọvo jọ ohrẹ, a rẹ rọ ẹme nọ Ebaibol ọ ta gbe onọ ọrigbo nọ a re fievahọ na ọ ta rọ kẹe ohrẹ, orọnọ onọ a roro ho. A te bi ru ere, inievo na a re fievahọ ae. Oware ofa nọ o rẹ lẹliẹ inievo na fievahọ ọkpako họ, nọ oniọvo ọ tẹ ta ẹme jọ nọ u fo nọ a rẹ vuẹ omọfa ha kẹ ọkpako, o re gogo iei kẹ ahwo ho. Yọ ọ rẹ daoma ru oware nọ ọ ta kẹ inievo na inọ o ti ru.
16. Nọ ma te bi dikihẹ ga ru oware nọ o rẹ were Jihova, erere vẹ o re te omai gbe amọfa?
16 Dikihẹ ga hai ru oware nọ Jihova ọ ta. Nọ ma tẹ be hae wharo ru oware nọ o rẹ were Jihova je bi rri ẹme nọ Ebaibol ọ ta rọ jiroro kpobi nọ ma be jẹ, amọfa a sae rọ aro kele omai. Nọ ẹrọwọ mai ọ be ga na yọ ma be riẹ Ẹme Ọghẹnẹ kodo viere na, ma ve ti dikihẹ ga kothi evaọ ukoko na. Ma te jọ wọhọ ahwo nọ a riẹ oware nọ a re ru hu hu. Ma te jọ deghe deghe evaọ ukoko na ha. Yọ a te rọ iwuhrẹ erue gbe eme nọ ahwo nọ a riẹ Ọghẹnẹ hẹ a be ta ro reghe omai no ho. (Ẹf. 4:14; Jem. 1:6-8) Ma tẹ maki yo ekpehre usi jọ, ma ti gbe kru udu ga fikinọ ma wo ẹrọwọ yọ ma fievahọ Jihova inọ o ti ru eyaa riẹ kpobi gba. (Ol. 112:7, 8) Ma te dikihẹ ga evaọ ukoko na, ẹsiẹe ma te sai ro fiobọhọ kẹ inievo nọ ebẹbẹ i te re a dikihẹ ga re.—1 Tẹs. 3:2, 3.
17. Eme ekpako a re ru nọ u re dhesẹ nọ a rrọ ahwo nọ a re fievahọ?
17 Ekpako ukoko a re ru eware vrẹ oma ha, a re wo iroro egbagba, a re ru eware kpatiẹ, yọ a re si eware kekeke he. Emamọ uruemu rai na o rẹ lẹliẹ ae fiobọhọ kẹ amọfa dikihẹ ga. Yọ u re ru nọ inievo ukoko na a rẹ rọ “nya lele ẹme uzẹme na.” (Tait. 1:9; 1 Tim. 3:1-3) Nọ ekpako a te wo emamọ uruemu jẹ be hae tuduhọ inievo na awọ, o rẹ lẹliẹ inievo na hai kpohọ ewuhrẹ ẹsikpobi, kpohọ usi uwoma ẹsikpobi jẹ hai ru ewuhrẹ omobọ rai. Nọ ẹbẹbẹ o te te inievo na, ekpako na a rẹ tuduhọ ae awọ re a hai roro kpahe Jihova gbe oware nọ Jihova ọ gwọlọ ru.
18. Fikieme ma rọ gwọlọ nọ ma re jiri Jihova jẹ gbẹ hai si kẹle iẹe? (Rri ẹkpẹti na re, “ Edhere jọ nọ Ma Sae Gbẹ rọ Kẹle Jihova.”)
18 Uruemu Jihova nọ ma ta ẹme te no na, o te lẹliẹ omai ta ẹme nọ Devidi ovie na ọ ta inọ: “Jọ ujiro u te Jihova, Utho mẹ.” (Ol. 144:1) Jihova yọ Ọghẹnẹ nọ ma rẹ rẹroso, yọ ere ọvo ọ te jọ bẹdẹ bẹdẹ. Nọ ma riẹ ere no na, joma rẹroso Jihova evaọ edẹ uzuazọ mai kpobi jẹ riẹ nọ o ti fiobọhọ kẹ omai jọ abotọ riẹ ẹsikpobi. Mai omomọvo o ve ti se Jihova “Utho mẹ.”—Ol. 92:14, 15.
OLE AVỌ 150 Gwọlọ Ọghẹnẹ re Whọ Sae Zọ
a Iwoho nọ e rrọ uke Uwou-Eroro na: Idibo Jihova a rri Jihova inọ ọye họ Utho rai nọ a rẹ sae rẹroso. Ẹwẹ-obe avọ 28: Oniọvo-ọmọtẹ nọ ọ be ta ẹme jọ kẹ ekpako ukoko na evaọ obọ Ọgwa Uvie keme ọ riẹ nọ a te gaviezọ kẹe.
