UZI Mosis na o kuvẹ kẹ iyei nọ a re duwu. Rekọ evaọ oke Jesu, ahwo a tẹ jẹ hai duwu iyei fihọ ẹmẹme kpobi nọ a ta. A jẹ hai ru onana odode re ahwo a sai fievahọ ẹme rai, ghele na Jesu ọ whọku ai isiava soso. O wuhrẹ i rai nọ: “Jọ ‘Ee’ rai o jọ Ee, ‘Ijo’ rai o jọ Ijo.”​—Mat. 5:33-37; 23:16-22.

Obe jọ nọ a re se Theological Dictionary of the New Testament o ta nọ, obe ahwo Ju nọ a re se Talmud u ru omai riẹ inọ “ahwo Ju a jẹ hai duwu iyei fihọ ẹme kpobi nọ a ta ro dhesẹ nọ ẹme na uzẹme.” A jọ eria sa-sa evaọ obe na fodẹ iyei nọ i muẹme nọ u fo nọ a re koko hrọ gbe enọ i muẹme he.

Orọnikọ Jesu ọvo o dhesẹvia nọ o mukpahe uruemu ahwo Ju nana ha. Wọhọ oriruo, ogbiku ahwo Ju nọ a re se Flavius Josephus ọ ta kpahe utu ahwo Ju jọ inọ: “A rẹ gwọlọ duwu iyei hi, keme a rri rie nọ u yoma vi ọrue oguo. A rẹ ta nọ, otẹrọnọ a rẹ sai fievahọ ẹme ohwo ho ajokpanọ o duwu iyei fihọ iẹe, kiyọ ohwo ọyena ọviẹwẹ.” Obe ahwo Ju ofa jọ o ta nọ: “Ohwo nọ o re duwu iyei ẹsikpobi yọ ọrahauzi ologbo.” Fikiere Jesu ọ ta nọ a du rọ iyei iduwo wọhọ oware arozaha gheghe. Ma tẹ be hae ta uzẹme ẹsikpobi, u ti du gwọlọ nọ ma re duwu iyei taure ahwo a te fievahọ omai hi.