Ebaibol na yọ obe ọrẹri, yọ oye họ ẹme Ọghẹnẹ nọ a kere fihotọ rọkẹ omai kpobi. Ma re wuhrẹ iẹe hrọ re ma sae riẹ Ọnọ o wo rie. (Jọn 17:3; 2 Timoti 3:16) Jihova Ọghẹnẹ ọ jọ eva riẹ dhesẹ ẹjiroro nọ o wo kpahe ahwo-akpọ gbe otọakpọ na, onọ ọ rrọ uwou rai.—Emuhọ 3:15; Eviavia 21:3, 4.

Obe ofa o riẹ hẹ nọ o rẹ sai duobọte uzuazọ ahwo tei. Ebaibol na o re fiobọhọ kẹ omai rọ aro kele Jihova dhesẹ uyoyou, ohrọ, gbe ọdawẹ. O rẹ kẹ ẹruore, u re fiobọhọ kẹ ahwo thihakọ makọ uye nọ o mae ga kpobi dede. Yọ o be fere eware iyoma nọ e rrọ akpọ nana via, nọ e wọso oreva Ọghẹnẹ nọ o rrọ gbagba na.—Olezi 119:105; Ahwo Hibru 4:12; 1 Jọn 2:15-17.

Ẹvẹrẹ Hibru, Aramaik, gbe Griki a kaki ro kere Ebaibol na, rekọ a fa omariẹ kpobi hayo abọjọ riẹ fihọ evẹrẹ nọ i bu vi idu esa (3,000) no. Oye họ obe nọ a mae fa fihọ evẹrẹ sa-sa no, o tẹ jẹ rrọ obe nọ ahwo a mai wo evaọ ikuigbe ohwo-akpọ. Onana u gbe omai unu hu. Eruẹaruẹ Ebaibol e ta nọ: “A te ta usi uwoma Uvie na [ugogo ovuẹ nọ o dhẹ Ebaibol na duwu na] evaọ akpọ na soso re o jọ isẹri kẹ erẹwho na kpobi, kẹsena urere na o vẹ te ze.”—Matiu 24:14.

Fikinọ ma vuhu epanọ ovuẹ Ebaibol na u wuzou te, oware nọ o jọ omai oja họ re ma fa eme na no evẹrẹ ọsosuọ na ze gbagba, re otofa rai o jọ vevẹ, e vẹ jẹ lọhọ ese. Izoẹme nana nọ e rrọ oria Ẹme-Ofiba na, “Eware nọ E rẹ Kpọ Efafa Ebaibol,” “Oghẹrẹ nọ A Fa Ebaibol Nana,” gbe “Oghẹrẹ nọ Ebaibol na O ro Te Omai Obọ” e ta kpahe eware nọ e kpọ efafa na, gbe eware sa-sa nọ a rẹ sae jọ Ebaibol nana ruẹ.

Ahwo nọ a you Jihova Ọghẹnẹ jẹ be gọe a gwọlọ Ẹme Ọghẹnẹ nọ a fa gbagba, nọ a re wo otoriẹ riẹ vevẹ. (1 Timoti 2:4) Fiki onana, ma fa Ebaibol na fihọ Isoko, yọ o rrọ omai oja inọ ma rẹ fa Ebaibol Efafa Akpọ Ọkpokpọ na fihọ evẹrẹ efa buobu te epanọ o rẹ sae lọhọ te kpobi. Ma bi rẹro jẹ be lẹ nọ, whẹ nọ o bi se Ikereakere Efuafo na, who ti wo erere no Ebaibol nana ze nọ whọ be daoma “gwọlọ Ọghẹnẹ” re whọ “ginẹ ruẹ e riẹ” na.—Iruẹru Ikọ 17:27.