Job 15:1-35
15 Ẹlifaz+ ohwo Timan na ọ tẹ kpahe ẹme nọ:
2 “Kọ ohwo nọ o wo areghẹ ọ rẹ kpahe eme nọ i fioka ha,*Hayo kọ ọ rẹ rọ ofou obọ ovatha-ọre vọ eva riẹ?
3 Eme gheghe nọ a rẹ rọ whọku ohwo u wo otọ họ,Yọ ẹmeọta gheghe ọ rẹ wha erere ọvuọvo ze he.
4 Keme who se ozodhẹ Ọghẹnẹ gboware ovo ho,Yọ whọ be daezọ Ọghẹnẹ hẹ.
5 Keme oruthọ ra o be lẹliẹ owhẹ ta eme nọ whọ be ta na,*Whọ salọ eme ẹghẹ.
6 Unu obọra ọvo u bi bruoziẹ kpe owhẹ na orọnikọ omẹ hẹ;Igbenu obọra ọvo i bi se isẹri kpe owhẹ na.+
7 Kọ whẹ họ ohwo ọsosuọ nọ a yẹ,Manikọ a yẹ owhẹ no taure ikpehru na e tẹ te ze?
8 Kọ whọ be hae gaviezọ kẹ eme idhere* Ọghẹnẹ,Hayo kọ who roro nọ whẹ ọvo o wo areghẹ?
9 Eme whọ riẹ nọ ma riẹ hẹ?+
Eme who wo otoriẹ riẹ nọ ma wo otoriẹ riẹ hẹ?
10 Te enọ i wo eza-uzou no gbe enọ e kpako no a rrọ udevie mai,+Ezae nọ i vi ọsẹ ra thethabọ.
11 Kọ omosasọ nọ Ọghẹnẹ ọ be kẹ owhẹ u gbe te kẹ owhẹ,Te eme nọ a be nabe rọ unu kpotọ ta kẹ owhẹ?
12 Fikieme udu ra u bi ro su owhẹ thọ,Ẹvẹ ibiaro ra i bi ro dhesẹ nọ ofu ọ rrọ owhẹ eva?
13 Keme who bi mu ofu kẹ* Ọghẹnẹ omariẹ,Yọ whọ be kuvẹ re eme itieye na i no unu ra ze.
14 Kọ ono họ ohwo-akpọ gheghe* nọ ọ rẹ rọ jọ fuafo,Hayo ohwo nọ aye o yẹ nọ o re ro kiẹrẹe?+
15 Rri! O fievahọ erẹri riẹ hẹ,Makọ odhiwu na dede ọ fo evaọ aro riẹ hẹ.+
16 Kabikọ ohwo nọ ọ rrọ tọtọtọ jẹ rrọ muomu,+Ohwo nọ ọ be da umuomu wọhọ ame!
17 Mẹ te vuẹ owhẹ; gaviezọ kẹ omẹ!
Me ti gbiku oware nọ mẹ ruẹ no,
18 Oware nọ ezae iwareghẹ a gbiku rai no nọ a yo mi esẹ rai,+Eware nọ a ko dhere he.
19 Ae ọvo a rehọ otọ na kẹ,Ọrara ọvuọvo ọ nya udevie rai vrẹ hẹ.
20 Ohwo omuomu ọ rẹ reoja evaọ edẹ uzuazọ riẹ kpobi,Evaọ ikpe kpobi nọ a fihọ kẹ osu ọgeva.
21 Ọ be rehọ ezọ riẹ yo edo ozọ;+Evaọ oke udhedhẹ itu igbulegbu a rẹ wọ ohọre bru ei ze.
22 U mu rie ẹro nọ ọ te dhẹ vabọ no ebi hi;+Ọgbọdọ ọ be hẹrẹ iẹe.
23 O bi ghoro kpenẹ avọ enẹ be gwọlọ emu,* kọ diẹse o rrọ?
Ọ riẹ vevẹ nọ ẹdẹ ebi ọ kẹle no.
24 Idhọvẹ gbe uye i bi ru ozọ mu ei;E ga vi ei wọhọ ovie nọ ọ ruẹrẹ oma kpahe no re ọ wọ ohọre ze.
25 Keme ọ kpare obọ riẹ wọso Ọghẹnẹ omariẹErumeru na ọ be gwọlọ rri vo* na;
26 Ọ be gbaudu họrọ bru ei,Avọ ojese ọgaga riẹ nọ u wo okpa.*
27 Iwhri e lẹliẹ ovao riẹ fu fihọ,Yọ igbeku riẹ e rro fihọ fiki iwhri;*
28 Ọ be rria ikpewho nọ a te raha no,Eva iwou nọ ohwo ọvo ọ te rria ha,Nọ i ti zihe ruọ ezuzu itho.
29 O ti fe he, yọ eware riẹ i ti bu hu,Ekwakwa riẹ e te vọ ẹkwotọ na gbe he.
30 Ọ te dhẹ vabọ no ebi hi;Ebruerae o ti ru omogha riẹ nọ o be ta ze* yamu,Yọ erri ofu nọ o no unu Ọghẹnẹ* ze o ti kpei no.+
31 Jọ ọ nyathọ họ re o fievahọ oware nọ u fioka ha,Keme oware nọ u ti noi ze tei u ti fioka gbe he;
32 O te via taure ẹdẹ riẹ o te ti te,Yọ egha riẹ e te rro vievie he.+
33 Ọ te wọhọ ure evaene nọ ibi riẹ nọ e re ware he i bi kie kufiẹ,Jẹ wọhọ ure olivi nọ idodo riẹ i bi kie kufiẹ.
34 Keme ogbotu ahwo nọ a be gọ Ọghẹnẹ hẹ* a re wo oware ovo ho,+Yọ erae e te mahe iwou-udhu udi-oriọ.
35 A re di eva uye họ a ve yẹ oware umuomu,Yọ edhede rai ọ vọ avọ eviẹhọ.”
Eme-Obotọ
^ Hayo “rọ eriariẹ ifofe kpahe ẹme.”
^ Hayo “iruthọ ra i bi wuhrẹ unu ra.”
^ Hayo “eme ididi.”
^ Evaọ Hibru, “whọ be kpare ẹzi ra suọ.”
^ Hayo “nọ o re whu.”
^ Evaọ Hibru, “ebrẹdi.”
^ Hayo “ọ be gwọlọ kparobọ vi.”
^ Evaọ Hibru, “etu ojese riẹ nọ o wo okpa.”
^ Iwhri nọ a jọ etenẹ fodẹ na u dhesẹ ọruẹriọ, akpọriọ nọ ọ vrẹta hayo omorro.
^ Koyehọ, ẹruore inọ eware e te wariẹ woma.
^ Evaọ Hibru, “riẹ.”
^ Hayo “enọ e siọ orọwọ na no.”
