Job 1:1-22
1 Ọzae jọ ọ jọ ẹkwotọ Ọz, odẹ riẹ Job.*+ Ọ jọ ohwo okiẹrẹe nọ ọ gbakiete;*+ ọ jẹ dhozọ Ọghẹnẹ jẹ kẹnoma kẹ oware uyoma.+
2 O yẹ emezae ihrẹ gbe emetẹ esa.
3 Erao riẹ i bu te igodẹ idu ihrẹ (7,000), ekamẹle idu esa (3,000), iruẹ odu ọvo (1,000),* gbe eketekete* egba isoi (500), yọ o wo idibo buobu gaga, onana o tẹ whae ze nọ ọ rọ jọ ohwo nọ ọ mae rro evaọ usu ahwo obọ Ovatha-Ọre na kpobi.
4 Emezae riẹ na ọvuọvo ọ jẹ hae jọ uwou riẹ ru ehaa emuọriọ evaọ ẹdẹ nọ o fihọ.* A jẹ hai zizie inievo-emetẹ esa rai re a lele ai re jẹ da.
5 Nọ edẹ ehaa emuọriọ jọ i te kuhọ no, Job o ve se ai re o ru ai fo. Ọ vẹ kpama evaọ irioke frifri o ve dhe idhe emahọ+ kẹ omomọvo rai. Keme Job ọ rẹ ta nọ: “Ẹsejọhọ emezae mẹ a raha uzi no, a jọ udu rai la Ọghẹnẹ eka no.” Ere Job ọ jẹ hai ru ẹsikpobi.+
6 Whaọ u te ti te ẹdẹ nọ emọ* Ọghẹnẹ uzẹme na*+ a rọ nyaziọ aro Jihova,+ yọ Setan+ ọ ruọ udevie rai re.+
7 Jihova ọ tẹ nọ Setan nọ: “Bovẹ who no ze?” Setan o te yo kẹ Jihova nọ: “Obọ otọakpọ na me bi jo ghoro kpenẹ avọ enẹ jẹ be nya kpenẹ avọ enẹ evaọ eva riẹ.”+
8 Jihova ọ tẹ ta kẹ Setan nọ: “Kọ who muẹrohọ* Job odibo mẹ no? Ohwo ọvo nọ ọ wọhọ e riẹ ọ rrọ otọakpọ na ha. Ohwo okiẹrẹe nọ ọ gbakiete,*+ nọ ọ be dhozọ Ọghẹnẹ jẹ be kẹnoma kẹ oware uyoma.”
9 Setan o te yo kẹ Jihova nọ: “Kọ gheghe Job ọ be rọ dhozọ Ọghẹnẹ?+
10 Kọ who di ogba wariẹe họ+ avọ uwou riẹ gbe oware kpobi nọ o wo? Whọ ghale iruo abọ riẹ,+ yọ erao riẹ i bu gaga no evaọ ẹkwotọ na.
11 Rekọ, re onana u nwene, rriẹ obọ ra re whọ raha oware kpobi nọ o wo, ọ te la owhẹ eka evaọ iraro ra.”
12 Jihova ọ tẹ ta kẹ Setan nọ: “Rri! Eware kpobi nọ o wo e rrọ obọ ra. Thakpinọ whọ rọ obọ ra te ọzae na omariẹ hẹ!” Fikiere Setan ọ tẹ nya no aro* Jihova.+
13 Whaọ evaọ ẹdẹ nọ emezae gbe emetẹ riẹ a jẹ re emu jẹ da enwaene evaọ uwou oniọvo-ọmọzae ọkpako rai kpobi,+
14 ohwo* jọ ọ tẹ nyaze te vuẹ Job nọ: “Iruẹ na i je kporo udhu yọ eketekete na e jẹ re ẹbe evaọ akotọ rai,
15 ahwo Sebia a tẹ wọ ohọre ze a te mu ai rehọ, a tẹ rọ ọgbọdọ kpe idibo na. Mẹ ọvo ọ dhẹ vabọ te vuẹ owhẹ.”
16 Nọ ọ gbẹ be ta ẹme na, ọfa ọ tẹ nyaze ọ tẹ ta nọ: “Erae nọ i no obọ Ọghẹnẹ ze* i kie no obọ odhiwu ze e tẹ mahe igodẹ na avọ idibo na kpe! Mẹ ọvo ọ dhẹ vabọ te vuẹ owhẹ.”
17 Nọ ọ gbẹ be ta ẹme na, ọfa ọ tẹ nyaze ọ tẹ ta nọ: “Ahwo Kaldia+ a ghale oma fihọ itu esa a tẹ vẹruọ ekamẹle na, a te mu ai rehọ, a tẹ rọ ọgbọdọ kpe idibo na. Mẹ ọvo ọ dhẹ vabọ te vuẹ owhẹ.”
18 Nọ ọ gbẹ be ta ẹme na, ọfa ọ tẹ jẹ nyaze ọ tẹ ta nọ: “Emezae ra gbe emetẹ ra a jẹ re emu jẹ da enwaene evaọ uwou oniọvo-ọmọzae ọkpako rai kpobi.
19 Idudhe na ofou ọgaga o te fou no obọ udhude na ze, ọ tẹ tehe ibienẹ ene uwou na, uwou na u te kie ruru emoha na a te whu. Mẹ ọvo ọ dhẹ vabọ te vuẹ owhẹ.”
20 Job ọ tẹ kpama ọ tẹ bẹre ewu riẹ je bru eto uzou riẹ; o te kie fihọ otọ, o te guzou kpotọ
21 ọ tẹ ta nọ:
“Ẹbẹba me ro no edhede oni mẹ ze,Yọ ẹbẹba me ti ro zihe.+
Jihova họ ọnọ ọ kẹ,+ yọ Jihova họ ọnọ ọ rehọ vrẹ.
Jọ a gbe jiri odẹ Jihova.”
22 Evaọ eware nana kpobi, Job ọ raha uzi hi, yọ ọ fuọ Ọghẹnẹ nọ o ru oware jọ thọ họ.*
Eme-Obotọ
^ O sae jọ nọ otofa riẹ họ “Ọnọ A Mukpahe.”
^ Hayo “ohwo nọ ọ kare afuẹwẹ je kiete.”
^ Evaọ Hibru, “iruẹ ivivẹ egba isoi (500).”
^ Evaọ Hibru, “eketekete eyae.”
^ Hayo “a jẹ hae jọ uwou omomọvo ru ehaa unọjọ utọjọ.”
^ Oghẹrẹ ofa nọ a rẹ jọ ẹvẹrẹ Hibru se ikọ-odhiwu.
^ Evaọ Hibru, “emezae.”
^ Evaọ Hibru, “whọ gale udu ra vi.”
^ Hayo “Ohwo nọ ọ kare afuẹwẹ je kiete.”
^ Evaọ Hibru, “ovao.”
^ Hayo “ọnyukọ.”
^ Hayo o sae jọ nọ, “Elo egbrara.”
^ Hayo “ọ ta nọ Ọghẹnẹ o ru oware uyoma jọ họ.”
