Jerimaya 36:1-32
36 Whaọ evaọ ukpe avọ ene Jehoyakim+ ọmọzae Josaya, ovie Juda, ẹme nana o te no obọ Jihova bru Jerimaya ze, inọ:
2 “Rehọ uko-obe* re who kere eware kpobi nọ mẹ ta kẹ owhẹ inọ e te via kẹ Izrẹl avọ Juda+ gbe erẹwho na kpobi fihọ iẹe,+ no ẹdẹ ọsosuọ nọ mẹ rọ ta ẹme kẹ owhẹ evaọ edẹ Josaya ze rite ẹdẹ inẹnẹ na.+
3 Ẹsejọhọ nọ ahwo uwou Juda a te yo kpahe okpẹtu kpobi nọ mẹ gwọlọ ro te ai na, a ti kurẹriẹ no idhere imuomu rai, re mẹ ruẹse rehọ oruthọ rai gbe uzioraha rai rọvrẹ rai.”+
4 Kẹsena Jerimaya o te se Barọk+ ọmọzae Neraya, Jerimaya ọ tẹ ta eme kpobi nọ Jihova ọ ta kẹe no rọ kẹe, Barọk o te kere ai fihọ uko-obe na.*+
5 Kẹsena Jerimaya ọ tẹ ta kẹ Barọk nọ: “A kẹ omẹ uvẹ nọ mẹ rẹ rọ ruọ eva uwou Jihova ha.
6 Fikiere whẹ o gbahọ nọ whọ rẹ nya, who ve se eme Jihova nọ e rrọ uko-obe na do via, enọ mẹ jẹ ta kẹ owhẹ yọ who bi kere na. Se eme na re ahwo nọ a te jọ uwou Jihova evaọ ẹdẹ emuọriọ-ọseba a yo ai; ere who ti ro se ai kẹ ahwo Juda kpobi nọ a no ikpewho rai ze.
7 Ẹsejọhọ ayare rai kẹ aruoriwo o ti te Jihova oma, yọ omomọvo o ti kurẹriẹ no idhere imuomu riẹ, keme evedha gbe ofu nọ Jihova o wo kpahe ahwo nana ọ rrọ gaga.”
8 Fikiere Barọk ọmọzae Neraya o te ru oware kpobi nọ Jerimaya ọruẹaro na ọ ta kẹe; o se eme Jihova nọ e rrọ uko-obe* na do via evaọ uwou Jihova.+
9 Whaọ evaọ ukpe avọ isoi Jehoyakim+ ọmọzae Josaya, ovie Juda, evaọ amara avọ izii, a te woro nọ ahwo kpobi nọ a rrọ Jerusalẹm gbe ahwo kpobi nọ a no ikpewho Juda ziọ Jerusalẹm a siọ emuọriọ ba evaọ aro Jihova.+
10 Barọk o te se eme Jerimaya nọ e rrọ uko-obe* na do via evaọ uwou Jihova, evaọ ubruwou* Gemaraya+ ọmọzae Shefan,+ okere-obe na, evaọ ighẹ obehru na, onọ o rrọ aro unuẹthẹ okpokpọ uwou Jihova na,+ yọ ahwo na kpobi a yo rie.
11 Nọ Maekaya ọmọzae Gemaraya ọmọzae Shefan o yo eme Jihova kpobi nọ a se no uko-obe* na ze,
12 ọ tẹ nya kpobọ uwou* ovie na, kpobọ ubruwou okere-obe na. Ikpahwo-esuo* na kpobi e keria etẹe: Ẹlishama+ okere-obe na, Delaya ọmọzae Shimaya, Ẹlnetan+ ọmọzae Akbọ,+ Gemaraya ọmọzae Shefan, Zẹdikaya ọmọzae Hananaya, gbe ikpahwo-esuo edekọ na kpobi.
13 Maekaya ọ tẹ vuẹ ae eme kpobi nọ o yo evaọ okenọ Barọk o je se eme nọ e rrọ uko-obe* na kẹ ahwo na.
14 Kẹsena ikpahwo-esuo na kpobi a te vi Jehudae ọmọzae Nẹtanaya ọmọzae Shẹlẹmaya ọmọzae Kushae bru Barọk, inọ: “Tọlọ uko-obe nọ who se kẹ ahwo na re whọ nyaze.” Barọk ọmọzae Neraya ọ tẹ tọlọ uko-obe na fihọ obọ, ọ tẹ nyabru ai.
15 A tẹ ta kẹe nọ: “Ivie, keria re who sei do via kẹ omai.” Fikiere Barọk o te sei kẹ ae.
16 Whaọ nọ a nwani yo eme na kpobi, a te rri ohwohwo avọ ozọ, a tẹ ta kẹ Barọk nọ: “Ma rẹ siọ ovie na eme nana kpobi ba ẹvuẹ hẹ.”
17 A tẹ nọ Barọk nọ: “Ivie, vuẹ omai oghẹrẹ nọ who ro kere eme nana kpobi. Kọ ọye ọ ta rai kẹ owhẹ?”
18 Barọk ọ tẹ kẹ ai uyo nọ: “Ọye ọ ta eme nana kpobi kẹ omẹ, mẹ tẹ rehọ ame-ugbẹ kere ai fihọ uko-obe* nana.”
19 Ikpahwo-esuo na a tẹ ta kẹ Barọk nọ: “Wha nyai dhere, te owhẹ te Jerimaya, yọ wha ru re ohwo ọvo ọ riẹ oria nọ wha rrọ họ.”+
20 Kẹsena a tẹ nyabru ovie na kpobọ eva ighẹ na, yọ a fi uko-obe na họ ubruwou Ẹlishama okere-obe na, a tẹ vuẹ ovie na oware kpobi nọ a yo.
21 Fikiere ovie na o te vi Jehudae+ nyae rehọ uko-obe na ze, ọ tẹ rehọ iẹe no ubruwou Ẹlishama okere-obe na ze. Jehudae o te mu ei họ ese kẹ ovie na avọ ikpahwo-esuo na kpobi nọ i dikihẹ kẹle ovie na.
22 Ovie na ọ keria uwou nọ a rẹ jọ evaọ ezi ekpahe, evaọ amara avọ izii,* yọ erae e be ware evaọ odhe erae nọ o jọ aro riẹ.
23 Nọ Jehudae o te se te abọ esa hayo abọ ene no, ovie na ọ vẹ rehọ amagha okere-obe bru abọ yena no, o ve gbolo iei fihọ erae nọ e rrọ odhe erae na, ere ọ rọ mahe uko-obe na soso no evaọ erae nọ e jọ odhe erae na.
24 Ozọ u mu rai hi; yọ ovie na hayo idibo riẹ kpobi nọ i yo eme nana kpobi na a tubẹ bẹre iwu rai hi.
25 Dede nọ Ẹlnetan,+ Delaya,+ gbe Gemaraya+ a lẹ ovie na nọ ọ mahe uko-obe na ha, ọ gaviezọ kẹ ae he.
26 U no ere no, ovie na ọ ta kẹ Jeramiẹl ọmọzae ovie na, Seraya ọmọzae Azriẹl, gbe Shẹlẹmaya ọmọzae Abdiẹl re a mu Barọk okere-obe na avọ Jerimaya ọruẹaro na, rekọ Jihova ọ ko rai dhere.+
27 Ẹme Jihova ọ tẹ wariẹ bru Jerimaya ze evaọ okenọ ovie na ọ mahe uko-obe na no, onọ Barọk o kere eme nọ Jerimaya ọ jẹ ta kẹe fihọ na,+ inọ:
28 “Rehọ uko-obe ofa re who kere eme evona nọ e jọ uko-obe ọsosuọ na fihọ iẹe, onọ Jehoyakim ovie Juda ọ mahe no na.+
29 Yọ whọ rẹ ta kpahe Jehoyakim ovie Juda nọ, ‘Enẹ Jihova ọ ta: “Whọ mahe uko-obe nana, whọ tẹ ta nọ, ‘Fikieme who ro kere eme fihọ iẹe nọ: “Ovie Babilọn ọ te nyaze ọ vẹ raha ẹkwotọ nana no je si ohwo gbe arao kpobi noi no”?’+
30 Fikiere enẹ Jihova ọ ta nọ o te via kẹ Jehoyakim ovie Juda, ‘O ti wo ohwo ọvo nọ ọ te keria agbara-uvie Devidi hi,+ yọ a te nyase ori riẹ ba etegu kẹ ẹrrorro uvo gbe edhedhẹ aso.+
31 Mẹ te rehọ ọyomariẹ avọ uyẹ* riẹ gbe idibo riẹ guẹdhọ fiki oruthọ rai, yọ mẹ te rehọ okpẹtu kpobi nọ mẹ ta kpahe nọ i ti te ae rekiyọ a gaviezọ họ+ na ro te ai+ avọ ahwo nọ a be rria Jerusalẹm gbe ezae Juda.’”’”
32 Kẹsena Jerimaya ọ tẹ tọlọ uko-obe ofa, ọ tẹ rehọ iẹe kẹ Barọk ọmọzae Neraya, okere-obe na,+ o te kere eme kpobi nọ e jọ uko-obe* nọ Jehoyakim ovie Juda ọ mahe evaọ erae na+ fihọ iẹe wọhọ epanọ Jerimaya ọ jẹ rọ ta ae kẹe. Yọ a kere eme efa buobu nọ e wọhọ eyena kugbe ae.
Eme-Obotọ
^ Evaọ Hibru, “uko-obe obe.”
^ Evaọ Hibru, “uko-obe obe na.”
^ Hayo “obe.”
^ Hayo “obe.”
^ Hayo “ubruwou emuọriọ.”
^ Hayo “obe.”
^ Hayo “iruiruo ighẹ ovie.”
^ Hayo “ighẹ.”
^ Hayo “obe.”
^ Hayo “obe.”
^ Abọ urere amara Akpegbọvo gbe abọ ọsosuọ amara Akpegbivẹ. Rri Ẹme-Ofiba B15.
^ Evaọ Hibru, “ubi.”
^ Hayo “obe.”
