Ilezi 78:1-72
Maskil.* Orọ Esaf.+
78 Ahwo mẹ, wha gaviezọ kẹ uzi* mẹ;Wha fi ezọ rai hotọ kẹ eme nọ i bi no unu mẹ ze.
2 Me ti rovie unu mẹ re me bru ehare.
Mẹ te ta oze orọ oke krẹkri nọ o vrẹ.+
3 Eware nọ ma yo jẹ riẹ,Enọ esẹ mai a gbiku rai kẹ omai,+
4 Ma te ko ae dhere emọ rai hi;Ma ti gbiku rai kẹ oge nọ ọ be tha+Eware nọ i fo ejiro nọ Jihova o ru gbe ẹgba riẹ,+Eware igbunu nọ o ru no.+
5 Ọ kẹ Jekọp ujaje*O jie uzi evaọ Izrẹl;O jie uzi kẹ esẹ-esẹ maiInọ a gbiku eware nana kẹ emọ rai,+
6 Re oge nọ ọ be tha,Emọ nọ a ti yẹ ẹdẹfa a sae riẹ ae.+
Ae omarai a vẹ jẹ rehọ ae gbiku kẹ emọ rai.+
7 Onana o vẹ te lẹliẹ ae fievahọ Ọghẹnẹ.
Iruo Ọghẹnẹ e rẹ gbẹ thọrọ ae ẹro ho+A ve koko ijaje riẹ.+
8 A gbẹ jọ wọhọ esẹ-esẹ rai hi,Oge udu ogaga avọ ọwọsuọ,+Oge nọ udu rai u re kri enwene he*+Nọ a yoẹme* kẹ Ọghẹnẹ hẹ.
9 Ahwo orua Ifremu a kru uze,Rekọ a kuomarẹriẹ dhẹ evaọ ẹdẹ ohọre.
10 A koko ọvọ Ọghẹnẹ hẹ+Yọ a rọwo ru lele uzi riẹ hẹ.+
11 Eware nọ o ru e tẹ jẹ thọrọ ae ẹro,+Eware igbunu nọ o ru evaọ iraro rai.+
12 O ru eware urirẹ evaọ iraro esẹ-esẹ mai,+Evaọ ẹkwotọ Ijipti, ubrotọ Zoan.+
13 Ọ hẹriẹ abade na re a ruẹse nyae vrẹ,O te je ru ame na dikihẹ gegerege wọhọ ugbẹhẹ.*+
14 Ọ jẹ rọ ẹgho su ai evaọ uvoJẹ rọ elo erae su ai evaọ aso na kpobi.+
15 Ọ bẹre itho evaọ udhude na,Ọ kẹ rai ame da bẹ wọhọ ẹsenọ a jẹ jọ ethẹ da ame.+
16 O ru iko-ame kporo no ugbehru-utho zeJe ru ame kporo ze wọhọ ethẹ.+
17 Rekọ a ruabọhọ jẹ raha izi riẹA jẹ wọso Ọnọ Ọ Mai Kpehru na evaọ udhude na;+
18 A se Ọghẹnẹ abọ* evaọ udu rai+Nọ a ta nọ a gwọlọ emu nọ o je si ai urru.*
19 Fikiere a tẹ ta ẹme wọso Ọghẹnẹ,Inọ: “Kọ Ọghẹnẹ ọ sae kẹ omai emu* evaọ udhude na?”+
20 Rri! Ọ fa uthoKẹsena ame o te hwẹ ze, iko-ame i te kporo lahwe.+
“Kọ ọ sae jẹ kẹ omai ebrẹdi,Hayo kọ ọ sae kẹ ahwo riẹ arao?”+
21 Nọ Jihova o yo eme rai, ofu o te mu ei;+Erae+ i te vo mu Jekọp,Eva e tẹ dhae gaga kẹ Izrẹl+
22 Keme a fi ẹrọwọ họ Ọghẹnẹ hẹ;+A fievahọ iẹe he inọ ọ sai siwi ai.
23 Fikiere o te jie uzi kẹ ehru nọ ẹgho ọ rrọ na,O te rovie ẹthẹ* obọ odhiwu.
24 Ọ ruabọhọ je ku emana fihọ otọ kẹ ae re a re;Ọ kẹ rai ibi ekakọ obọ odhiwu.+
25 Ahwo a re ebrẹdi ahwo ologbo;*+Ọ kẹ rai enọ i te rai re.+
26 Ọ jọ obọ odhiwu ru ofou ovatha-ọre fou zeJẹ rọ ogaga riẹ ru nọ ofou obọze ovatha-ọre o ro fou.+
27 O ru nọ erao i ro kie fihọ otọ kẹ ae buobu wọhọ ovu,Evra ibuobu wọhọ ẹkpẹ nọ ọ rrọ akotọ abade.
28 O ru rai kie fihọ udevie evuẹ riẹ,Wariẹ iwou-udhu riẹ kpobi họ.
29 A tẹ re oma gbọkọ;Ọ kẹ rai oware nọ a gwọlọ na.+
30 Rekọ taure a tẹ te re te ẹgwọlọ rai,Nọ emu rai ọ gbẹ jọ unu rai,
31 Ọghẹnẹ o te mu ofu kẹ ae gaga.+
O kpe ezae nọ e mae goma evaọ usu rai;+O kpe izoge Izrẹl.
32 Ghele onana a ruabọhọ uzioraha vi epaọ anwẹdẹ+Yọ a fi ẹrọwọ họ iruo igbunu riẹ hẹ.+
33 Fikiere o te ru nọ edẹ uzuazọ rai i ro kuhọ wọhọ ẹwẹ-okuo gheghe,+Je ru nọ ikpe rai i ro kuhọ avọ eware imuozọ idudhe.
34 Rekọ ẹsikpobi nọ o kpe rai, a vẹ lẹe;+A ve zihe ze te gwọlọ Ọghẹnẹ,
35 A vẹ kareghẹhọ nọ Ọghẹnẹ họ Utho rai+Gbe nọ Ọghẹnẹ nọ Ọ Mai Kpehru na họ Osiwi rai.*+
36 Rekọ a jẹ gwọlọ rọ unu rai viẹe họJẹ rọ ẹrọo rai ta ọrue kẹe.
37 A fi udu rai họ iẹe kothi hi;+Yọ a koko ọvọ riẹ hẹ.+
38 Rekọ ọ jẹ re ohrọ rai;+Ọ jẹ rọ iruthọ rai vrẹ rai,* o gbe kpe ai no ho.+
Ẹsibuobu ọ gba ofu riẹ+O je mu ofu kpobi nọ o rrọ eva riẹ kẹ ae he.
39 Keme ọ kareghẹhọ nọ uwo a rrọ,+Ofou nọ o re fou vrẹ nọ o re zihe ze he.*
40 Ẹsibuobu a wọso ẹe evaọ udhude na+A ru eva dhae evaọ udhude na.+
41 Kẹse kẹse a jẹ dawo Ọghẹnẹ,+Yọ a ru Ọrẹri Izrẹl na oware nọ o wha uweri sei.*
42 A kareghẹhọ ogaga* riẹ hẹ,Ẹdẹ nọ o ro siwi* ai no obọ ọwegrẹ na,+
43 Eware eka riẹ nọ o ru evaọ Ijipti+Gbe iruo igbunu riẹ evaọ ubrotọ Zoan.
44 Gbe ekame Naele nọ o zihe ruọ azẹ+Nọ o wha riẹ ze nọ a gbẹ sae da ame iko-ame riẹ hẹ.
45 O vi ere-eni nyae re ae+Je vi ikere nyae raha ae.+
46 Ọ rehọ ekakọ rai kẹ ebaka-ẹkpẹ nọ e rẹ re oware muotọ,Jẹ rọ eware nọ a ruẹ uye fihọ kẹ ebaka-ẹkpẹ nọ e rẹ jọ usu ovo buobu.+
47 Ọ rehọ oso-itho+ raha ire evaene raiJẹ rehọ oso-itho raha ire sikamọ rai.
48 O siobọno erao rai nọ e rẹ wọ ewha kẹ oso-itho+Jẹ rọ uthuru erao rai kẹ elo egbrara.*
49 O mu ofu ọgaga riẹ kẹ ae,Ofu avọ evedha gbe idhọvẹ,Ogbotu* ikọ-odhiwu e wha uye se ai.
50 Ọ gbẹ edhere fihọ kẹ ofu riẹ.
Ọ thọ rai* no uwhu hu;O siobọno ai* kẹ okpẹyao nọ o re vo.
51 Ukuhọ riẹ o te kpe ọmọ ọsosuọ ahwo Ijipti kpobi,+Ọmọ nọ a ro mu eyẹ họ* evaọ iwou-udhu Ham.
52 Ọ tẹ rehọ ahwo riẹ lahwe wọhọ uthuru erao+Je su ai wọhọ owa erao evaọ udhude na.
53 O su rai vrẹ avọ omofọwẹ,+Ozọ ovuovo u mu rai hi;Abade na o ruru ewegrẹ rai.+
54 Ọ tẹ rehọ ae ziọ ẹkwotọ ọrẹri riẹ,+Ubrotọ igbehru nana nọ ọ rọ obọze riẹ wo na.+
55 O le erẹwho na no kẹ ae;+Ọ rehọ ufi nọ a rẹ rọ ma oware ghale ukuoriọ kẹ ae;+O fi erua Izrẹl họ iwou rai.+
56 Rekọ a je se Ọghẹnẹ nọ Ọ Mai Kpehru na abọ* jẹ kpareso ẹe;+A gaviezọ kẹ ijaje* riẹ hẹ.+
57 A tẹ jẹ nyase iẹe ba, je wo eviẹhọ wọhọ esẹ-esẹ rai.+
A jọ ahwo nọ a re fievahọ họ wọhọ uze nọ ufi riẹ o rrọ whrehe whrehe.+
58 A ruabọhọ jẹ rọ eria ikpehru rai ru ei eva dha,+Yọ a rehọ emema rai nọ a kare ru ofu mu ei.*+
59 Nọ Ọghẹnẹ o yo eva e tẹ dhae gaga,+Fikiere ọ tẹ se Izrẹl riẹriẹriẹ.
60 Ukuhọ riẹ ọ tẹ siọ uwou-udhu obọ Shailo+ na,Uwou-udhu nọ ọ jẹ rria evaọ udevie ahwo-akpọ.+
61 Ọ kuvẹ re a wọ oka ẹgba riẹ kpohọ igbo;O siobọno orro riẹ kẹ ọwegrẹ na.+
62 O siobọno ahwo riẹ kẹ ọgbọdọ+Je mu ofu kẹ ukuoriọ riẹ.
63 Erae e mahe izoge emezae riẹ,Yọ a so ile ehaa orọo evuevo kẹ emetẹ-kọkọ riẹ hẹ.*
64 A rọ ọgbọdọ kpe izerẹ riẹ,+Yọ eyae rai nọ a whu seba a viẹ hẹ.+
65 Kẹsena Jihova ọ tẹ kpama wọhọ ẹsenọ ọ rọwo no owezẹ ze,+Wọhọ ọgba+ nọ udi* o yẹ no aro no.
66 O te le ewegrẹ riẹ zihe;+O kpomovuọ họ ae oma bẹdẹ bẹdẹ.
67 Ọ siọ uwou-udhu Josẹf;Ọ salọ orua Ifremu hu.
68 Rekọ ọ salọ orua Juda,+Ugbehru Zayọn nọ o were riẹ gaga na.+
69 O ru oria aruẹri riẹ re o jọ ribri wọhọ idhiwu na,*+Wọhọ otọakpọ na nọ o ru re o jọ bẹdẹ bẹdẹ na.+
70 Ọ salọ Devidi+ odibo riẹỌ tẹ rehọ iẹe no obọ igodẹ nọ ọ jẹ rẹrote ze,+
71 Ọ rehọ e riẹ no ẹruorote igodẹ nọ e be kẹ emọ evie ze;Ọ rehọ e riẹ mu othuru-igodẹ kẹ* ahwo riẹ, emọ Jekọp,+Rọkẹ Izrẹl, ukuoriọ riẹ.+
72 Ọ rehọ udu riẹ kpobi* rẹrote ai,+Jẹ rehọ onaa su ai.+
Eme-Obotọ
^ Hayo “uthubro.”
^ Hayo “ekareghẹhọ.”
^ Evaọ Hibru, “o ruẹrẹ udu rai kpahe he.”
^ Hayo “a wo udu ẹmeoyo.”
^ Hayo “unueri ukpekpehru.”
^ Evaọ Hibru, “A dawo Ọghẹnẹ.”
^ Evaọ Hibru, “ruẹrẹ emu họ emẹjẹ kẹ omai.”
^ Hayo “ethẹ.”
^ Hayo “egba; ikọ-odhiwu.”
^ Hayo “Ọnọ ọ rẹ kioja kẹ ae.”
^ Evaọ Hibru, “O je ruru iruthọ rai.”
^ Hayo o sae jọ nọ, “Inọ ẹzi na ọ rẹ nyavrẹ ọvo, o re zihe ze he.”
^ Hayo “nọ o da riẹ.”
^ Evaọ Hibru, “obọ.”
^ Evaọ Hibru, “ọ rọ ta.”
^ Hayo o sae jọ nọ, “ifiva egaga.”
^ Hayo “Itu.”
^ Evaọ Hibru, “uzuazọ rai.”
^ Hayo “Emuhọ ogaga eyẹ rai.”
^ Evaọ Hibru, “a jẹ dawo Ọghẹnẹ nọ Ọ Mai Kpehru na.”
^ Hayo “ekareghẹhọ.”
^ Hayo “ru ei re ihri.”
^ Evaọ Hibru, “a jiri emetẹ-kọkọ riẹ hẹ.”
^ Hayo “enwaene.”
^ Evaọ Hibru, “Ọ bọ oria aruẹri riẹ wọhọ eria ikpekpehru na.”
^ Hayo “ọnọ ọ rẹ rẹrote.”
^ Hayo “udu nọ u kiete.”
