Ilezi 21:1-13
Ro se ọnọ o wuzou ile na. Ole Devidi.
21 O Jihova, ovie na ọ be ghọghọ fiki ẹgba ra;+Ọ be ghọghọ gaga fiki iruẹru esiwo ra.+
2 Who ru ẹgwọlọ udu riẹ kẹe no,+Yọ whọ siọ ayare nọ o no rie unu ze ba eru kẹe he. (Silah)
3 Keme whọ rehọ eghale buobu sei;Who ku etu-uvie emamọ igoru* họ iẹe uzou.+
4 Ọ yare owhẹ uzuazọ, whọ tẹ rehọ iẹe kẹe,+Uzuazọ uthethei,* no ebẹdẹ rite ebẹdẹ.
5 Iruẹru esiwo ra e wha orro ulogbo sei.+
Whọ kẹ riẹ ọghọ gbe oruaro.
6 Whọ ghale riẹ no bẹdẹ bẹdẹ;+Who bi ru ei ghọghọ keme whọ rrọ kugbei.*+
7 Keme ovie na o fievahọ Jihova;+Fikinọ Ọnọ Ọ Mai Kpehru na o wo uyoyou nọ o rẹ hiẹ hẹ, oware ovo u ti nuhu iei* vievie he.+
8 Obọ ra u ti mu ewegrẹ ra kpobi;Obọze ra u ti te enọ i mukpahe owhẹ.
9 Who ti ru ai wọhọ umuwou-erae nọ erae e be jọ to evaọ oke nọ who fihọ nọ whọ te rọ rẹriẹ ovao ku ai.
Jihova ọ te rọ ofu riẹ lọ ae no, yọ erae e te mahe ae no.+
10 Whọ te raha emọ* rai no otọakpọ na no,Jẹ raha uyẹ rai no udevie emọ ahwo.
11 Keme a gwọlọ ru owhẹ oware uyoma;+A gba egwae imuomu nọ i ti woma kẹ ae he.+
12 Keme who ti ru ai kuomarẹriẹ dhẹ zihe+Nọ whọ tẹ rriẹ uze* ra rri rai.*
13 Kparoma, O Jihova, re who dhesẹ ẹgba ra.
Ma te so ile jiri* owhẹ fiki ẹgba ra.
Eme-Obotọ
^ Hayo “igoru nọ a ru fo no.”
^ Evaọ Hibru, “Uthethei edẹ.”
^ Evaọ Hibru, “fiki oghọghọ ovao ra.”
^ Hayo “ru ei zoruẹ.”
^ Evaọ Hibru, “ibi.”
^ Evaọ Hibru, “ifi-uze.”
^ Evaọ Hibru, “ovao rai.”
^ Evaọ Hibru, “Ma te so je kporo ile kẹ.”
