Emuhọ 31:1-55
31 Nọ oke o be nyaharo na o te yo ẹme nọ emezae Leban a be ta inọ: “Jekọp ọ rehọ eware kpobi nọ ọsẹ mai o wo no, eware ọsẹ mai o ro fe efe nana kpobi na.”+
2 Nọ Jekọp o te rri ovao Leban, ọ jẹ ruẹ nọ uruemu riẹ kpahe iẹe o gbẹ wọhọ epaọ ọsosuọ họ.+
3 Ukuhọ riẹ Jihova ọ tẹ ta kẹ Jekọp nọ: “Zihe kpohọ ẹkwotọ esẹ ra gbe imoni ra,+ yọ mẹ te jọ kugbe owhẹ.”
4 Kẹsena Jekọp o te vi uwou se Reshẹl avọ Lia inọ a nyaze obọ ẹwọ, ziọ obọ uthuru erao riẹ,
5 ọ tẹ ta kẹ ae nọ:
“Mẹ ruẹ nọ uruemu ọsẹ rai kpahe omẹ u nwene no,+ rekọ Ọghẹnẹ ọsẹ mẹ ọ rrọ kugbe omẹ ẹsikpobi.+
6 Whai omarai wha riẹ vevẹ inọ mẹ rehọ ogaga mẹ kpobi gbodibo kẹ ọsẹ rai.+
7 Rekọ ọsẹ rai ọ jẹ gwọlọ epanọ ọ rẹ rọ wha omẹ re, yọ o nwene osa mẹ isia ikpe; rekọ Ọghẹnẹ ọ re kẹe uvẹ re o ru omẹ oware uyoma ha.
8 Nọ ọ tẹ ta nọ, ‘Enọ e rrọ ipipe na e rẹ jọ osa ra,’ uthuru erao na soso u ve yẹ enọ e rrọ ipipe; rekọ nọ ọ jẹ ta nọ, ‘Enọ oma rai u si isi na e rẹ jọ osa ra,’ uthuru erao na soso u ve yẹ enọ oma rai u si isi.+
9 Fikiere Ọghẹnẹ ọ tẹ jẹ rehọ uthuru erao ọsẹ ra mi ei jẹ be rehọ ae kẹ omẹ.
10 Oke jọ nọ oma o jẹ kpare erao na, mẹ tẹ jọ ewezẹ kpare aro mẹ, mẹ tẹ ruẹ nọ oma ikri nọ e be gba erao nọ e rrọ uthuru na u si isi, o rrọ ipipe, jẹ rrọ keri keri.+
11 Kẹsena ukọ-odhiwu Ọghẹnẹ uzẹme na o te se omẹ evaọ ewezẹ na inọ, ‘Jekọp!’ me te yo nọ, ‘Mẹ na.’
12 Ọ tẹ ta nọ, ‘Ivie kpare aro ra, rri, oma ikri kpobi nọ e be gba erao nọ e rrọ uthuru na u si isi, o rrọ ipipe, jẹ rrọ keri keri, keme mẹ ruẹ eware kpobi nọ Leban o bi ru owhẹ no.+
13 Mẹ họ Ọghẹnẹ uzẹme na ọrọ Bẹtẹl,+ oria nọ whọ jọ ku ewhri họ upila, oria nọ whọ jọ ya eyaa kẹ omẹ.+ Whaọ enẹna kpama, no ẹkwotọ nana, re who zihe kpobọ ẹkwotọ nọ a jọ yẹ owhẹ.’”+
14 Kẹsena Reshẹl avọ Lia a tẹ ta kẹe nọ: “Kọ oware jọ u gbe kiọkọ kẹ omai evaọ uwou ọsẹ mai nọ ma te rọ reuku?
15 Kọ ọ gbẹ rehọ omai wọhọ erara, nọ orọnọ ọ zẹ omai no na jẹ be re igho nọ a hwa fihọ omai na?+
16 Efe kpobi nọ Ọghẹnẹ ọ rehọ mi ọsẹ mai yọ ọmai gbe ọrọ emọ mai.+ Fikiere ru oware kpobi nọ Ọghẹnẹ ọ ta kẹ owhẹ nọ who ru.”+
17 Kẹsena Jekọp ọ tẹ kpama, ọ tẹ wọ emọ riẹ gbe eyae riẹ fihọ ehru ekamẹle,+
18 o te mu owa erao riẹ kpobi họ esu vrẹ gbe eyero kpobi nọ o kokohọ,+ uthuru riẹ nọ o wo no evaọ Padan-eram, re o kpo bru ọsẹ riẹ Aiziki evaọ obọ otọ Kenan.+
19 Whaọ Leban ọ nyai bru eto igodẹ riẹ, Reshẹl o te tho emema tẹrafim*+ ọsẹ riẹ.+
20 U te no ere no, Jekọp o ru Leban ohwo Eram na ẹghẹ, keme ọ vuẹ riẹ nọ ọ be te dhẹ hẹ.
21 Rekọ ọ tẹ dhẹ jẹ fa Ethẹ* na vrẹ,+ ọyomariẹ avọ eware nọ o wo kpobi. Ọ tẹ rọ ovao rri ubrotọ igbehru obọ Giliad.+
22 Evaọ ẹdẹ avọ esa a tẹ vuẹ Leban nọ Jekọp ọ dhẹ no.
23 Fikiere ọ tẹ rehọ inievo-emezae* riẹ kugbe oma o te lei evaọ ugbo nọ o rẹ rehọ edẹ ihrẹ, kẹsena o te lei mu evaọ ubrotọ igbehru obọ Giliad.
24 Kẹsena Ọghẹnẹ ọ tẹ romavia kẹ Leban ohwo Eram+ na evaọ ewezẹ evaọ aso,+ ọ tẹ ta kẹe nọ: “Yọroma kpahe ẹme nọ whọ rẹ ta kẹ Jekọp, te owoma hayo oyoma.”*+
25 Fikiere Leban ọ tẹ nyabru Jekọp, oke yena yọ Jekọp ọ rọ uwou-udhu riẹ vi ugbehru yọ Leban avọ inievo-emezae riẹ a wohọ ubrotọ igbehru Giliad.
26 Kẹsena Leban ọ tẹ ta kẹ Jekọp nọ: “Kinọ eme who ru na? Fikieme whọ rọ jiroro nọ who re ru omẹ ẹghẹ nọ whọ rọ wọ emetẹ mẹ vrẹ wọhọ ahwo nọ a rọ egbọdọ mu bi kpohọ igbo?
27 Fikieme whọ rọ lẹlẹ dhẹ nọ who ro ru omẹ ẹghẹ, nọ whọ gbẹ rọ vuẹ omẹ hẹ? Orọnọ whọ vuẹ omẹ, mẹ hae te rehọ oghọghọ avọ ile gbe ojẹjẹ gbe akpata ro ru ehaa ukpo kẹ owhẹ.
28 Rekọ whọ kẹ omẹ uvẹ re mẹ viọlọ emọ-iruọmọ* mẹ gbe emetẹ mẹ hẹ. Oware ugheghẹ who ru na.
29 Me wo ogaga nọ mẹ sai ro ru owhẹ oware uyoma, rekọ Ọghẹnẹ ọsẹ ra ọ ta kẹ omẹ aso nọ ọ vrẹ na nọ, ‘Yọroma kpahe ẹme nọ whọ rẹ ta kẹ Jekọp, re o gbẹ jọ oyoma ha rekọ owoma.’+
30 Whaọ who bi kpo keme urru epanọ who re ro zihe kpobọ uwou ọsẹ ra u bi si owhẹ anwẹdẹ, rekọ fikieme who ro tho edhọ mẹ?”+
31 Jekọp o te yo kẹ Leban nọ: “Keme ozọ u je mu omẹ, keme mẹ ta kẹ omamẹ nọ, ‘Ẹsejọhọ whọ te rọ ogaga mi omẹ emetẹ ra.’
32 Ohwo kpobi nọ whọ jọ obọ riẹ ruẹ edhọ ra o re whu. Jọ iraro inievo mai kiẹ eware mẹ, re whọ rehọ onọ o rrọ ora.” Rekọ Jekọp ọ riẹ nọ Reshẹl o tho rai hi.
33 Fikiere Leban ọ tẹ ruọ eva uwou-udhu Jekọp gbe eva uwou-udhu Lia gbe eva uwou-udhu idibo-emetẹ ivẹ na,+ rekọ ọ ruẹ e rai hi. Kẹsena o te no eva uwou-udhu Lia ze ọ tẹ ruọ eva uwou-udhu Reshẹl.
34 Evaọ oke yena yọ Reshẹl ọ tọlọ emema tẹrafim na no o te fi ai họ eva ekete eyae na nọ a rẹ wọ fihọ ehru ekamẹle, ọ tẹ keria ehru rai. Leban ọ tẹ gwọlọ eva uwou-udhu na soso rekọ ọ ruẹ e rai hi.
35 Kẹsena ọ tẹ ta kẹ ọsẹ riẹ nọ: “Eva e dha owhẹ hẹ, olori mẹ, keme mẹ te sae kpama kẹ owhẹ hẹ keme oware nọ u re ru eyae na u bi ru omẹ.”+ Fikiere ọ tẹ romatotọ gwọlọ vrẹ rekọ ọ ruẹ emema tẹrafim na ha.+
36 Fikiere eva e tẹ dha Jekọp o te mu Leban họ ẹfo. Jekọp ọ tẹ ta kẹ Leban nọ: “Eme me ru thọ, uzi vẹ mẹ thọ nọ who bi ro le omẹ kiti kiti na?
37 Whaọ nọ whọ kiẹ eware mẹ kpobi no na, oware uwou ra vẹ whọ ruẹ? Fi ei họ etenẹ evaọ aro inievo ra gbe inievo mẹ, re a bruoziẹ mẹ avọ owhẹ.
38 Anwọ ikpe udhe nana nọ mẹ rọ rrọ kugbe owhẹ na, eva i no igodẹ ra gbe ewe ra ẹdẹvo ho,+ yọ mẹ re igbo nọ e rrọ uthuru erao ra ẹdẹvo ho.
39 Mẹ rehọ arao ọvo nọ erao ijihẹ e za se owhẹ hẹ.+ O tẹ via ere mẹ rẹ hwae. Te aso a tho arao na hayo uvo a tho rie, whọ rẹ vuẹ omẹ nọ mẹ hwae.
40 Evaọ oke uvo, ẹrrorro uvo ọ rẹ mahe omẹ oma, evaọ aso kọ ekpahe, yọ mẹ jẹ rọ owezẹ te ẹro ho.+
41 Anwọ ikpe udhe ena nọ mẹ rọ rrọ uwou ra na. Mẹ gbodibo kẹ owhẹ ikpe ikpegbene rọkẹ emetẹ ivẹ ra gbe ikpe ezeza rọkẹ uthuru erao ra, yọ who nwene osa mẹ isia ikpe.+
42 Ọghẹnẹ ọsẹ mẹ,+ Ọghẹnẹ Abraham gbe Ọnọ Aiziki ọ be dhozọ riẹ*+ ọ gbẹ rrọ abọ mẹ hẹ, ababọ whọ hai ro vi omẹ kpo. Ọghẹnẹ ọ ruẹ oja-oriọ mẹ gbe iruo egaga abọ mẹ, oyejabọ nọ ọ rọ whọku owhẹ aso nọ ọ vrẹ na.”+
43 Kẹsena Leban ọ tẹ kpahe kẹ Jekọp nọ: “Emetẹ na emetẹ mẹ, emọ na emọ mẹ, uthuru erao na uthuru mẹ, yọ eware kpobi nọ who bi rri na emẹ gbe erọ emetẹ mẹ. Oware uyoma vẹ mẹ rẹ sai ru enana gbe emọ rai nọ a yẹ?
44 Fikiere nyaze re ma re ọvọ, mẹ avọ owhẹ, re o jọ isẹri evaọ udevie mẹ avọ owhẹ.”
45 Fikiere Jekọp ọ tẹ wọ utho ọ tẹ rehọ iẹe vi wọhọ upila.+
46 Kẹsena Jekọp ọ tẹ ta kẹ inievo riẹ nọ: “Wha wọ itho ze!” Fikiere a tẹ wọ itho kokohọ dudurudu. Kẹsena a tẹ jọ evaọ etẹe re emu evaọ ehru itho nọ a wọ kokohọ dudurudu na.
47 Leban o te mu ei họ ese Jiga-sahaduta,* rekọ Jekọp o se rie Galiẹd.*
48 Kẹsena Leban ọ tẹ ta nọ: “Ẹre-itho nana yọ isẹri evaọ udevie mẹ avọ owhẹ nẹnẹ na.” Oyejabọ nọ o ro sei Galiẹd,+
49 gbe Uwou-Eroro na, keme ọ ta nọ: “Jọ Jihova o rou omẹ avọ owhẹ evaọ okenọ ma be ruẹ ohwohwo ho.
50 Whọ tẹ rọ oja re emetẹ mẹ hayo nọ who te mu eyae efa họ ẹrehọ tu emetẹ mẹ, dede nọ ohwo ọvo ọ rrọ kugbe omai hi, kareghẹhọ nọ Ọghẹnẹ ọ te jọ isẹi evaọ udevie mẹ avọ owhẹ.”
51 Leban ọ tẹ gbẹ ta kẹ Jekọp nọ: “Ẹre-itho na ọna ọ rrọ etenẹ na, yọ upila nọ me ru fihọ udevie mẹ avọ owhẹ ọna ọ rrọ etenẹ na.
52 Ẹre-itho nana yọ isẹri, yọ upila na yọ oware nọ u ti se isẹri,+ inọ mẹ rẹ nyavrẹ ẹre-itho nana ti ru owhẹ oware uyoma ha, yọ whọ rẹ nyavrẹ ẹre-itho nana gbe upila nana ti ru omẹ oware uyoma ha.
53 Jọ Ọghẹnẹ Abraham+ gbe Ọghẹnẹ Nahọ gbe Ọghẹnẹ ọsẹ rai o bruoziẹ mẹ avọ owhẹ.” Jekọp ọ tẹ rọ Ọnọ ọsẹ riẹ Aiziki ọ be dhozọ riẹ* duwu iyei.+
54 Nọ oyena o vrẹ no, Jekọp o te dhe idhe evaọ ehru ugbehru na, o te zizie inievo riẹ re a re ebrẹdi. Fikiere a tẹ re jẹ wezẹ ehru ugbehru na asohẹrioke.
55 Leban ọ tẹ kpama evaọ irioke frifri ọ tẹ viọlọ emọ-iruọmọ* riẹ+ gbe emetẹ riẹ jẹ ghale ai.+ Kẹsena Leban ọ tẹ ruọ edhere bi zihe kpo.+
Eme-Obotọ
^ Koyehọ, Yufretis.
^ Hayo “imoni.”
^ Evaọ Hibru, “Yọroma re whọ gbẹ ta no ẹme owoma ruọ oyoma kẹ Jekọp ho.”
^ Evaọ Hibru, “emezae.”
^ Evaọ Hibru, “ozodhẹ Aiziki.”
^ Ẹme ẹvẹrẹ Aramaik nọ otofa riẹ o rrọ “Ẹre-Itho Isẹri.”
^ Ẹme Hibru nọ otofa riẹ o rrọ “Ẹre-Itho Isẹri.”
^ Evaọ Hibru, “ọ tẹ rọ ozodhẹ ọsẹ riẹ Aiziki.”
^ Evaọ Hibru, “emezae.”
