U wo oria jọ nọ igbrẹwọ e wariẹ họ evaọ obọ South America nọ a re se Amazon. Yọ ahwo nọ a no erẹwho sa-sa ze, jẹ be ta evẹrẹ sa-sa a be rria oria nana. Fikiere evaọ amara Ahrẹ ọrọ ukpe 2017, Isẹri Jihova ikpegbesa a tẹ fa Ethẹ Maroni vrẹ kpohọ obonọ a re se French Guiana re a ta usi uwoma kẹ ahwo nọ a be rria iwhre sa-sa nọ e rrọ akotọ ethẹ na.

 Amara ọvo taure oke nọ a ti ro kpohọ erẹ na o te ti te, aikpobi na a te kokohọ re a gbẹgwae epanọ onya na o te jọ. Oniọvo jọ evaọ usu rai nọ a re se Winsley ọ ta nọ: “Ma kiẹ eware jọ rri kpahe obonọ ma be nya na, ma tẹ jẹ ta ẹme kpahe oghẹrẹ nọ ma te rọ ruẹrẹ oma kpahe kẹ erẹ na.” Edẹ ikpegbivẹ a rria evaọ obonọ a ro kpohọ erẹ na. Ohwo kpobi nọ o kpohọ erẹ na ọ wha uwou-inwe gbe oghẹrẹ uto jọ nọ a re thuru veghe ro kiẹzẹ, a tẹ jẹ kẹ ae oware nọ a re fi ai họ nọ ame ọ rẹ rueva ha. Arupre a ti ro te eria ivẹ jọ, a vẹ rọ ekọ esese bi kpohọ eria nọ i kiọkọ.

 Ẹvẹ inievo nọ a zizie re a kpohọ erẹ na a rri uzizie na? Ọzae-avọ-aye jọ nọ a kpohọ usi uwoma ota nana họ Claude avọ Lisette. Aimava na a kpako te ikpe udhosa-gbọ no, rekọ nọ a zizie ai kẹ erẹ na, eva e were rai gaga. Claude ọ ta nọ: “Eva e were omẹ wo umuo ho nọ a zizie omai, rekọ ozọ o jẹ dina mu omẹ, keme me yo nọ ethẹ na o re fi ẹkporo gaga.” Aye riẹ, Lisette, ọ jẹ ruawa re. Ọ ta nọ: “Mẹ jẹ ruawa epanọ mẹ te sae rọ ta usi uwoma kẹ ahwo Amerindia nọ a rẹ ta evẹrẹ sa-sa na.”

 Oniọvo ọfa nọ a re se Mickaël nọ ọ jọ usu ahwo na ọ jẹ ruawa otiọye re. Ọ ta nọ: “Ma nwane riẹ kpahe ahwo Wayana tere he. Fikiere me te ru ekiakiẹ evaọ itanẹte re mẹ riẹ epanọ a rẹ ta eme jọ je yere ahwo evaọ ẹvẹrẹ na.”

 Shirley avọ ọzae riẹ, Johann, nọ a rrọ usu ahwo nọ a kpohọ erẹ na a kere unu evẹrẹ sa-sa nọ a be ta evaọ ewho nọ e wariẹ ethẹ na họ fihotọ. Shirley ọ ta nọ: “Ma jọ jw.org danlodu ividio sa-sa evaọ evẹrẹ ahwo na buobu. Ma tẹ jẹ gwọlọ obe jọ nọ ma re ro wuhrẹ eme jọ evaọ ẹvẹrẹ Wayana.”

 Evaọ Edivẹ-Oka, Ahrẹ 4, a tẹ jọ ẹwho Saint-Laurent du Maroni ruọ arupre kpohọ ẹmẹwho jọ evaọ French Guiana nọ a re se Maripasoula.

 Nọ a te etẹe no, a tẹ rehọ ekọ esese nọ a re se pirogues ro bi kpohọ iwhre nọ e rrọ eria sa-sa nọ ethẹ Maroni na ọ ghale kpohọ be ta usi uwoma kẹ ahwo iwhre na, yọ edẹ ene soso a ro ru onana. Roland nọ ọ jọ usu ahwo nọ a kpohọ erẹ na ọ ta nọ: “Ahwo Amerindia na a gaviezọ kẹ omai ziezi. A jẹ nọ omai enọ buobu. Ejọ e tubẹ gwọlọ nọ ma wuhrẹ Ebaibol kugbe ai.”

 Evaọ iwhre jọ nọ Johann avọ Shirley a nyae jọ ta usi uwoma, a nya ku ọzae-avọ-aye jọ nọ omoni rai jọ o thuru whu kẹle na. Johann ọ ta nọ: “Ma dhesẹ ividio jọ kẹ ọzae-avọ-aye na, onọ uzoẹme riẹ o ta nọ, Ọmotọ America Jọ Ọ Riẹ Ọghẹnẹ Uwhremu Na. Ividio na o duobọte ọzae-avọ-aye na udu gaga. A tẹ kẹ omai adrẹse nọ ma sae rọ jọ itanẹte vi uwou se ai, keme a gwọlọ nọ ma rẹ hai lele ai ta ẹme.” Ma rẹ jọ JW Broadcasting ruẹ ividio na.

 Iwhre nọ a re se Antécume Pata họ iwhre nọ ọ mai thabọ evaọ obonọ a nya na. Nọ Isẹri Jihova na a te etẹe, yọ oma o rrọ rai no. Osu iwhre na ọ tẹ kẹ ai uvẹ re a thuru ito rai na fihọ eria nọ a rẹ sai kiẹzẹ re a serihọ. Yọ ethẹ na a jọ họ keme etẹe ahwo iwhre na a rẹ jọ họ re.

 A te je no etẹe kpohọ iwhre ọfa nọ a re se Twenké. Nọ a te obei, a tẹ ruẹ nọ ahwo iwhre na a bi weri ohwo rai jọ nọ o whu. Éric nọ ọ jọ usu ahwo nọ a ru ọruẹrẹfihotọ erẹ na ọ ta nọ: “Osu iwhre na ọ kẹ omai uvẹ re ma nya epanọ u je omai evaọ iwhre na jẹ sasa ahwo nọ a rrọ uweri na oma. Eva e were osu iwhre na avọ uviuwou riẹ gaga fiki eria nọ ma se no Ebaibol ẹvẹrẹ Wayana ze kẹ ai. Ma dhesẹ ividio kẹ ai, enọ e ta kpahe eyaa Ọghẹnẹ nọ e rrọ Ebaibol na inọ ọ te kpare ahwo nọ a whu no ze.”

 Nọ ahwo na a no iwhre Twenké no, a tẹ jọ ẹwho Maripasoula ruọ arupre kpohọ ẹmẹwho jọ nọ a re se Grand-Santi, yọ o rehọ e rai iminiti ọgba. Nọ a te obei, a tẹ rehọ Edivẹ-Oka gbe Edesa-Oka rọ ta usi uwoma kẹ ahwo iwhre na. Kẹsena evaọ Edene-Oka, a te bi Ethẹ Maroni na vrẹ kpohọ iwhre jọ nọ a re se Apatou, yọ o rehọ e rai euwa isoi gbe iminiti ọgba.

 Evaọ ẹdẹ nọ ọ kẹle ẹdẹ nọ a ti ro zihe kpo na, a te kpohọ iwhre sa-sa nọ igbrẹwọ e wariẹ họ nọ ahwo Maroon a be rria. Ahwo nana yọ ahwo Africa nọ a mu esẹ-esẹ rai kpohọ igbo obọ South America evaọ oke anwae. Isẹri Jihova na a te zizie ahwo kpobi re a nyaze ewuhrẹ jọ nọ a ru evaọ ẹwho na, yọ evaọ otọ ekanopi ologbo jọ nọ a gha họ a jọ ru ewuhrẹ na. Claude ọ ta nọ: “Eva e were omai gaga keme ahwo nọ a ziọ ewuhrẹ na a jọ buobu dede nọ ohiohiẹ ẹdẹ yena ma zizie i rai.” Ahwo udhone gbe ikpegbọvo a no iwhre sa-sa ze ziọ ewuhrẹ na. Oniọvo jọ evaọ usu inievo nọ i kpohọ usi uwoma ota na nọ a re se Karsten ọ tẹ rehọ ẹvẹrẹ Aukan rọ kẹ ovuẹ ogbotu nọ uzoẹme riẹ o ta nọ, “Kọ Uzuazọ na Kpobi Ona?” Yọ oyena o jọ orọ ọsosuọ nọ Karsten o ro kpohọ erẹ usi uwoma ota utioye na.

 Nọ inievo na e ta usi uwoma kpobi no, a te zihe kpobọ Saint-Laurent du Maroni. Eva e were inievo na gaga fikinọ ahwo na a gaviezọ kẹ usi uwoma na ziezi, a rehọ ebe buobu mi inievo na, a te je rri ividio sa-sa nọ Isẹri Jihova a ru.

 Lisette ọ ta nọ: “Mẹ rẹ sai ruẹ unu gbiku epanọ eva e be were omẹ te he fiki erẹ usi uwoma ota nana nọ mẹ nya na.” Cindy ọ ta ọkpọ ẹme ọvona inọ: “A tẹ wariẹ zizie omẹ kẹ erẹ otiọnana, mẹ rẹ seba ẹnya ha. Who gbe ri kpohọ oghẹrẹ usi uwoma ota utionana ha, whọ rẹ riẹ epanọ u re ru eva were ohwo te he!”

 Erẹ usi uwoma ota nana nọ Isẹri Jihova na a nya na o were rai te epanọ ejọ e be rọ gwọlọ nọ a re zihe dede. Mickaël ọ ta nọ: “Uvẹ na o tẹ wariẹ rovie, ma rẹ nya!” Whaọ enẹna, Winsley ọ kwa kpobọ Saint-Laurent du Maroni no. Claude avọ Lisette, nọ a rrọ ikpe udhosa-gbọ a kwa kpobọ Apatou no.