O rẹ were omai Isẹri Jihova re ma lele ahwo egagọ kpobi ta ẹme kpahe eware nọ ma rọwo, rekọ ma rẹ gua egagọ mai kugbe egagọ efa nọ iwuhrẹ rai i wo ohẹriẹ no emai hi re ma gọ kugbe. Ebaibol na o dhesẹ nọ Ileleikristi uzẹme a re wo “okugbe ọvo,” yọ ugogo oware jọ nọ u re dhesẹ nọ a wo okugbe ọvo họ, a rẹ rọwo eware evona. (Ahwo Ẹfisọs 4:16; 1 Ahwo Kọrint 1:10; Ahwo Filipai 2:2) Orọnikọ evaọ eware wọhọ uyoyou, ohrọ-oriọ, gbe erọvrẹ ọvo a rẹ jọ rọwokugbe he. Eware nọ ma rọwo i gbe no Ebaibol ze he kiyọ ẹrọwọ mai ofofe, fikiere eriariẹ egbagba Ebaibol na ma rehọ iwuhrẹ egagọ mai no ze.—Ahwo Rom 10:2, 3.

 Ebaibol na o dhesẹ nọ Oleleikristi ọ tẹ be gua egagọ riẹ kugbe egagọ efa nọ a jọ rọwo eware evona ha, yọ o bi fi omariẹ họ otọ owhowha nọ o rẹ nwae oma; yọ onana o rẹ raha usu ohwo kugbe Ọghẹnẹ. (2 Ahwo Kọrint 6:14-17) Fikiere, Jesu ọ rọwo nọ ilele riẹ a gua egagọ rai kugbe egagọ efa ha. (Matiu 12:30; Jọn 14:6) Epọvo na re, Ọghẹnẹ ọ rọ ẹkwoma Mosis jie uzi kẹ ahwo Izrẹl evaọ oke anwae inọ a gua egagọ rai kugbe egagọ erẹwho nọ e wariẹ e rae họ họ. (Ọnyano 34:11-14) Re ahwo Izrẹl a sae whaha ọguakugbe egagọ, enọ i yoẹme evaọ usu rai a siọ obufihọ ahwo nọ a rrọ egagọ efa.—Ẹzra 4:1-3.

 Ee. Evaọ 2024, ma rehọ euwa nọ i bu te ima-odu ọvo, ima egba izii gbe ọgbagbesa, idu egba ene gbe udhosa gbe ikpegbesa, egba ihrẹ gbe udhegbihrẹ (1,191,877,671) soso ro lele ahwo egagọ efa ta ẹme. Wọhọ Pọl ukọ na, o rẹ were omai re ma riẹ eware nọ “ahwo kpobi” nọ ma be ta usi uwoma kẹ a rọwo. (1 Ahwo Kọrint 9:19-22) Ma te bi lele ae ta ẹme, ma rẹ daoma ru lele ohrẹ Ebaibol nọ o ta nọ joma wo “adhẹẹ odidi” kẹ amọfa.—1 Pita 3:15.